Sadıqov: "Müəyyən movzular var ki, mətbuatda danışmaq doğru olmaz"

"Zirə"nin baş məşqçisi Rəşad Sadıqov Misli Premyer Liqasının 15-ci turunda doğma meydanlarında "Sumqayıt"ı 4:1 hesabı ilə məğlub etdikləri oyundan sonra keçirilən mətbuat konfransında iştirak edib.

QOL.az xəbər verir ki, o deyib: "Çox maraqlı oyunun şahidi olduq. Hər iki komanda baxımlı futbol oynamağa çalışırdı. İkimizdə də yaxşı alınırdı. Birinci hissədə hər iki tərəf fərqləndi. Yenə qol epizodlarımız var idi. Onlardan istifadə edə bilmədik, rəqib kornerdən fərqləndi. Amma meydanda bərabər mübarizə gedirdi. Düzdür, əks-hücumlarımız daha kəsərli idi. Amma “Sumqayıt” yaxşı pressinq edirdi. Ona görə arxadan hücumlar qurmaqda çətinlik çəkirdir. Bu səbəbdən biz də pressinq tətbiq edərək hücum etməyə çalışırdıq. Pis alınmırdı. İkinci hissədə rəqibdən daha üstün oynadıq və qol epizodlarından istifadə edərək vacib qələbə qazandıq. 

Vaqif Cavadovu təbrik etmək istəyirəm. Bu yükün altına girdikdə narahatlığım var idi. Amma oyunlar göstərir ki, yükü daşımağa qadirdir. Hətta rəqibi analiz edəndə maraqlı detallar gördüm. Bu gün də rəqimizin oyun stilini hiss etdik. Vaqifə uğurlar arzulayıram. Futbolçularımı da təbrik edirəm. Üç gündən sonra "Şamaxı"ya qarşı kubok matçına çıxacağıq. Tez o oyuna keçid etməliyik".

Mütəxəssis Vaqif Cavadovun "Rəqib güclü olsa da, qolları biz hədiyyə etdik" sözlərinə fikir bildirib: "Yaxşı pressinq tətbiq edib, hücuma keçidlərdən qollar vurduq. Bu elementlər də müasir futbolda çox önəmlidir. Qolların 60-70 faizi o elementlərdən sonra olur. Mövqe hücumları ilə indi qol vurmaq çətindir, çünki komandalar böyük qüvvə ilə müdafiə olunur və yaxşı oyunçulara malikdirlər. Bəlkə də, təhlil etdikdən sonra fikrim dəyişəcək. Amma düşünürəm ən yaxşı oyunlarımızdan idi". 

R. Sadıqov "Zirə"nin prezidenti Orxan Məmmədovun oyundan sonra soyunub-geyinmə otağına gəlməsindən də söz açıb: "Bizim üçün də sevindiricidir ki, klubumuzun fəxri prezidenti gəlib komandanı təbrik etdi. Müəyyən movzular var ki, mətbuatda danışmaq doğru olmaz. Yaxından təbrik etməyi, dəyər verməyi bizim üçün önəmlidir. Çətin günlərdə Orxan Məmmədov hər zaman özünü önə verir. Ona təşəkkür edirəm".

O, oyunda zədələnən futbolçusu Rafael Utziqin durumu haqda danışıb: "Görünən odur ki, zədəsi ciddidir. Dünən Qismət Alıyevi itirdik. Ən azı 5-6 həftə komandadan kənarda qalacaq. Bu gün də Utziqin zədələnməsi bizi məyus edir. Görünən odur ki, qış fasiləsindən sonra oynaya biləcək. Sabah MRT olacaq. Daha dəqiq biləcəyik. Elə futbolçular var ki, onlar ağrıdan şikayət edəndə bilirsən, nə qədər ağır zədədir. Utziq də dözümlü futbolçulardandır. Ağrısı olursa, demək ki, həqiqətən ağır zədədir.

Ümid edək ki, çox uzun zaman bizdən ayrı qalmayacaq. Zədələr futbolun bir hissəsidir. Əsas da yerli futbolçuların zədələrindən əziyyət çəkirik. Onları əvəzləyən futbolçular layiqli çıxış etdilər. Düşünürəm, özlərini daha da yaxşı tərəfdən göstərəcəklər". 

Mütəxəssis futbolçusu Davit Volkovun het-trikinə də münasibət bildirib: "Məşqlərdə eyni istək, eyni konsentrasiya ilə oynayır. Meydanda əzmkarlıq edir. Söhbət tək Volkvodan getmir, bütün futbolçular. Elə olanda oyunda çox şey alınır. Uğurun sirrini onda görmüşəm. Nə qədər əzmkar çalışacaqsan, inşallah ki, nəticədə sevinən tərəf olacaqsan".