“Bu səhvlər yaşla bağlı deyil” - Rəşad Sadıqov

“Qarabağ”ın kapitanı Rəşad Sadıqov Avropa Liqasının pley-off mərhələsinin cavab oyunu çərçivəsində keçirilən "Qarabağ" - "Şerif" matçından (3:0) sonra Qol.az-ın müxbirinin də iştirak etdiyi brifinqdə jurnalistlərin suallarını cavablandırıb.

- Rəşad, sənə qarşı son iki-üç həftə davam edən təzyiqlər, azarkeşlər fərqli münasibəti və s. Nə düşünürsən, artıq sakitləşmək vaxtı çatıb?

- Matçdan öncə bir balaca fərqli situasiya idi. Həqiqətən də böyük təzyiq vardı. Ümumiyyətlə, düşünürəm ki, bu gün oyunumuz yaxşı alındı. “Qarabağ”ın bu mövsüm ən yaxşı oyununu keçirdiyini fikirləşirəm. İstər topla, istər topsuz. 60-cı dəqiqəyə qədər üstün oynadıq. Hesab 3:0 olduqdan sonra rəqib risk etməyə başladı. Biz də təbii olaraq, ehtiyatlı oynadıq. Şükürlər olsun ki, sonda istədiyimiz nəticəni əldə edə bildik.

- Standart vəziyyətlərdə tez-tez hücuma atılırdın. Hiss olunurdu ki, qol vurmaq istəyirsən. Vuracağın qolla kimlərəsə cavab vermək idi fikrin?

- Bu gün zərrə qədər önəmli deyildi ki, qol vuracağam, ya yox. Ən vacib olan qrup mərhələsinə düşməyimiz idi.

- Komanda yoldaşın Qara Qarayev dedi ki, oyuna 13-14 min bilet satılmağı bizə pis təsir etdi. Bu amil komanda şəklində hər kəsə təsir etmişdi, ya təkcə Qaraya?

- Oyundan öncə bir qədər müzakirə olmuşdu. Tək Qara yox, 4-5 futbolçu oturub müzakirə edirdik. Dünən o xəbəri oxumuşduq. Amma bu gün hiss etmədik ki, tribunanın hansısa bir yerində boşluq vardı. Azarkeşlərimiz ilk dəqiqədən bizi elə dəstəklədilər ki, üzərimizdəki təzyiqi atıb, oyuna köklənə bildik. Bugünkü qələbəmizdə azarkeşlərimizin rolu böyükdür.

- Artıq bəzi azarkeşlər və jurnalistlər qərar verib ki, Rəşad Sadıqov futbolçu karyerasını bitirsin. Səncə, nə üçün onlar bunu istəyirlər?

