“Elə heç-heçələr Azərbaycanda ciddi nəticə sayılmır”

“Kəpəz”in kapitanı Yeqor Xvalko martın 25-də Azərbaycan və Belarus milli komandaları arasında keçiriləcək yoxlama matçı öncəsi fikirlərini bildirib.

QOL.az xəbər verir ki, o, bu barədə Belarusun football.by saytına danışıb. 

28 yaşlı belaruslu futbolçu deyib ki, Azərbaycan millisinib oyunlarını izləməyə çalışır:

- Bəli, çalışıram həmişə oyunlara baxım. Hazırda komandada çoxlu yeni ad görünür. Millətlər Liqasında uğursuz çıxış etdilər. Yalnız Estoniya ilə səhv etmirəmsə, bir oyunda heç-heçə oynadılar. Digər qarşılaşmalarda uduzdular. Qrupda İsveç və Slovakiya vardı. Təbii ki, ölkədə bu nəticələrdən narazılıq oldu. İndi portuqaliyalı baş məşqçi Fernandu Santuşun rəhbərliyi ilə heyət yenilənir. Siyahıya baxdım — 4-5 yeni futbolçu var. Oxudum ki, Belarusda Alosun dövründə artıq 15 oyunçu debüt edib. Burda da təxminən eyni vəziyyətdir. Gənc oyunçular komandaya cəlb olunur. Bir neçə təcrübəli, 30-32 yaşlı futbolçu da var. Ümumiyyətlə, bizdə də vəziyyət belədir. Amma orta hesabla futbolçular 27-28 yaşındadır.

- Azərbaycan uzun müddətdir ki, qələbə qazanmır. Elə bil, indi də əsas tələb olunan nəticədir. Elə belaruslardan olduğu kimi.

- Elədir. Burada idman mediasını oxuyuram, futbol veteranları və mütəxəssislər hamısı eyni şeyi deyir: ilk növbədə qələbə lazımdır. Millətlər Liqasında Estoniya ilə heç-heçə kimi nəticələr onlar üçün ciddi sayılmır. Haiti, Belarus — deyirlər ki, kimlə oynamağın fərqi yoxdur, əsas odur ki, qalib gələsən.

Bizdə də axı 16 oyunluq qələbəsiz seriya var idi. Amma sonra nəticələr gəldi. Bəzən heç-heçə, bəzən qələbə. İsveçrə ilə əla oyun olmuşdu - 3:3, bir az da dözsəydik, qələbə qazanacaqdıq.

Burada məndən Belarus millisi haqqında soruşdular. Dedim ki, komandalar təxminən eyni səviyyədədir. Yadımdadır, təxminən üç il əvvəl Millətlər Liqasında qarşılaşmışdıq, bir də Minskdə yoldaşlıq oyunu olmuşdu — və heç bir tərəfin açıq-aşkar üstünlüyü yox idi. Bu oyunda hər şey ola bilər. Maraqlı qarşılaşma olacaq. Əlbəttə, oyuna getmək istəyərdim, amma çox uzaqdır, üstəlik həmin gün məşq var. Təəssüf ki, oyunu canlı izləyə bilməyəcəyəm.

- Matçın keçiriləcəyi Masazırdakı “Bank Respublika Arena”nın meydanı barədə nə deyə bilərsən? Orada oynamısan?

— Bəli, daim. “Sabah” bütün ev oyunlarını orada keçirir. Qışda da, yazda da, payızda da orada oynamışıq. İlin istənilən fəslində meydança yaxşı vəziyyətdə olur. Üstəlik, stadion maraqlıdır, düzbucaqlı formadadır, sırf futbol stadionudur. Tamaşaçılar da gəlsə, gözəl atmosfer olacaq. Stadion çox böyük deyil. Hissiyatla deyə bilərəm ki, 5-6 min nəfərlikdir. Doqquz min? Onda lap əladır.

- Birdəfəlik Azərbaycanda qalmaq barədə düşünürsən?

- Yox-yox-yox. Mən belarusam. Mövsümün sonunda çətin olur. Yarışın bitməsinə 2 tur qalır, amma artıq evə getmək istəyirsən. Həmişə məzuniyyətə vətənə qayıdıram. Burada qalmaq planım yoxdur. Nə olacaq, bilmirəm. Çempionatın sonuna iki ay qalıb. Sonra bəlkə hansısa variantlar ortaya çıxar. 28 yaş — yaxşı yaşdır, müəyyən təcrübə var. Artıq həyatda nəyəsə nail olmaq lazımdır.