Qrup formatında sonuncu Çempionlar Liqası 

Qrup formatında sonuncu Çempionlar Liqası 
ÇEMPİONLAR LİQASI 19 Sentyabr 2023 / 15:00 5530
-  A +

Bu gün Çempionlar Liqasında qrup mərhələsi başlayır.

Qol.az xəbər verir ki, bu, ÇL-in indiki formatda sonuncu yarışı olacaq. Növbəti - 2024/25 mövsümündən başlayaraq ÇL-də qrup mərhələsi ləğv ediləcək, "İsveçrə sistemi"nə bənzər vahid liqa yaradılacaq, komanda sayı 32-dən 36-a yüksələcək.

UEFA-nın daha öncədən yaydığı xəbərə görə, bununla bağlı qərar Avropa Klublar Birliyi (ECA) ilə razılaşdırılmaqla qəbul olunub. Yeni formata əsasən, komandalar mövcud sistemdəki kimi, 3 rəqibin hər biri ilə 2 matç olmaqla 6 oyun deyil, 8 fərqli klubla qarşılaşacaq ki, bunlardan da 4-ü evdə, 4-ü səfərdə keçiriləcək. 1-8-ci yeri tutan komandalar 1/8 finala birbaşa vəsiqə qazanacaqlar. 9-24-cü yeri tutanlar isə həmin mərhələyə yüksəlmək üçün 2 matçdan ibarət "pley-off" oyunları keçirəcəklər.

ÇL-də 4 əlavə yerdən 1-i UEFA reytinqində 5-ci olan ölkənin liqasında üçüncü yeri tutana, əlavə bir yer təsnifat mərhələsində Çempionlar Yolunun iştirakçısına ayrılacaq. Daha iki vəsiqə isə Avropa kuboklarından öncəsi mövsümdə daha yaxşı nəticə göstərmiş 2 ölkənin təmsilçilərinə ayrılacaq. Bu zaman onların özlərinin, təmsil etdiyi ölkələrin daha əvvəlki illərdə Avropada göstərdiyi nəticələr də nəzərə alınacaq. 

Qeyd edək ki, yeni mövsümdən bənzər format Avropa Liqası və Konfrans Liqasında da tətbiq olunacaq. Orada da eyni sistem olmaqla qruplar ləğv ediləcək, 36 komanda olmaqla vahid liqa yaradılacaq.


Son xəbərlər