“AFFA-dan fikrimi öyrəniblər, müsbət yanaşmışam” – Arif Əsədov

ÖLKƏ FUTBOLU 12 Mart 2025 / 11:15 2735

- A +

Adı Azərbaycanın U-21 yığması ilə hallanan əsas millimizin sabiq məşqçisi Arif Əsədov yayılan xəbərlərə münasibət bildirib.

O, QOL.az saytına açıqlamasında AFFA-dan belə bir təklif aldığını bildirib:

“İndi bununla bağlı bir şey deyə bilmərəm. Yaxın günlərdə yəqin ki, İcraiyyə Komitəsi qərar verəcək. Mənə AFFA-dan müraciət ediblər və fikrimi öyrəniblər. Mən isə bu təklifə müsbət yanaşmışam”.

A.Əsədov qeyd edib ki, hazırda U-21-də problemlər olsa da, bu komandanı da irəli aparmaq mümkündür: “Bizdə aşağı yaş qrupları üzrə millilərdə problemlər mövcuddur. Neçə illərdir ki, bunu görürük. U-21-də də oyunçu çatışmazlıqları var. Amma mümkünsüz bir şey deyil. Əsas odur ki, düzgün iş qurasan. Mərhələli şəkildə istəyə çatmaq olar. Düzgün seleksiya aparmaqla inkişafa nail olmaq mümkündür. Təbii ki, futbolçu oynamalıdır ki, inkişaf etsin. Bizdə həmişə U-21 millisində oyun təcrübəsi sarıdan problemlər olub. Bir müddət əvvəl U-21 millisi üçün məcburi limit qoyulmuşdu. O da istənilən effekti vermədi. Çünki demək olar ki, klublarda 21 yaşadək futbolçulardan ancaq hücumameyilli oyunçulara şans verilirdi. U-21-də cinah və mərkəz müdafiəçiləri tapılmırdı. İndi isə legioner limiti ləğv olunub. Dediyim kimi, müəyyən limitlər olduğu halda da problemlər yaşanırdı. İndi bu yeni sistemi də sınayaq. Görək hansı effekti verəcək. Təbii ki, ilk illərdə bütün milli komandalarımız əziyyət çəkəcək. Buna hazır olmalıyıq. Bilmirik, bəlkə də tam əksi olacaq”.

Azərbaycanın əsas millisi bu ay Belarus və Haiti, iyunda isə Macarıstan və Latviya ilə yoldaşlıq görüşü keçirəcək. Millimizin rəqibləri haqda danışan A.Əsədov qeyd edib ki, onların arasında ən maraqlı olanı Haiti yığmasıdır: "Bu gün rəqiblərimiz haqqında kimsə “zəifdir” deyə bilər. Amma hazırda durumumuz elədir ki, bizə də zəif gözü ilə baxırlar. Bu oyunlarda qalib gəlmək ona görə vacibdir ki, komandada qələbə ruhu formalaşsın. Son qələbəmiz Qazaxıtanla oyunda (11 iyun, 2024-cü il – red.) olub. Ondan sonra isə millimiz cəmi bir heç-heçə edib və digər oyunlarda uduzmuşuq. Nəticədə Millətlər Liqasında D liqasına düşmüşük.

Latviya, Macarıstan və Belarusla oyunlarımız olub. Macarıstana qalib gələ bilməmişik, amma digər iki rəqibi üstləyə bilmişik. DÇ-2026-nın seçmə mərhələsi öncəsi Macarıstanla oyun bizim üçün son test ola bilər. Seçmə mərhələyə hansı səviyyədə hazır olduğumuzu həmin görüşdən sonra biləcəyik. Haiti millisinə də kimsə zəif gözü ilə baxa bilər. Amma onlar FİFA reytinqində bizdən öndədirlər. Bu milli ilə oyun maraqlıdır. Çünki ilk dəfə qarşılaşacağıq. Onların futbol fəlsəfəsi də, mədəniyyəti də başqadır. Belə bir komanda ilə görüş də millimizin xeyrinə olacaq. Komandamız uğurlar arzulayıram”.

Ramiq Ağaməmmədov

Daha çox