"Bir ildən sonra bu komanda istənilən rəqibə qarşı normal futbol oynayacaq" - Fernandu Santuş

Azərbaycan millisinin baş məşqçisi Fernandu Santuş UEFA Millətlər Liqasının qrup mərhələsi çərçivəsində keçiriləcək Azərbaycan – Slovakiya oyunu öncəsi təşkil olunan mətbuat konfransında iştirak edib.

QOL.az xəbər verir ki, o, deyib: "Nəyin baş verməsindən asılı olmayaraq, hər oyuna pozitiv köklənməliyik. Buna məcburuq. Çünki xallar qazanmalıyıq. Futbolçularıma güvənirəm". 

70 yaşlı mütəxəssis sabahkı görüşdə kimin kapitan olacağını bildirib: "Kapitanlıq elədir ki, hər dəfə dəyişmək istəməzdik. Liderlik keyfiyyətlərini nəzərə alsaq, sabahkı matçda Bədavini kapitan kimi düşünürük".

O, Emin Mahmudovdan kapitanlığı almasından danışıb: "Kapitan həm komandanın daxilində, həm də meydançada özünü bariz şəkildə göstərməlidir. Kapitan bir növ komandada baş məşqçinin sözçüsüdür. Fərdi olaraq Emini çox bəyənirəm. Həmçinin də futbolçu kimi. Baş məşqçinin tapşırıqlarını yerinə yetirə bilmirsə, digər kapitanı seçməliyik. İlk oyunda penalti ilə bağlı göstəriş vermişdim. Buna riayət olunmadı. Bu qədər".

F. Santuş daha çox vaxt və məşqlərin lazım olduğunu qeyd edib: "Təbii ki, çox çalışmalıyıq. Müəyyən oyun fəlsəfəsi olduğu halda, uzun müddət bunun oturuşması üçün çox çalışmalısan. Bu yolda səylərimizi davam etdirməliyik. Artıq hücum planında müəyyən mənada istədiyimiz şeyləri görməyə başlamışıq. Son oyunda bu aspektlərdə komandamız sırf hücum planında göstərdi ki, daha çoxunu edə bilər. Epizodlarımız oldu, amma faydalana bilmədik. Amma qol epizodları yaratmağa davam etsək, daha çox faydalana bilərik.

Hazırkı vəziyyətdə komandanın əsas problem qollar buraxmaqdır. Çox qol buraxırsansa, oyunun taleyini həll etmək çətinləşir. Tək Azərbaycana şamil olunmur, bütün dünyada bu tendensiya var. Çox qol vuran komanda da qələbəyə daha yaxın olur. Müdafiə planında işləməli olduğumuz elementlər çoxdur. Digər aspektlərdə də inkişaf etməliyik. Üç məşqə bunları etmək mümkünsüzdür. Bunun üçün daha çox məşq etmək, daha çox oyunlara çıxmaq lazımdır. Oynadıqca görəcəyik ki, problemlər bir-bir aradan qalxır. Müdafiə planına daha çox fokuslanmalıyıq, daha çox intensivlik tələb olunur. Komandanın formalaşmasında sadaladığım amillər mühüm rol oynayır".

O, millimizin bir ildən sonra istənilən rəqibə qarşı normal oynayacağını bildirib: "Ümidvaram ki, Estoniyadakı baş verməz. Matçın ilk hissəsini 2:0 tamamlamaq üçün hər şeyi etmişdik. Qol epizodlarımız var idi. Yaratdığın qol fürsətlərindən istifadə edə bilmirsənsə, rəqib də qol vurursa, nəticə qazanmaq çətinləşir. Qollar buraxdıqdan sonra da futbolçulara psixoloji təsir edir. Futbol hər yerdə eynidir, Portuqaliya, İspaniya, İngiltərə, Gürcüstan və s. Hər yerdə eyni tendensiyadır. Artıq futbolçularda stabil olaraq, düşüncə tərzi olmalıdır ki, müdafiədə qol buraxmayacağıq və qollar vuracağıq. İnkişaf etməliyik. Gələcəyə nikbin baxmaq lazımdır. Bir ildən sonra bu komanda istənilən rəqibə qarşı normal futbol oynayacaq. Hazırkı vəziyyətdə nəticələrdən məmnun deyilik. Özüm də nəticələrə görə xoşbəxt deyiləm. Hamıdan əvvəl nəticə mənim özümü məmnun etmir.

