“Həm rəqibə qarşı hazırlaşırıq, həm də qərəzli hakim qərarlarına qarşı”

“Həm rəqibə qarşı hazırlaşırıq, həm də qərəzli hakim qərarlarına qarşı”
XƏBƏR 12 May 2024 / 14:12 1920
-  A +

"Zirə"nin futbolçusu Anar Nəzirov Misli Premyer Liqasının 34-cü turunda "Qarabağ"a 0:1 hesabı ilə uduzduqları matçdan sonra jurnalistlərə açıqlama verib. 

QOL.az xəbər verir ki, 38 yaşlı qapıçı əvvəlcə oyun barədə fikirlərini bölüşüb: ”Qarabağ”ın keyfiyyətinə və oyununa söz ola bilməz. O haqda danışmaq bizə düşmür. Gördünüz ki, onlara qarşı "Zirə" necə mübarizə apardı. Son illər "Qarabağ"ın əsas heyətinə qarşı belə oyun görmüşdünüz? Hakimlərdən danışmaq istəmirəm. O epizoda penalti verilirsə… Onda hər epizoda penalti verilməlidir. Orda təmas olmalıdır. Durub keçdiyinə baxası deyil ki. Penalti gözləmirdim. Olmayan şeyi necə gözləyim? Neçə dəfələrlə başımıza gəlir. Bizi sındıra bilməzlər. Kim nə edir, etsin. Biz elə bir kollektivik ki, sona kimi döyüşəcəyik. İnşallah, avrokuboklara gedəcəyik. Penaltini çıxarsaydım lap əla olardı. Amma olmadı”.

O, uzun müddət sonra əsas heyətə qayıtmağı barədə də danışıb: “Komanda elədir ki, uyğunlaşma problemi olmur. Mənim də az yaşım yoxdur. Az da olsa, təcrübəm var. Komandanın vuruşacağına heç şübhə yox idi. Bir il oynayıb-oynamamağım rol oynamır”.

A.Nəzirov “Penaltinin fasilədəki söhbətə necə təsiri oldu?” sualına belə cavab verib: “Bizim başımıza onsuz hər dəfə belə şeylər gəlir. Biz də öyrəşmişik. Həm rəqibə qarşı hazırlaşırıq, həm də qərəzli hakim qərarlarına qarşı. Bu, bizə motivasiya verir”.

O, yayda bitəcək müqaviləsi haqda qərar vermədiyini qeyd edib: “Mən bu günlə yaşayan adamam. Elə bir qərarı bu dəqiqə demək çətindir. Qalıb-qalmayacağım barədə nəsə demək çətindir. Kubok matçından sonra açıqlanacaq. Qarşıda oyunlar var deyə belə qərar vermək düzgün deyil. Bu dəqiqə elə bir qərardan söhbət gedə bilməz. Bizim hədəfimiz ölkə kuboku və avrokuboklara vəsiqə qazanmaqdır. Hamı bir nəfər kimi bunun üçün çalışır”.

Daha çox


Son xəbərlər
topaz banner