Aslan Kərimov: "Qarabağ" səfərdə qol vuracaq"

Milli komandamızın məşqçisi Aslan Kərimov  "Qarabağ" və "Neftçi"nin avrokuboklardakı çıxşlarını dəyərləndirib.

"Qarabağ"ın sabiq kapitanı Qol.Az saytına açıqlamasında əvvəlcə Ağdam klubunun Çempionlar Liqasının III təsnifat mərhələsinin "Zalsburq"la ilk oyunu (2:1) haqda danışıb:

"Qarabağ" əzmkar qələbə qazandı. Komandamızın iki futbolçusu qırmızı vərəqə almasaydı, mərhələ adlamaq şanslarını yüksək qiymətləndirərdim. Rəqib nə qədər güclü olsa da, "Qarabağ"ın hücum xəttində potensial var idi ki, cavab matçında bir qolla  oyunun taleyini həll etsin. Qırmızı vərəqələrin olması hücum və müdafiə xəttimizi bir az çətinə salacaq. Amma "Qarabağ"ın mərhələ adlayacağına 70 faiz inamım var. Komandamıza bir qol lazımdır ki, "Zaslburq"un işini ikiqat çətinə salsın. İnanıram ki, bu qolu vura biləcəyik. Hansı yolla olur-olsun "Qarabağ" səfərdə bir qol vuracaq. Komandamız buna qadirdir”.

Millimizin sabiq futbolçusu "Zalsburq"un oyununu yüksək qiymətləndirməklə yanaşı "Qarabağ"ın mərhələ adlayacağına inadığını bildirib: "Yəqin bütün azarkeşlər də gördülər ki, "Zalsburq" elə-belə komanda deyil. Müasir futbola üstünlük verirlər. Bütün futbolçular Avropa səviyyəlidir. Bakıdakı qarşılaşmada gördük ki, "Qarabağ"ı çox yaxşı analiz ediblər. "Zalsburq"un baş məşqçisinin "Qarabağ" - "Valletta" matçını canlı izləməsi komandamıza necə ciddi yanaşdıqlarını göstərir. "Zalsburq"un peşəkarlığını göstərən bir cəhət də odur ki, "Qarabağ"ı çox düzgün analiz etmişdilər. Fikir verdinizsə, "Qarabağ"ın top saxlamağına imkan vermirdilər. Top bizim futbolçularda olanda dərhal rəqib pressinq edirdi. Onu da deyim ki, "Zalsburq" "Qarabağ"ı nə qədər düzgün analiz etsə də, sürətli hücum qarşısında aciz qaldı. Onlar bilirdilər ki, Reynaldo öz texnika və sürəti ilə hücumda təhlükəlidir. Ancaq yenə də onun qarşısını ala bilmədilər. Düşünürəm ki, cavab matçında Reynaldonu iki futbolçu əvəz edə bilər. Bunlar Vüqar Nadirov və Muarem Muarem ola bilər. Qurban Qurbanovun oyundan sonrakı açıqlamalarından hiss olundu ki, Vüqarın hazırkı formasından çox razıdır. Zənn edirəm ki, cavab görüşündə hücumun sivri ucunda Vüqar Nadirov çıxış edəcək. Vüqar da sürətdə Reynaldodan geri qalmır. Qeyd etdiyim kimi, komandamız müdafiədə diqqətli olsa, mütləq bir neçə qol imkanımız da olacaq. Bu imkanlardan birini qola çevirə bilsək, demək olar ki, mərhələni adlamış sayılacağıq.

Düşünürəm ki, cavab matçında  müdafiəçilərimiz hücuma bir qədər az qoşulacaqlar. Çünki rəqib bu mövqedəki boşluqlardan daha tez istifadə etməyi bacarır. Bu isə o demək deyil ki, hücuma getmək olmaz. Sözsüz ki, qolsuz  heç-heçə "Qarabağ"a sərf edir. Ancaq bir qol buraxsaq, ÇL-da mübarizəni dayandıracağıq. Məncə, Qurban Qurbanov müdafiədə diqqətli olmaq, boşluq yaratmamaq və imkan olduqca sürətli əks-hücuma keçmək taktikasını seçəcək. Məncə, müdafiənin mərkəzində Rəşad Sadıqov çıxış edəcək. Çünki başqa alternativ yoxdur. Belə olan halda "Qarabağ"ın işi bir qədər də asan olacaq. Çünki Rəşadın müdafiədən hücuma ötürmə vermək qabiliyyəti çox yaxşıdır. Əgər "Qarabağ" topu bir qədər özündə saxlaya bilsə, həm oyunun tempinə nəzarət edəcəklər, həm də istədikləri vaxt hücum edəcəklər. İstənilən halda "Qarabağ"ın mərhələ keçəcəyinə inanıram. Ən azından səfərdə bir qol vura biləcəyik".  

A.Kərimov "Neftçi"nin Avropa Liqasının III təsnifat mərhələsinin "Çixura" ilə ilk oyunu (0:0) haqda da fikirlərini bildirib. O, komandamızın ilk oyunda zəif təsir bağışlamasına baxmayaraq mərhələni keçəcəyinə inandığını vurğulayıb: "Neftçi" yenə də qeyri-stabil oyun nümayiş etdirir. "Koper"lə cavab oyunu ilə müqayisədə dünənki qarşılaşmada "Neftçi" xeyli zəif təsir bağışladı. Həmin aqressivlik "Neftçi"də yox idi. Hücum xətti dişsiz görünürdü. Bununla belə, "Çixura" "Neftçi" üçün çətin rəqib ola bilməz. Düşünürəm ki, komandamız səfərdə asanlıqla qalib gəlib, mərhələni adlayacaq".