“Barselona”nı Azərbaycana reklam üçün gətirmirik”

"Qəbələ" Futbol Akademiyasının direktor müavini Nail Kərimovun Qol.Az saytına müsahibəsi

- “Barselona”nın U-15 komandası Qəbələ kuboku turnirində iştirakını təsdiqləyib. Bu komandanı oyunlarını izlədikdən sonra onları turnirə çağırdınız, yoxsa  Kataloniya klubunun adına görə dəvət göndərmişdiniz?

- Hamı bilir ki, “Barselona” uşaq futbolu sahəsində dünyada birinci yerdədir. Əslində onların oyununa baxmağa ehtiyac yoxdur. Bu bir aksiomadır ki, “Barselona”nın uşaq futbolçuları da, nisbətən yaşlılara da dünyanın ən yaxşıları arasındadır. Ona Amma onu da deyə bilərəm ki, biz ötən ilin fevral ayında Barselonada olan vaxt  məşqçi heyətimizlə birgə “Barselona”nın oyununu izləmişik. O vaxt onlar U-14 komandasında oynayırdılar.

- Heyətində dünyanın ən güclü yeniyetmə futbolçularının cəmləşdiyi “Barselona”nın turnirdə iştirakı Azərbaycanın uşaq futboluna nə verə bilər?

- Fikrimcə, “Barselona”nın Azərbaycana gəlməyi təkcə uşaq futbolu deyil, ümumilikdə Azərbaycan futbolu üçün böyük hadisədir. “Barselona”nın əsas komandasını izləmək üçün dünyanın çox yerlərindən insanlar Barselonaya axışır. İndi isə onların 15 yaşlı futbolçuları Azərbaycana gəlirlər. Biz “Barselona”nın əsas və əvəzedici komandalarının, həmçinin  akademiyalarının aşağı yaş qrupunun oyunlarını izləmişik.  Rusiyada onlarla iki ay əvvəl eyni turnirdə iştirak etmişik. Onların bütün komandaları eyni sistemlə oynayır. Hətta “Barselona”nın doqquz yaşlı uşaqlarının oyununa baxanda belə sanki əsas komandaları oynayır. Bu mənada, ın oyununu izləmək həm zövqlüdür, həm də “Barselona”nın yeniyetmə futbolçularının oyununa baxmaq   Azərbaycanın yeniyetmə futbolçuları üçün böyük məktəbdir. Onlardan öyrəniləsi çox şey var.

- “Barselona”nı Azərbaycana dəvət etməyinizin həm də reklama hesablandığını söyləmək olar?

- “Barselona”nın Azərbaycana gəlməyi Azərbaycan futbolu və “Qəbələ” klubu üçün reklamdır. Amma biz hansısa addımı reklam görə atmırıq. 2005-ci ildən qurulan klubumuz indiyədək nəyisə özünüreklam xatirinə etməyib. Bu, mətbuatda da dəfələrlə qeyd olunub. “Barselona”nın bura çağrılmağı da qətiyyən reklama hesablanmayıb. Fikrimiz turniri daha keyfiyyətli keçirmək, ən yaxşı komandaları bura dəvət etməkdir ki, o komandalarla qarşılaşmaq şansı əldə edək . Çünki səviyyəli komandalarla oynamaq bizim futbolçularımız üçün böyük təcrübədir.

- Turnirə yerli klublardan hansıları dəvət etmisiniz?

-Ötən il “Qarabağ”ı dəvət etmişdik.  Bu il “Bakı” klubunu çağırmışıq. Onlar da uşaq futbolunun inkişafı istiqsmətində böyük iş görür, sərmayələr yatırır. Bu gün “Atletiko” ilə əməkdaşlıq etmək böyük hadisədir. Buna görə də hesab edirik ki, “Bakı” bu turnirdə oynamağa layiqdir.

- Qəbələ Futbol Akedemiyası Avropanın bir sıra futbol akademiyaları ilə əməkdaşlıq edir. Gələcəkdə sıx əməkdaşlıq edəcəyiniz klublar sırasında “Barselona”nı da görmək mümkün olacaq?

-“Barselona” artıq bir ildən artıqdır ki, bizim klubla əməkdaşlıq edirr. Ötən il “Barselona”lı məşqçilər Qəbələdə ongünlük kursda oldular. Ötən ilin fevralında Barselonaya gedib bir həftə orada qaldıq, “Barselona”nın oyunlarında, məşqlərində iştirak etdik, yerli məşqçilərlə fikir mübadiləsi apardıq. Onların Azərbaycana gətirilməsi də bu əməkdaşlığın tərkib hissədir. Bundan sonra da əməkdaşlıq bu səpkidə davam edəcək.

- Artıq yarışda iştirak edəcək bütün komandaların adları dəqiqləşibmi? Dəqiqləşibsə, bunlar hansı komandalardır?

- Hələ ki, beş klub iştirakını rəsmən təsdiqləyib. Bunlar “Zenit”, “Beşiktaş” “Barselona”, “Bakı” və “Qəbələ”dir. Üç komanda qalır ki, onlar hələ dəqiqləşməyib. Dəqiqləşəndən sonra fevral ayında onlar da müraciətlərini təqdim edəcəklər.

- Qəbələ kuboku turnirində komandaların yerləşdirilməsi və səfər xərclərini klubunuz ödəyir, yoxsa iştirakçılar özləri?

- Dəvət olunan komandaların xərclərinin böyük əksəriyyətini “Qəbələ” klubu üzərinə götürüb.

- Qəbələ kuboku turnirində dünyanın tanınmış futbol adamlarından kimlərin qonaq qismində iştirakı gözlənilir?

- Belə fikrimiz olsa da, bununla bağlı yekun qərar fevral-mart aylarında veriləcək.

Ramiq AĞAMƏMMƏDOV