“İki həftə əvvəl “Qəbələ”ni tərifləyirdilər, indi “baltalayırlar”

“Qəbələ” klubunun qapıçısı Anar Nəzirovun Qol.Az saytına müsahibəsi

- Topaz Premyer Liqanın 22-ci turunda AZAL-a 1:6 hesablı məğlubiyyətə nə səbəb oldu?

- Bu məğlubiyyətdən sonra komandamız haqqında çox sözlər deyilir. Guya “Qəbələ”də futbol yoxdur.  Çoxları “Qəbələ”ni “baltalamağa” başlayıb. Halbuki, 2-3 həftə bundan qabaq hamı “Qəbələ”nin yaxşı oyunundan danışır, bizi tərifləyirdilər. Komandamızda gecəsini gündüzə qatan insanlar var. Hamımız çox çalışırıq ki, yaxşı nəticə qazanaq. Futbolda belə şeylər olur. Məğlubiyyətə hər cür bəhanə tapmaq olar. Amma qapıda mən durmuşamsa, gərək komandanı xilas edəydim. Komanda pis oynaya bilər. Amma əsas məsuliyyət qapıçının üzərinə düşür. Oyuna görə mən cavabdehlik daşıyıram.  Külək topun səmtini tez-tez dəyişirdi. Bunları bəhanə etmək istəmirəm. Ancaq işimizə əngəl olan amillərdir.

- Buraxılan altı qolda əsas kimin səhvi oldu?

- Deməzdim ki, AZAl güclü oynadı. Sadəcə, ikinci hissədə bizdə heç nə alınmadı. Qol buraxandan sonra komandamız “sındı”. Altı qol buraxmışamsa, mənim səhvimdən olub. Yenə deyirəm, məsuliyyəti üzərimə götürürəm.

- Ola bilərmi ki, gücünüzü “Qarabağ”la kubok oyununa saxlayırdınız?

- Bunu çoxları deyir. Amma qətiyyən belə deyil. AZAL-la oyuna çox ciddi hazırlaşmışdıq. Oyun bizim üçün vacib idi. Heç kim istəməz ki, qapısından altı top buraxsın. “Qarabağ”la oyunda hər kəs “Qəbələ”nin gücünü, AZAL-a  məğlubiyyətin təsadüf olduğunu görəcək.

- Hər halda kubok oyunlarına daha önəm verəcəyiniz təbiidir. Çünki avrokuboklarda iştirak etmək üçün ən yaxın yol kubok oyunlarıdır.

- Ramiz müəllim bizi hər oyuna elə kökləyir ki, sanki final matçına çıxırıq. Bizim üçün həm kubok, həm də çempionat oyunları önəmlidir. AZAL-la oyunda da qələbəyə köklənmişdik. Hər il belə sensasiyalı nəticə olur. AZAl “Qarabağ”a da altı qol vurmuşdu. Bu o demək deyil ki, “Qarabağ” zəifdir.

- Oyundan sonra Ramiz Məmmdəov sizinlə söhbət etdi?

- Özümüzə gəlmək üçün bizi bir günlük istirahətə buraxdı. Gərginliyi üzərimizdən atmaq üçün bu vacib idi. Yəqin ki, bu barədə söhbəti olacaq, öz iradlarını və tapşırıqlarını bizə bildirəcək. 

- Qarşıdan “Qarabağ”la kubok oyununuz gəlir. Oyunqabağı komandanızda ab-hava necədir? Psixoloji gərginlikdən çıxa bilmisiniz

- Yenə deyirəm Ramiz müəllim bizi oyuna elə hazırlayır ki, elə bil döyüşə çıxırıq. Psixoloji cəhətdən bizdə heç bir problem ola bilməz.

- Öz meydanınızda 1:1-lik hesab qeydə alınmışdı. Bu nəticəylə növbəti mərhələyə çıxmaq şanslarınızı necə görürsən?

- “Qarabağ” güclü komandadır. Ancaq “Qəbələ”də zəif deyil. Demək olar ki, eyni səviyyəli komandalardır.  Şanslarımızı bərabər görürəm. Bu oyuna daha ciddi hazırlaşırıq. AZAL-la oyundan yaxşı nəticələr çıxarmışıq. Bu görüşdə hər şeyin daha yaxşı olacağına inanırıq.

- “Qarabağ”la kubokun ilk oyununda meydana çıxmamışdın. Bu oyunda səncə Ramiz Məmmədov sənə şans verə bilər? Nəzərə alaq ki, AZAL-la oyunda səhvlərin çox olub.

- Ramiz müəllim oyun gününə qədər bizə start heyəti bildirmir. Ona görə də bu haqda nəsə deyə  bilmirəm. Futbolçularımızın hamısı start heyətdə oynamağa qadirdir. Bizdə sağlam rəqabət gedir. Kimin qapıda durmağının heç bir fərqi yoxdur. Əsas odur ki, komandamız qələbə qazansın.

Ramiq AĞAMƏMMƏDOV