“Difai”də yeni təqdimat, yeni dönəm - Şəkillər

XƏBƏR 30 Avqust 2023 / 21:25 3037

- A +

Bu gün futbol elitası şəhərin mərkəzində yerləşən “Sky Hotel”inin konfrans zalında bir araya gəlmişdi.

Növbəti mövsümdən Birinci Liqada iştirak edəcək “Difai” FK-nın təqdimat mərasimində iştirak etmək üçün Azərbaycan Futbol Federasiyaları Assosiasiyası (AFFA), Peşəkar Futbol Liqası (PFL), Azərbaycan Respublikası Gənclər və İdman Nazirliyinin (AGİN) rəsmiləri, eləcə də ölkənin aparıcı media qurumlarının nümayəndələri tədbirə dəvət olunmuşdu.

Mərasimi digərlərindən fərqləndirən əsas cəhət görüşün Azərbaycan Respublikasının Dövlət Himni ilə başlaması və şəhidlərinin əziz xatirəsinin bir dəqiqəlik sükutla yad olunması idi.

“Difai” FK-nın prezidenti Asəf Məlikov tədbirin rəsmi hissəsini giriş sözü ilə açıb qonaqları salamladıqdan sonra klubun yaradılmasının məqsədi haqda danışıb:

“Əsas məqsədimiz “Difai” adını yaşatmaq idi və 2018-ci ildə “Difai” İdman Klubu yaradıldı. Əsas idman növləri qılıncoynatma və əlil arabasında qılıncoynatma olub. 2022-ci ildə “Difai” Futbol Klubu yaradılaraq futbol ailəsinə qoşuldu.

Müharibə iştirakçılarını və qazilərini ətrafımızda toplayaraq belə bir klub yaratdığımıza görə xoşbəxtik. 1 il ərzində bizə dəstək olan AFFA və PFL rəsmilərinə, AGİN rəhbərliyinə, eləcə də bütün media işçilərinə təşəkkürümü bildirirəm.

“Difai” FK-nı yaradanda bayrağımızdakı rənglərə xüsusi önəm verdik. Qara - türkçülük etimologiyasında torpaq, ağ - gələcəyimizin uğurlu və işıqlı olacağı, qırmızı - şəhidlərimizin qanının rəmzi olaraq seçilib. Gerbimizdə yalnız qara və ağ rəng olduğuna görə şəhidlərimizin qanına ehtiram hissi olaraq qırmızı rəngi də əlavə etdik.

Öncəki loqodan fərqli olaraq yeni gerbdə 11 ulduz var. Bu, meydana çıxan 11 futbolçumuzun, 11 ulduzumuzun rəmzidir”.

Klub rəhbərinin çıxışından sonra söz PFL-in vitse-prezidenti Aslan Şahgəldiyevə verilib.

Qurum rəsmisi “Difai”nin hər bir azərbaycanlı üçün müqəddəs ad olduğunu xüsusi vurğulayaraq klubda çalışan insanların sağlam ruhlu olduğunu qeyd edib.

Şahgəldiyev bir çox klublarda ciddi kadr problemlərinin olmasına baxmayaraq, “Difai”də bu baxımdan işlərin rəvan getdiyini sözlərinə əlavə edərək sözügedən komandanı ən qısa zamanda Premyer Liqada və avrokuboklarda iştirak edəcəyinə inandığını dilə gətirib.

Tədbirin davamında klubun himni Azərbaycan Respublikasının Əməkdar artisti Elşən Rüstəmov tərəfindən səsləndirilib.

Döyüş meydanından yaşıl meydana

Çempion olmağa gəlib “Difai”

Tarix yaşadaraq tarixi yazan

Fədai ordusu bizim “Difai”

Çempion olmağa gəlib “Difai”

Əlində qılıncı, ayaqda topu

Yuxarı

Daha çox