1/8-də Meksika və Uruqvayın rəqibi Argentina və Cənubi Koreya olacaq

Cənubi Afrika Respublikasında təşkil olunan futbol üzrə 19-cu dünya çempionatında həlledici - üçüncü tura start verilib. Qol.Az-ın məlumatına görə, artıq həlledici xarakter daşıyan bu turda iki qrupun taleyinə tam şəkildə aydınlıq gəlib.
Öncə A qrupunda liderlər - Uruqvayla Meksika münasibətlərinə aydınlıq gətiriblər. Hamı bu kollektivlərin öz aralarında heç-heçə etməklə növbəti mərhələyə yüksələcəyini düşünsə də, belə olmayıb. Əksinə Uruqvay minimal hesablı qələbə sayəsində qrup lideri kimi 1/8-ə vəsiqəni rəsmiləşdirib. Lakin məğlubiyyətə baxmayaraq, Meksika da növbəti mərhələyə yüksəlib. Çünki qrupun digər matçında – Fransa – CAR qarşılaşmasında tərəflərdən heç biri böyükhesablı qələbə qazana bilməyib. Düzdü mundiala ev sahibliyi edən afrikalılar artıq ilk yarıda düşərgəsində ciddi problemlər yaşanan fransızların qapısına iki dəfə yol tapsa da, bundan artığına gücləri çatmayıb. Halbuki, artıq 26-cı dəqiqədən etibarən Fransa millisi azlıqda mübarizə aparıb. Əvəzində avropalılar fasilədən sonra hesab arasındakı fərqi azaltmağa nail olublar.
Afrika təmsilçisi qələbə qazanıb, xallarının sayını Meksikayla bərabərləşdirsə də, daha yaxşı top fərqinə malik amerikalılar 1/8-ə yüksəlib. Fransa və CAR isə mundialla vidalaşan növbəti komandalar olub. Yeri gəlmişkən, indiyə qədər dünya birinciliyinə ev sahibliyi edən komandalardan heç biri qrupda qalmamışdı və hamısı növbəti mərhələyə adlamışdı. CAR isə bu baxımdan tarixə düşdü.
B qrupunda isə Argentina Yunanıstan üzərində daha bir qələbə qazanmaqla qrupdan yüzfaizli nəticə sayəsində çıxıb. Digər oyunda qeydə alınan məhsuldar heç-heçə isə daha çox Cənubi Koreyanın işinə yarayıb. Nəticədə Nigeriya və Yunanıstan mundialla vidalaşıb. Qeyd edək ki, növbəti mərhələdə Argentina Meksikayla, Cənubi Koreya isə Uruqvayla qarşılaşacaq.

22 iyun

B qrupu

23:30. Nigeriya – Cənubi Koreya - 2:2

QOL: Uçe, 12 (1:0). Su Li, 38 (1:1). Yonq Park, 49 (1:2). Yakubu, 69-pen. (2:2).
Durban. Şəhər stadionu
Baş hakim: Oleqario Benkuerenka (Portuqaliya)
NİGERİYA: Enyeama, Odia, Yobo (Eşiejile, 46), Şittu, Afolabi, Yusuf, Etuhu, Obasi, Kanu (Martins, 57), Uçe, Yakubu (Obinna, 71).
CƏNUBİ KOREYA: Ryonq Yunq, Ri Ça, Hyunq Ço, Su Li, Pyo Li, Yonq Li, Yunq Ki (Kim Sunq, 87), Vu Kim, Sunq Park, Hun Yum (Nam İl, 64), Yonq Park (Sunq Yun, 90+2).

23:30. Yunanıstan - Argentina - 0:2

QOL: Demişelis, 77 (0:1). Palermo, 89 (0:2).
Polokueyn. Peter Mokaba stadionu
Baş hakim: Rövşən İrmatov (Özbəkistan)
YUNANISTAN: Tsorvas, Kirqiakos, Vintra, Papadopulos, Torosidis (Patsatoğlu, 54), Moras, Tsiolis, Papastatopulos, Karaqunis (Spiropulos, 46), Katsuranis (Ninis, 54), Samaras.
ARGENTİNA: Romero, Burdisso, Demişelis, Otamendi, K.Rodriqes, M.Rodriqes (Di Maria, 63), Bolatti, Veron, Messi, Milito (Palermo, 81), Aquero (Pastore, 77).

A qrupu

19:00. Meksika – Uruqvay - 0:1

QOL: Suares, 44 (0:1)
Rustenburq. Royal Bafokenq stadionu
Baş hakim: Viktor Kassay (Macarıstan)
MEKSİKA: Peres, Rodriqes, Salsido, Markes, Osorio, Torrado, Franko, Blanko (k) (Ernandes, 63), Moreno (Kastro, 57), Dos Santos, Quardado (Barrera, 46).
URUQVAY: Muslera, Luqano (k), Fusile, Viktorino, Kavani, Suares (Fernandes, 85), Forlan, A.Pereyra (Skotti, 77), Peres, Rios, M.Pereyra.

19:00. Fransa – CAR - 1:2

QOL: Xumalo, 20 (0:1). Mpela, 37 (0:2). Maluda, 70 (1:2)
QIRMIZI VƏRƏQƏ: Qurkyuff, 27.
Blumfonteyn. Fri Steyt stadionu
Baş hakim: Oskar Ruis (Kolumbiya)
FRANSA: Loris, Sanya, Qallas, Riberi, Qurkyuff, Sisse (Anri, 55), Pyer Jinyak (Maluda, 46), Skilaççi, Diarra (k) (Qovu, 82), Diabi, Klişi.
CAR: Jozef, Masilela, Mokoena (k), Nçonka (Qaksa, 55), Sibaya, Şabalala, Mpela, Pyenar, Parker (Nomvete, 68), Xumalo, Xuboni (Modise, 78).