Portuqaliya və İspaniya ilk qələbəsini qazandı, mundialda hokkey hesabı

Bu gün Cənubi Afrika Respublikasında təşkil olunan futbol üzrə 19-cu dünya çempionatında keçirilən növbəti oyunlarla ikinci tura tam şəkildə yekun vuruldu. Qol.Az-ın məlumatına görə, meydana ilk olaraq, G qrupunda mübarizə aparan Portuqaliya və Şimali Koreya milliləri çıxıb. İlk turda Kot d`İvuarla xalları yarı bölən Kriştiano Ronaldonun komandası bu dəfə nəhayət qələbə qazana bilib. Özü də portəgizlərin bu qələbəsi kifayət qədər inamlı alınıb. Məsələ burasındadı ki, ilk yarıda yalnız 1 qol vurmalarına baxmayaraq, fasilədən sonra coşan avropalılar Asiya təmsilçisinin daşını daş üstə qoymayıb. Rəqib qapısından 7 cavabsız top keçirməyə nail olan Portuqaliya millisi bununla həm 1/8 finala çıxmaq şanslarını artırıb, həm də hazırkı mundialın daha böyükhesablı qələbəsini rəsmiləşdiriblər. Qeyd edək ki, onlara qədər yalnız Almaniya 4:0 hesablı qələbəsi ilə öyünürdü.
H qrupunda isə ilk turda qələbə qazanan kollektivlər - Çili və İsveçrə milliləri münasibətlərinə aydınlıq gətiriblər. Daha üstün tərəf olan Çili yığması növbəti qələbəsini qazanmaqla qrup liderliyinə yüksəlib. Lakin bunda Avropa təmsilçisinin artıq ilk yarında etibarən azlıqda mübarizə aparması daha böyük rol oynayıb.
Günün son oyununda isə son Avropa çempionu İspaniya ilk qələbəsini Honduras üzərində rəsmiləşdirib. Lakin dubla imza atan David Vilyanın penaltidən daha bir qol vurmaq şansı olsa da, o, bundan yararlana bilməyib. Nəticədə Hondurasın mundialdakı çıxışını vaxtından öncə dayandırmasının dəqiqləşdiyini də vurğulayaq. Xatırladaq ki, onlara qədər Kamerunun son turdakı oyununun formal xarakter daşıyacağı dəqiqləşib.

21 iyun

H qrupu

23:30. İspaniya – Honduras - 2:0

QOL: Vilya, 17 (1:0). Vilya, 51 (2:0).
Vilya matçın 62-ci dəqiqəsində penaltidən yararlana bilməyib (kənara). 
Yohannesburq. Ellis Park stadionu
Baş hakim: Yuiçi Nişimura (Yaponiya)
İSPANİYA: Kasilyas, Pike, Puyol, Ramos (Arbeloa, 77), Kapdevilya, Alonso, Buskets, Navas, Xavi (Fabreqas, 65), Torres (Mata, 70), Vilya.
HONDURAS: Valyadares, Çaves, Fiqeroa, Mendosa, İsaqire, Palasios, Tursios (Nunes, 63), Quevara, Suazo (C.Palasios, 84), Espinoza (Velkom, 46), Martines.

19:00. Çili – İsveçrə - 1:0 

Qol: Qonsales, 75.
QIRMIZI VƏRƏQƏ: Behrami, 34.
Port Elizabet. Nelson Mandela stadionu
Baş hakim: Xəlil Əl Qəmdi (Səudiyyə Ərəbistanı)
ÇİLİ: Bravo (k), Ponse, İsla, Karmona, Sançes, Vidal, Suazo, Fernandes, Biusejur, Medel, Jara.
İSVEÇRƏ: Benaqlio, Lixşteyner, Bergen, Huggel, İnler, Frey (k), Nkufo, Behrami, Qriştinq, Fernandes, Ziqler.

1. Çili                          2          2          0          0          2-0       6

2. İspaniya                   2          1          0          1          2-1       3

3. İsveçrə                     2          1          0          1          1-1       3

4. Honduras                 2          0          0          2          0-3       0

G qrupu

16:30. Portuqaliya – Şimali Koreya - 7:0

QOL: Meyreleş, 29 (1:0). Simao, 53 (2:0). Almeyda, 56 (3:0). Tyaqo, 60 (4:0). Lyedson, 81 (5:0). Ronaldo, 87 (6:0). Tyaqo, 89 (7:0).
Keyptaun. Qrin Point stadionu
Baş hakim: Pozo Pablo (Çili)
PORTUQALİYA: Eduardo, Alveş, Karvalyo, Ronaldo (k), Mendeş, Simao (Duda, 74), Migel, Meyreleş (Veloso, 70), Almeyda (Lyedson, 77), Tyaqo, Koentrao.
ŞİMALİ KOREYA: Myonq Guk, Yonq Hyok (Sonq Çol, 75), Jun İl, Nam Çol (Kum İl, 58), Kvanq Çon, Yun Nam, Tae Se, Yonq Co (k), İn Quk (Yonq Yun, 58), Çol Cin, Yonq Hak.

1. Braziliya                  2          2          0          0          5-2       6

2. Portuqaliya              2          1          1          0          7-0       4

3. Kot d`İvuar             2          0          1          1          1-3       1

4. Şimali Koreya          2          0          0          2          1-9       0