“Qarabağ”ın fəlakətli bəxtsizliyi - Avropa belə şey görməmişdi

Cümə axşamı Avropa Liqasının pley-off mərhələsinin cavab oyunları keçirilib. Bundan sonra 1/8 finala yüksələn 16 komandanın hamısı bəlli olub. Və bu klubların siyahısına baxsanız...

Azərbaycan çempionu "Qarabağ" hazırkı Avropa Liqasında iştirakını hələ yanvarın 30-da başa vurmuş və pley-offa çıxmaq şansını daha erkən itirmişdi. Qurban Qurbanovun komandası turniri sonuncu - 36-cı yerdə bitirmişdi. Bundan sonra “Qarabağ” kifayət qədər tənqidlə üzləşdi. Aralarında haqlı olanları da vardı. Amma indi bir məqamın üstündən keçsək, ədalətsizlik olar. Çünki bu, ağdamlıların cari Avropa Liqasındakı çıxışı ilə birbaşa bağlı məsələdir.

Beləliklə, 1/8 finalda çıxış edəcək komandalara nəzər salaq. 

Bu mərhələdə yarışacaq 16 klubdan altısı (!) “Qarabağ”ın rəqibi olub. Liqa mərhələsinin səkkiz turundan sonra ilk səkkizlikdə yer alanlar sırasında İngiltərənin “Tottenhem” (4-cü yer), Fransanın “Lion” (6-cı yer) və Yunanıstanın “Olimpiakos” (7-ci yer) komandaları olub. Norveçin “Bodo-Qlimt” (9-cu), Rumıniyanın FCSB (11-ci) və Niderlandın “Ayaks” (12-ci) klubları isə “səkkizliyə” düşməyə çox yaxın idi. Norveç və Rumıniya təmsilçiləri yalnız top fərqi daha pis olduğuna gör ilk səkkizlikdə yer ala bilmədilər.

“Bodo-Qlimt”, FCSB və “Ayaks” cümə axşamı günü pley-off mərhələsini (şərti olaraq 1/16 final) uğurla keçdi. Onların məğlub etdiyi komandalar müvafiq olaraq Niderlandın “Tvente”, Yunanıstanın PAOK və Belçikanın “Yunion” klubları idi.

“Qarabağ”ın yarışdığı 8 komandadan cəmi ikisi çıxışını başa vurub. Bunlar İsveçin “Malmö” və “Elfsborq” klublarıdır. Onlar 1/16 finala yüksələ bilməyiblər.

Bir daha vurğulayaq: “Qarabağ” Avropa Liqasının 1/8 finalına yüksələn 16 komandadan altısı ilə oynayıb!
İndi gəlin görək daha kimin bu qədər çox rəqibi 1/8 finala qədər gəlib. Heç kimin!

Avropa Liqasının əsas mərhələsini Romanın “Latsio” komandası 1-ci yerdə başa vurub. İtalyanlar sonradan 1/8 finala yüksəlməyi bacaran komandaların yalnız ikisi ilə qarşılaşıb.

Türkiyə təmsilçisi "Qalatasaray" üç belə komanda ilə qarşılaşıb. İstanbullular cümə axşamı Niderland təmsilçisi “AZ Alkmaar”ı keçə bilməyərək Avropa Liqasını tərk ediblər. Avrokuboklarda qalan yeganə Türkiyə təmsilçisi “Fənərbaxça” isə 1/8 finalın yalnız 4 komandası ilə üzə-üzə gəlib. 

“Qarabağ” isə altı komanda ilə!

Azərbaycan çempionu səkkiz turda cəmi 3 xal toplaya bilib. 35-ci yeri tutan Fransanın "Nitsa" komandası da eyni xalı yığlb. Onlar 1/8 finalın gələcək dörd iştirakçı ilə qarşılaşıb.  Eyni vəziyyət 34-cü yerdə olan Kiyev “Dinamo”su üçün də keçərlidir.

Xeyr, biz bu statistika ilə “Qarabağ”ın bumövsümkü uğursuz çıxışına haqq qazandırmırıq. Komanda zəif oynadı və inanmaq istərdik ki, Qurban Qurbanov uğursuzluğun əsl səbəblərini dərindən öyrənəcək. Lakin bununla yanaşı, Azərbaycan klubunun, artıq qeyd edildiyi kimi, rəqibləri ilə bağlı fəlakətli bəxtsizliyi də yaşanıb. Onlardan altısı avrokubok mövsümünə mükəmməl hazırlaşmışdı. “Qarabağ”dan fərqli olaraq…

(haqqın.az saytından tərcümə ilə)