- Bilirsiz, elə bir məsələdir ki, bunun ətrafında çox müzakirə etmək olar. Bu gün ancaq pozitiv mövzulardan danışmaq istəyirəm. Mən çox xoşbəxtəm ki, “Qarabağ” 5-ci dəfə Avrokubokların qrup mərhələsində iştirak edəcək. Bu gün mən “Qarabağ”ın kapitanıyam. Bu komandada neçə illərdi ciddi işlər gedir. İş olan yerdə də səhvlər olacaq. İldən-ilə dərəcələr artır, rəqiblər bizə qarşı fərqli oynayırlar. Səhvlər olan yerdə də tənqidlər olacaq. Şəxsən mən hər şeyi normal qarşılayıram. Maksimum çalışırıq ki, tənqidlərdən nəticə çıxaraq. Amma ümumi olaraq, BATE ilə matçdakı səhvlərimi götürsəm, onlar yaşla bağlı səhvlər deyildi. Bu səhvləri 20 yaşda da, 18 yaşda da etmişəm. Mənim özüməməxsus oyun üslubum olub. Xüsusiyyətlərimdən biri də topla oynamaq olub. Bu gün mən oyundan kənara çəkilsəm, demək olar ki, komandada lazımsız bir fiqura çevriləcəm. Bugünkü matçda da topla oynadığım epizodlar oldu. Yenə top itirə bilərdim. Yəni sırf bu səhvlər yaşla bağlı deyil. O ki qaldı yaşlanmağa, təbii ki, 36 yaşım var. Əslində, dərindən analiz etsək, bu il avrokuboklarda keçirdiyim oyunlar bəlkə də əvvəlki illərə nisbətən daha yaxşı alındı. Sadəcə olaraq, bir balaca şansızlıqlar yaşandı. Elə oldu ki, mənim buraxdığım səhvlər qolla nəticələndi və həmin qollar da “Qarabağ”ın taleyinə təsir etdi. Mən bunu anlayışla qarşılayıram. İlk növbədə, mən özüm-özümü qınayırdım ki, ötürməni verərkən bir az daha ehtiyatlı ola bilərdim. Amma olan olmuşdu. Bugünkü qələbə bizim üçün çox vacib idi. Açığı, PSV-dən 6 qol buraxıb, Avroliqaya düşməkdənsə, bugünkü qazandığımız möhtəşəm qələbə ilə qruplara düşmək mənim üçün daha önəmli idi. Çünki bu gün hamımız müsbət ab-hava ilə qrup matçlarına gedirik. Biri var ki, məğlubiyyətlə getmək, biri də var belə qələbə ilə. Özünüz də gördünüz ki, BATE ilə  matçından sonra komanda necə məyus olmuşdu.

- Rəşad, Avroliqanın qrup mərhələsində mübarizə aparmağınız artıq azarkeşlər, həm də jurnalistlər üçün adiləşib. Bundan sonrakı hədəf nədir?

- Bizim əsas problemimiz odur ki, ildən-ilə hər şey adiləşir. Yəni dərəcə də qalxır. Rəqiblərin bizə qarşı oyunu da dəyişir. “Şerif” ötən il Avroliqanın qrupunda 9 xal qazanmışdı. Bu gün bizi o xalları analiz etmirik, “Şerif”i mütləq keçməliyik deyirik. BATE son illərdə 4 dəfə ÇL, 4 dəfə Avroliqanın qrup mərhələsində mübarizə aparıb. Biz özümüzdən danışırıq ki, qruplarda təcrübəmiz var və s. Amma rəqibləri belə qiymətləndirmirik. Çalışacağıq, əlimizdən gələni edəcəyik. Amma öncədən nəsə demək çox çətindir.

- Qruplarda “Çelsi” ilə qarşılaşsanız, azarkeşlərin bəziləri artıq qələbə gözləyəcək.

- Mən istəmirəm ki, adiləşmə olsun. Bu gün Azərbaycan klubunun Avroliqanın qrup mərhələsinə düşməsi uğurdur. Hamı istəyir ki, ÇL qrupunda mübarizə aparaq, qrupdan çıxaq.

- Belə bir xəbərlər yayılmışdı ki, BATE ilə oyunlarda Rəşadının kobud səhvləri olmasaydı, bu gün yenidən milli komandaya qayıdacaqdı...

- Mənim milliyə geri dönməyim səhvlərlə bağlı bir şey deyil. Qurban müəllimlə bu barədə aramızda söhbət olmuşdu. Hətta Ruslan Abışov zədələnəndən sonra da bu haqda danışdıq. Ancaq yenə də bizim müdafiəçilərimiz var. Mən yenə də sözümün arxasınadayam. Nə vaxtsa lazım olsam, xeyirim dəyəcəksə, dönə bilərəm.

- Səncə, millinin hazırkı müdafiəçiləri UEFA Millətlər Liqasında komandanın yükünü qaldıra biləcəklərmi?

