Bizim və sizin İlkin

Gözlərdə bir ümid, qəlblərdə bir inam

“Mənim yeganə güvənc yerim onlardır - camaatım! Hətta bu insanlara seçici deyəndə mənə qəribə gəlir. Çünki mən onlara indiyədək yerlim, kəndçim, qohumum, demişəm. Siyasət, seçki bizi dəyişə bilməz. Bir sifətimiz var, elə də qalacaq!

Eynən Şabranla Siyəzənin təbiəti kimi: Dağlarımız kimi vüqarlı, Xəzərimiz kimi coşğun”.
İlkin deyir bunu. Bizim İlkin. Həm də sizin İlkin. Fevralın 9-dan sonra sizi Milli Məclisdə layiqincə təmsil edəcək Şəxs.

İlkin parlamentdə sizin səsiniz olacaq. Buna qətiyyən şübhə etməyin. Bilirik, bir qədər inamsızsınız, çünki 20 ildir Sizi, Əlahəzrət seçicini Ali tribunada təmsil edən adam…sadəcə, susub. İllərlə yığılıb qalan problemlərinizi dilə gətirməyib. Parlament tribunasından səsləndirməyib. İlkin də elə həmin problemlərdən danışır. Bir ucu Siyəzəndən tutmuş Şabrana, Qəndoba, Ağalığa, Rəhimliyə, Uzunboyada, Zeyvəyə, Çölquşçuya, Padar, Şahnəzərli, Pirəmsənə qədər hər yerdə.

Nəinki kəndbəkənd, küçəbəküçə, qapı-qapı gəzdi bu günlərdə İlkin, 54 saylı Siyəzən -Şabran seçki dairəsinin ərazisini. Gözlərdə bir ümid gördü, qəlblərə bir ümid verdi. Həqiqi millət vəkilinin necə olacağı ümidini.

“Məqsədim parlamentdə xalqın səsi olmaqdır”, dedi İlkin. Və yerdən səslər eşitdi – “Səsimiz Sənindir”.

Hə, bu dəfə Siyəzən və Şabran öz millət vəkilini öz içindən seçəcək. Şimalın gözü indi ondadır. Ümumiyyətlə, 54-cü dairədə maraqla gözlənilir seçkilər. İlkinlə görüşdə Şabranın Şahnəzərli kənd sakininin dediyi yadıma düşdü: “Biz hər seçkidə namizəd görürük, deputat yox”. Amma həmin gün qarşılarında onları parlamentdə layiqincə təmsil edəcəyi heç kimdə şübhə doğurmayan cavan oğlan durmuşdu: İlkin Fikrət oğlu Xəlilov.

İlkin kənar adam deyil, şabranlıdır, Aygünlüdəndir. Bu yerlərin problemlərini, insanların hansı qayğılarla yaşadığını da gözəl bilir. İlkin həm də problemlərin həlli yollarını da göstərir. İnamlıdır. Bilirsinizmi niyə? Çünki bu problemlərin həlli o qədər də çətin deyil. Yetər ki istək ola. Bu torpağa, bu insanlara. Gerisi çox asandı. İlkini elə ilk gündən seçicilərə istədən də bu inam, hə, bir də səmimiyyəti oldu.

Təhminə nənə bilirsinizmi nə dedi Ağalıq kəndində keçirilən görüşdə? “Gündə bir deputat gəlir, nağıl danışıb, gedir” deyə, gəlib oturdu zalda qabaq sırada. Sonra gördü ki, qarşısındakı hələ deputat yox, namizəddi, nağıl da danışmır, ayrılanda qucaqlayıb öpüb getdi də İlkini. Özüylə bərabər böyük bir ümid də apardı kasıb daxmasına. Və o ümidi fevralın 9-da cücərdəcək şübhəsiz sandıq başında.

Heç kimə sirr deyil ki, hər bir dairədən, eləcə də “54”dən məhz xalqın seçdiyi deputat ortaya çıxmalı, öz tribunasından, səlahiyyətlərindən istifadə edərək mexanizmi hərəkətə gətirməlidirlər.

Xalq ona görə bu kimi işləri deputatlara yükləyir ki, həm onlara əlləri daha tez çatır və ərkləri ötür, həm də onları daha yetkili instansiya sayır. İlkin hər görüşdə də elə bunu deyir: “Mən hər zaman əlçatan olacam. Təkcə Şabran və Siyəzəndə deyil, dairənin əksər iri kəndlərində qərargahımız olacaq. Bakıya ardımca gəlməyə də ehtiyac yoxdur. Yetər ki, qərargahımıza gələsiniz, anındaca yanınızda olacam” deyir bizim namizəd”

Bəs siz nə deyirsiniz, hörmətli şabranlılar, siyəzənlilər. Bircə gün, yarımca saatınızı ayırın, sizi ruhdan salan dedi-qodulara inanmayın, məntəqələrə gedin, ona səs verin. Bizim İlkinə, sizin İlkinə, İlkin Fikrət oğlu Xəlilova. Millətin gələcək vəkilinə…

Səbuhi MƏMMƏDLİ