"Gent" keçiləsi rəqibdir" - Aslan Kərimov

XƏBƏR 7 Noyabr 2022 / 17:45 7019

- A +

"Əslində geniş danışmaq üçün əvvəlcə "Gent"in son oyunlarına baxmaq lazım gələcək. Sadəcə bunu da deməliyəm ki, "Gent" nə arzuolunmaz, nə də asan keçiləcək rəqibdir".

Bu sözləri Qol.az saytına açıqlamasında futbol mütəxəssisi Aslan Kərimov deyib.

Xəbər verdiyimiz kimi, "Qarabağ" Konfrans Liqasının pley-off mərhələsində Belçika "Gent"i ilə qarşılaşacaq. A.Kərimov isə mərhələnin püşkünü dəyərləndirərkən Belçika klubunun Ağdam təmsilçisinin özünə uyğun rəqib olduğunu deyib:

"Sözsüz ki, bu mərhələdə asan rəqib olmur. Sadəcə olaraq, "Gent"dən nisbətən zəif komandalar var idi. Məsələn, "Dnepr-1". Amma təbii ki, "Gent" “Fiorentina" da deyil. Daha ətraflı danışmaq üçün "Gent"in Konfrans Liqasındakı və yerli çempionatdakı matçlarına baxmaq lazımdır. Bundan sonra onların oyun üslubu haqqında nəsə demək olar. Amma ümumi götürəsi olsaq, "Gent" keçiləsi rəqibdir. "Qarabağ" bunun öhdəsindən gələ bilər. "Gent" arzuolunmaz rəqib deyil. Daha güclü komandalarla da qarşılaşa bilərdik. Lakin "Gent"ə nisbətən "Dnepr-1" daha münasib rəqib olardı. Pley-offda bütün oyunlar çətin olacaq. Amma biri var İtaliya, İspaniya, Almaniya kimi ölkələrin təmsilçiləri ilə qarşılaşasan, biri də var Belçika. İspaniya, Almaniya, İtaliyanın ölkə çempionatı, bu komandaların oynadığı matçlar tam başqa səviyyədədir. Ən azından "Qarabağ"ın keçirdiyi görüşlərdən, Azərbaycan çempionatından daha yaxşı səviyyədədir, qat-qat öndədir. Biri də var Polşa, Ukrayna, Belçika çempionatı ola. Biz əslində elə futbolçularımızın bir neçəsini Belçika çempionatında oynayan komandalardan gətirmişik. Səhv etmirəmsə, vaxtı ilə Reynaldo Silva da "Qarabağ"a Belçika çempionatından gəlmişdi. Yəni, sözsüz ki, Belçika çempionatı bizim Premyer Liqadan daha yüksək səviyyədədir. Amma İtaliya, İngiltərə çempionatı da deyil. Qısası, özümüzə uyğun bir rəqib düşdü".

Mütəxəssis bunu da qeyd edib ki, "Qarabağ"ın "Gent"i keçəcəyinə inanır:

"Gent"lə oynamaq mümkündür. "Gent" nə asan keçiləsi, nə də keçilməyəsi rəqibdir. "Qarabağ"la "Gent" arasında görüşlər gərgin mübarizə şəraitində keçəcək. Düşünürəm ki, qol şanslarımız da çox olacaq. Məncə, "Fiorentina" ilə də oynasaydıq, mərhələni keçməyə ümid edərdik. Amma gərək, cüzi səhv belə buraxmayasan. Çünki onların bu səhvlərdən yararlanacaq futbolçuları var. Bunu "Qarabağ"ın Avropa Liqasının qrup mərhələsində keçirdiyi matçlarda görmüşük. Amma "Gent"in heyətində ən azından TOP səviyyəli futbolçular yoxdur. O imkanlardan yararlanmaq şansları olmayacaq. Buna ümid edirəm".

Qeyd edək ki, KL-də pley-off mərhələsinin oyunları fevralın 16 və 23-də olacaq. "Qarabağ" ilk oyununu evdə keçirəcək.

Nur Zeynalova

Daha çox