Rəşad Əhmədov: “Keçmişdən nəyisə dəyişmək istəsəydim…”

Məşhur idmançımız Rəşad Əhmədov bu gün 34 yaşını qeyd edir. Bu münasibətlə Qol.Az-ın əməkdaşı Azərbaycan taekvando məktəbinin istedadlı nümayəndələrindən olan Rəşaddan müsahibə alıb.

- Əvvəlcə ad gününüzü təbrik edirik.

- Təşəkkür edirəm. Bu il əvvəlkinə nisbətən daha çox təbrik aldım. Ad günümü valideynlərimlə bir yerdə qeyd edirəm. Yəqin ki, sabah da dostlarımla qeyd edəcəm.

- Keçmişi necə xatırlayırsınız?

- Məncə, hər şey normal keçib. İdmanda istəyimə tam nail ola bilməsəm də, pis nəticələrim olmayıb.

- İstəyiniz nə idi ki?

- Hər bir idmançı kimi mən də olimpiya medalını qazanmaq istəyirdim. Təəssüf ki, alınmadı.

- Ümumiyyətlə, karyeranız necə keçib?

- Düzü, karyeramı çox uğurlu saymıram. Azərbaycan taekvandoçuları arasında ilk dəfə olimpiya lisenziyasını mən qazanmışdım. İlk olimpiya medalını qazanmaq üçün də yaxşı imkanım vardı. Amma nə qədər çalışsam da, o medalı qazana bilmədim.

- İmkanınız olsa, keçmişdən nəyi dəyişmək istərdiniz?

- Xüsusi dəyişmək istədiyim bir şey yoxdur. Hər şey qaydasındadır. Sadəcə, yenə də qeyd edirəm, çox istərdim karyeramda olimpiya qızılı olsun.

                               

- Karyeranızda ən təəssüfləndiyiniz döyüşünüz hansı olub?

- 2004-cü il Afina Yay Olimpiya Oyunlarında türk idmançı ilə döyüşümü hələ də unuda bilmirəm. Döyüş heç-heçə bitsə də, hakimlərin qərəzli mövqeyi məni finaldan etdi. Həmin vaxt indiki kimi “Qızıl xal” olmadığından hakimlər qələbəni rəqibə verdilər. O zaman 22 yaşım vardı. Olimpiya qızılı mənimçün böyük uğur olardı. Həmin döyüş məni çox heyfsləndirdi.

- Xatırlayıram, 2008-ci il Pekin Yay Olimpiya Oyunlarına yola düşəndə açıqlama vermişdiniz ki, Afinada buraxdığım səhvləri Pekində etməməyə çalışacam. Amma yenə qızıl qazana bilmədiniz.

- Pekin olimpiadasına yaxşı hazırlaşmışdım. Yaxşı da formada idim. Amma olimpiadaya 2 ay qalmış dizimdən zədə aldım. Hətta yarışda iştirak etməyim də sual altında idi. Bütün planlarım alt-üst olmuşdu. Təvəkkül Bayramov məni əvəzləyə bilərdi olimpiadada. Amma o da əməliyyat olunduğundan hazırlaşıb özüm getməli oldum. Pekində mən yalnız təcrübəm hesabına döyüşə bildim.

- Ən güclü zərbəni kimdən almısınız?

- İran idmançısı Hadi Saiddən. Onunla iki dəfə döyüşmüşəm. Hər iki döyüşdə zərbələrindən əlim sınıb.

- Bəs, ən ağır zərbəni kimə endirmisiniz?

- Taekvando ayaqla boksdur. Zərbələr hər zaman təhlükəli və güclü olmalıdır. Ona görə bu suala rəqiblərim cavab versələr daha yaxşı olar.
 
- Dediniz ki, bizim vaxtımızda taekvando indikindən fərqli idi. İndiki idmançılarımızın uğurları sizi qane edir?

- Hamımızın istəyi budur ki, taekvando yaşasın və idmançılarımız Azərbaycan bayrağını zirvələrdə dalğalandırsın. Düşünürəm ki, ötən il də yaxşı nəticələr əldə etdik. İdmançılarımız həm 1-ci Avropa oyunlarında uğurlu çıxış etdilər, həm də dünya kubokuna sahib çıxdılar.

Ergün SEYİD

Redaksiyadan: Qol.Az saytının kollektivi Rəşad Əhmədovu doğum günü münasibəti ilə təbrik edir, ona işlərində yeni-yeni uğurlar və möhkəm cansağlığı arzulayır.