"Mahir orada kola və fanta da içə bilərdi"

"Mahir orada kola və fanta da içə bilərdi"
XƏBƏR 30 Oktyabr 2021 / 12:52 3945
-  A +

"Futbolçumuzun gündəmə gətirilməsi müsbət haldır.

Polşada futbola və futbolçulara ictimai nəzarət çox yüksəkdir. Həm media, həm də azarkeşlər tərəfindən futbolçular izlənilir. Bu gün Mahirin üzərində nəzarət olması, gündəmə gətirilməsi müsbət haldır. Çünki onunla hesablaşırlar, o, ad salıb ki, onunla belə maraqlanırlar". 

Bu sözləri tanınmış idman yazarı Aydın Bağırov yenisabah.az saytına millimizin hücumçusu Mahir Emreli barədə son vaxtlar Polşa mediasında yayılan neqativ xəbərlər haqda danışarkən deyib. Əməkdar jurnalist deyib ki, Mahir Emreli ilə bağlı xəbərləri yaxından izləyir: "Lakin məni təəccübləndirən yoldan keçən hər bir insanın belə Mahir haqqında olan tənqidi fikirlərinin yerli mediamızda tirajlanmasıdır. 

Belə yanaşmalardan və mövqedən qaçmaq lazımdır. Çünki Mahir Emreli bizim medianı yaxından izləyir. Onun öz vətənindən belə münasibət görməsi, Mahiri ruhdan sala və psixologiyasına təsir edə bilər.

Mən həmkarlarımı belə məlumatlardan qaçmağa çağırıram. 

O ki qaldı içki masasına, gecə klubunda çəkilən bir şəkil onun spirtli içki içməsi anlamına gəlmir. Orada kola və ya fanta da içə bilər. Ümumiyyətlə, məlum deyil ki, bu şəkil nə vaxt çəkilib. Oyundan əvvəl ya sonra bunu araşdırmaq lazımdır.

Əgər oyundan sonra bir futbolçu gedib gecə klubunda dincəlirsə, cüzi dərəcədə spirtli içki içirsə, burada təəccüblü heç nə yoxdur. Çünki futbolçu daim oyun gərginliyi içərisində olur. Onlara qadağalar qoyulur. Komandanın təlim məşq toplanışında olur və ya evdən çölə çıxmır. Futbolçunun uğur qazandığı oyundan sonra gedib stress atması, təəccüblü deyil. O da bizim kimi bir insandır. Əylənmək, nədənsə zövq almaq hüququ var. Əlbəttə, bu, aşırı dərəcədə olmamalıdır”.

Bağırov futbolçunun ulduz xəstəliyinə tutulub-tutulmaması haqqında da danışıb:

“Mahir ulduz xəstəliyinə tutulmayıb. Mətbuatda yayılan şəkil avqust ayında çəkilib. Avqust ayından sonra Mahirin kifayət qədər yaxşı oyunları olub. “Lester” kimi komandaya qol vurub, “Legiya”da yaxşı nəticələr göstərib. Mahirin oyununda geriləmə olduğunu düşünmək nöqsanlı yanaşmadır. Mahir öz üzərində daima çalışır, fiziki baxımdan çox yaxşı vəziyyətdədir. Heç kim təminat verə bilməz ki, hücumçular hər oyun qol vurmalıdır. 

Polşa kimi ölkələrdə oyunçu üzərində nəzarət güclü olur və  tələbləri yüksəkdir. 

Mahir bu günə qədər uğurlu çıxış edib, bundan sonra da uğurla davam edəcək. Qarşısına hədəf qoyub və o hədəfə doğru inamla irəliləyir.  Mahir XXI əsr azərbaycanlı legionerlər arasında ən uğurlusudur”.


Son xəbərlər
topaz banner