Milli məşqçilik karyeramın 15 faizini məğlubiyyətlər təşkil edir. Mənim üçün yaxşı hal deyil. İlk növbədə özüm haqda düşünməliyəm. Bura gələcək layihə ilə bağlı gəlmişəm. Azərbaycanda gələcək üçün normal komanda formalaşdırmaq istəyirəm. Eyni motivasiya, eyni istəklə davam etmək niyyətindəyəm. Asan olmayacaq. Azərbaycanın bütün matçlarını izləmişəm. Portuqaliya millisinin baş məşqçisi kimi Azərbaycana qarşı da oynamışam. Azərbaycan futbolu haqda məlumatlı idim. Bura gəlməzdən öncə artıq inanırdım ki, gələcək layihəyə köməyim dəyəcək. Əgər sırf karyeramla bağlı soruşursunuzsa, hazırkı vəziyyət özüm üçün də ürəkaçan deyil. Təcrübəliyəm və qazanmaq istəyirəm. Bura gəlməzdən öncə buradakı layihəyə inanırdım. Bunu reallaşdıracağam. Mümkün qədər qələbə qazanmağa öz qatqımı verəcəyəm".

Portuqaliyalı mütəxəssis məşqçilər korpusunda azərbaycanlının təyin olunması haqda da söz açıb: "Bu məsələ ilə bağlı düşünürük. Bu işi İlqar Qurbanova həvalə etmişəm. Bunun olması komanda üçün önəmlidir. Təkcə Azərbaycan dilində danışmağı kifayət etmir".

O, 2026-cı ildə Portuqaliya millisi ilə Estoniya üzərində 7:0 hesablı qələbəsinə baxmayaraq, Azərbaycan millisi ilə məğlub olduğundan danışıb: "Sizcə normal deyil? Portuqaliyanın həmin dönəmdə 7:0 hesablı qələbəsi kifayət qədər normaldır".

F. Santuş millimizdəki işi uğursuz alındığı təqdirdə, digər bura gələn əcnəbi məşqçilər kimi komandanı günahlandırmayacağını bildirib: "Eynisi deməyəcəyəm. Bu işlətdiyiniz ifadəni heç vaxt istifadə etməyəcəyəm. Yəni "mümkün deyil" ifadəsi. Həqiqətdir. Bu cür mesajlar futbolçulara da ötürülə də bilməz. Mən öz xarakterimə bələdəm. Məsuliyyəti öz üzərimə götürürəm. Əgər 2-3 ildən sonra verdiyim vədlər boşa çıxsa, yenə də məsuliyyəti özüm daşıyacağam. İstənilən halda, bu vəziyyət olarsa, federasiyadan, azarkeşlərdən üzr istəyəcəyəm. Ancaq deməyəcəm ki, bu komanda ilə alınmır. 2028-ci ilə qədər müqaviləm var. Milli komandanın çıxış etdiyi bütün turnirlərdə baş məşqçi kimi bütün məsuliyyət məndədir. Əgər 2028-ci ilə qədər hansısa vəziyyətdə AFFA qərar versə ki, yolumuza davam etməyəcəyik, Azərbaycan haqda bundan sonra belə, heç bir mənfi təəssüratım ola bilməz. Öz xarakterimə bələdəm".

Mütəxəssis millinin hazırkı durumunda hər kəsin günahı olduğunu qeyd edib: "Hər kəsin öz payı var. Çünki qələbə də birlikdədir, uğursuzluq da. Hazırkı vəziyyətdə onsuzda çətin vəziyyətdir. Kiminsə boynuna yıxmaq düzgün olmazdı. Qələbə qazandığımız halda da, AFFA-nın, futbolçuların, məqçilərin, Azərbaycanın qələbəsidir. Bəzən problemlər qaçılmaz olur. Buna görə məyusuq. Qələbə qazanırsansa, birlikdə edirsən, uduzursansa da, birlikdədir. Dostum var idi, mənə bir söz demişdi, heç vaxt günahı başqalarının boynuna yıxma. Hər biri öz günahımızdır. Beş barmağın var, hansına deyə bilərsən ki, günah hansındadır? Yuxarıda hər şeyi Allah görür".

Qeyd edək ki, Azərbaycan - Slovakiya oyunu sabah saat 20:00-da Tofiq Bəhramov adına Respublika stadionunda keçiriləcək.