- Düşünürəm ki, yaxşı olar. Sentyabrın 7-si, 10-u milliyə hamımız azarkeşlik edəcəyik. Yeganə problem odur ki, 3 gündə 2 oyun olacaq. Bizim futbolçuların da, ümumi bütün futbolçuların da 3 gündə 2 vacib matça hazırlaşmaqları asan olmur.

- Matçdan öncə “Şerif”i keçə bilməsəniz, “Qarabağ”da karyeranı bitirə biləcəyini düşünürdün? Ya əksini fikirləşirdin?

- Matçdan öncə çox şey fikirləşmirdim. Çalışırdım ki, az düşünüm. Çünki tam olaraq oyuna köklənmişdim. Mənim işim meydana çıxıb oynamaqdır. “Qarabağ”ın kapitanıyam, belə şeylərə reaksiya verməyim düz olmaz. Bu tip şeylərə nə vaxtım, nə də imkanım var.

- Rəşad, qrup matçlarında yenidən BATE ilə qarşılaşmağı istəyərsən?

- Yox, istəmirəm. BATE bizim üçün bir qədər narahat rəqibdir. Əslində, iki oyunda da onlardan üstün oynamışdıq. Burada ilk 20 dəqiqədə pis başladıq. Amma ümumi götürsək, hər iki matçda biz üstün idik. Biz topla oynamağı çox sevən komandayıq. Bütün komanda şəklində hücuma çıxırıq və çox futbolçumuz öndə olur. Buna görə əks-hücumda bizi yaxalamaq asandır. BATE-nin ən güclü tərəfi əks hücumlarda oynamaqdır. Buna görə bizim üçün narahat rəqibdir. Şəxsən onlarla qarşılaşmaq istəmərəm.

- Bəs “Fənərbaxça”  və “Beşiktaş” necə? Onlarında Azərbaycanda böyük azarkeş kütləsi var.

- Qismətimizdə hansı klub varsa, onlar düşəcək. Sırf Qurban müəllimi təbrik etmək istəyirəm. Oyundan öncə rəqib çox danışdı ki, bizi analiz ediblər. Həqiqətən də ilk oyunda bizi yaxşı analiz etmişdilər, əl-qolumuzu bağlamışdılar. Qurban müəllim bizim oyunumuzu yüz faiz dəyişdi. Böyük riskə getdi. Qaranın sağ cinahda olması, mənim solda geniş oynamağım və s. Bunlar hamısı Qurban müəllimin oyundan öncə düşündüyü planlar idi. Hücum kombinasiyalarımızı dəyişdik. Bəli, riskli idi. Amma çox şükürlər olsun ki, uğurlu alındı. Komandanın futbolçusu kimi, bir daha Qurban müəllimi ürəkdən təbrik edirəm.

- Bu il Avroliqanın qrupunda mübarizə aparacaq komandaları ötən ilkinə nisbətən daha güclü adlandırmaq olar?

- Bəli, böyük klubların sayı artıb. Belə baxanda, hər zaman çətindir. “Slovan”la qarşılaşanda, hamımız düşünürdük ki, “Slovan”ı mütləq udmalıyıq. Amma məğlub olduq.

- Rəşad, bu stadion daha əvvəlki illərdə pley-offda qarşılaşdığınız “Göteborq” və “Yanq Boyz”  komandaları üzərində qələbələrə şahid olmuşdu. Amma oyundan sonra bugünkü ab-havanı, sevinci görməmişdik. Bu gün komandada hədsiz sevinc var idi. Bu nə ilə bağlıdır?

- Oyundan öncə bizdə böyük istək var idi. Matçdan öncəki iclasda da Qurban müəllim bizə “Göteborq”la “Yanq Boyz”un matçlarını izlətdirdi. Uşaqlara bildirdi ki, həmin matçlarda da ilk oyunda məğlub olmuşduq, yəni şansımız var. Qismət, yenə də 3:0 qələbə qazandıq. “Neftçi” ilə matçda da görünürdü ki, “Şerif”lə məğlubiyyətə barışmamışdıq, təslim olmamışdıq.