“Qarabağ” Konfrans Liqasının ən yaxşıları arasında

ÖLKƏ FUTBOLU 1 Oktyabr 2021 / 12:16 4876

- A +

UEFA-nın rəsmi saytı Konfrans Liqasının 2-ci turunun oyunlarından sonra statistik göstəriciləri açıqlayıb.

Qol.az xəbər verir ki, Azərbaycanın qrup mərhələsindəki yeganə təmsilçisi “Qarabağ” ən yaxşı göstəriclərə malik komandalar arasında yer alıb. Qurban Qurbanovun komandası rəqib qapısına ən çox zərbə endirən 32 komanda arasında 3-cü yerdədir (35 zərbə). Bu zərbələrdən 13-ü çərçivəyə, 15-i kənara gedib. 7 zərbə isə bloklanıb. İlk iki yeri “Vitess” (Niderland, 46 zərbə) və “Gent” (Belçika, 36 zərbə) tutur. “Roma” (İtaliya, 34 zərbə) 4-cü, “Lask” (Avstriya, 31 zərbə) 5-cidir.

Ağdam təmsilçisi qrupda 2 oyunda 4 qol vurub ki (orta hesabla hər oyuna 2 qol), bu nəticəylə komanda “Union”la (Almaniya) birgə 5-ci yeri bölüşdürür. Bu göstəricidə lider 8 qolla “Roma”dır (İtaliya). “Tottenhem” (İngiltərə, 7 qol) 2-ci, “Kopengahen” (Danimarka, 6 qol) 3-cü, “Makkabi” (Təl- Əviv, İsrail, 5 qol) 4-cüdür.

2 oyundan sonra “Qarabağ” 9 künc zərbəsi ilə 14-cü yerdə qərarlaşıb. Ağdam təmsilçisi 32 komanda sırasında ən az qol buraxan komandalar siyahısındadır (1 qol). Qol buraxma siyahısında onlar 24-cü yerdə qərarlaşıb. Ən çox qol buraxmağa görə (8 qol) 1-ci yeri isə Ermənistanın “Alaşkert” komandası tutur.

Ağdam klubu ən çox qayda pozuntusuna (34 dəfə) yol vermiş komandalar sırasında isə “Feyenoord”dan sonra (38) 2-ci yerdədir (2 sarı vərəqə). Rəqibləri isə “Qarabağ”a qarşı 20 dəfə qayda pozuntusuna yol verib. Ən çox qayda pozuntusuna yol verən Kadi olub (8 dəfə). Bu futbolçuya qarşı isə 6 dəfə qayda pozulub.

Qeyd edək ki, “Qarabağ” 2 oyuna 1001 ötürmə edib ki, onlardan da 841-i dəqiq olub.

Dünən “Omoniya” ilə matçda dubl edən “Qarabağ”ın yarımmüdafiəçisi Kadi Borqes isə 2 qolla bombardirlər siyahında 3-cü yerdə qərarlaşıb. İlk iki yeri hərəyə 3 qolla “Kopengahen”dən Vinn və “Tottenhem”dən Harri Keyn tutur. Kadi eyni zamanda rəqib qapısına 8 zərbə endirib ki, bu göstərici ilə də o, 5-ci yeri tutur. Braziliyalının zərbələrindən 2-si qol olub, 4-ü kənara gedib, 2-si isə bloklanıb. Ağdam klubunun hücumçusu Vadji isə 7 zərbə ilə 8-ci yerdədir. Onun zərbələrindən heç biri çərçivəyə tuş gəlməyib. 5 zərbə kənara gedib, 2 zərbə isə bloklanıb.

"Qarabağ"ın kapitanı Maksim Medvedev UEFA Konfrans Liqasının qrup mərhələsində ən çox top qazanan futbolçular siyahısında yer alıb.

32 yaşlı müdafiəçi turnirdəki iki oyunda 20 dəfə buna müvəffəq olub. Medvedev bu göstəriciyə görə üçüncü pillədə qərarlaşıb. Birinci yerdə Çexiyanın "Yablonets" komandasından Yaroslav Zeleni (24), ikinci sırada isə İsrailin "Makkabi" (Təl-Əviv) komandasından Luis Ernandes (22) yer alıb.

Daha çox