"Nə vaxtsa Polşa klubu "Qarabağ"ı udmalı idi"

"Nə vaxtsa Polşa klubu "Qarabağ"ı udmalı idi"
ÇEMPİONLAR LİQASI 2 Avqust 2023 / 22:46 6593
-  A +

"Komandamı təbrik edirəm. Gözəl nəticə oldu. Bu gün daha çox müdafiədə özümüzü göstərdik”.

Qol.az xəbər verir ki, bunu “Rakov”un baş məşqçisi David Şvarqa Çempionlar Liqasının 2-ci təsnifat mərhələsinin cavab oyunları çərçivəsində Bakıda “Qarabağ”a qarşı keçirdikləri matçdan (1:1) sonra deyib. 

İlk görüşdə qələbə qazandığı üçün (3:2) mərhələ adlayan "Rakov"un 33 yaşlı mütəxəssisi komandasının dözümlü olduğunu bildirib: “Futbolda dözmək və dözümlü olmaq çox vacibdir. Mənim komandam və oyunçularımız çox gözəl oynadı. Həm fiziki, həm mental cəhətdən yaxşı idi. Komandama təşəkkür edirəm”.

O, futbolçularının meydanda uzanaraq vaxt uzatmaları barədə verilən “Gələn mövsüm istirahət üçün BOS-a gəlmək istəyirsiz?” sualını belə cavablandırıb: “Dincəlmək bizə kömək edəcəksə, əlbəttə, niyə də yox?”

“Rakov”un çalışdırıcısı “Qarabağ”a qarşı oynamağın çətinliyi barədə deyib: “Oyunun birinci hissəsində biz özümüzü yaxşı göstərdik. "Qarabağ" cərimə meydançasına daxil olanda da, qapımızı müdafiə edə bildik. Cərimə meydançasındakı vəziyyəti nəzarət altında saxladıq. "Lex" "Qarabağ"dan 5 qol buraxmışdı. Bizdə isə bu cür olmadı”.

Şvarqa "Qarabağ"ı mübarizədən kənarlaşdıran ilk Polşa klubunun baş məşqçisi olmasına belə münasibət bildirib: “Nə vaxtsa, belə olmalıydı, nə vaxtsa Polşa klubu "Qarabağ"ı udmalıydı. Şadam ki, qalib biz olduq. Bu o demək deyil ki, "Qarabağ" zəifdir. Onlar güclü və təcrübəli komandadır”.

Daha çox


Son xəbərlər