"Təcrübə olmasa da, Avroliqa görmüş futbolçularımız var" – Rahid Əmirquliyev

"Təcrübə olmasa da, Avroliqa görmüş futbolçularımız var" –<b style="color:red"> Rahid Əmirquliyev</b>
MÜSAHİBƏ 9 May 2019 / 11:40 1940
-  A +

“Səbail”in kapitanı Rahid Əmirquliyev Qol.az-a müsahibə verib. Komandasının bu mövsümdəki çıxışını dəyərləndirən təcrübəli yarımmüdafiəçi ötən tur “Qarabağ”a 0:4 hesabı ilə uduzduqları oyuna da toxunub.

- Artıq “Səbail” bürünc medalları və Avroliqaya vəsiqəni təmin edib. Yəqin ki, kapitan olaraq, komandanın çıxışını qənaətbəxş sayırsınız...

- Çempionatı 3-cü yerdə başa vurmaq bizim üçün böyük nəticədir. Deyərdim ki, tək mən yox, klub rəhbərliyi də çıxışımızdan razıdır. Yeni yaranmış komandanın bürünc medal qazanması həm futbolçular, həm rəhbərlik, həm də azarkeşlər üçün nailiyyətdir.

- Mövsümün əvvəlində desəydilər ki, “Səbail” çempionatı 3-cü pillədə bitirəcək, inanardınız?

- Əlbəttə, çempionat başlayanda heç kim “Səbail”in üçüncü olacağına inanmırdı. Qarşımızda belə bir vəzifə də yox idi. Ancaq çempionatın gedişində göründü ki, “Səbail” bürünc medallar uğrunda oynamağa layiqdir. Özümüzə inandıq. Yaxşı heyətimiz var. Şükürlər olsun ki, axırda belə oldu.

- “Səbail” tarixində ilk dəfə Avroliqada çıxış edəcək. Avrokubok təcrübəsinin olmaması çıxışınıza nə dərəcədə təsir edə bilər?

- Təbii ki, gənc komandayıq, ilk dəfə avrokuboklarda çıxış edəcəyik. Təcrübə yoxdur. Amma bizdə Avroliqa görmüş futbolçular var. Ona görə də düşünürəm ki, təcrübəsizlik mane olmamalıdır. Düzdür, Avroliqa təcrübəsi olmayan futbolçularımız da çoxdur. Onsuz da hər şeyin ilki olur.

- Sizcə, avrokuboklarda uğurlu çıxış etmək üçün komandanın güclənməyə ehtiyacı var, yoxsa hazırkı heyət kifayət edəcək?

- Məncə, avrokuboklarda da uğurlu çıxış etmək üçün yaxşı heyətimiz var. Ancaq komandanı gücləndirsələr, daha yaxşı olardı. Bu, rəhbərliyə, məşqçilərə aid məsələdir. Ona görə qarışmaq istəmirəm. Sadəcə, öz fikrimi bildirirəm ki, güclənsək, Avroliqada da uğur qazana bilərik.

- Son turda “Qarabağ”a 0:4 hesablı məğlubiyyət barədə nə deyə bilərsiniz?

- Əlbəttə, böyük hesabla uduzduğumuza görə məyus olduq. İstəməzdik ki, belə olsun. Ancaq futboldur, istənilən nəticə ola bilər. "Qarabağ" layiqli qələbə qazandı.

- Mövsümün sonunda müqaviləniz başa çatır. Gələcəyiniz haqda nə düşünürsünüz?

- Çox güman ki, komandada qalacağam. Rəhbərliklə danışmışam. Sadəcə, məsələni rəsmiləşdirmək qalıb. Bu da 4-5 günə öz həllini tapacaq. Yeni müqavilə də 1 illik olacaq.

Elnur SALAHOV

 

Daha çox


Son xəbərlər
25.05.19  17:09

Ronaldo oynamayacaq