“Heç nədən çəkinmirəm” – Rauf Əliyev

“Qəbələ”nin hücumçusu Rauf Əliyev Qol.az-a müsahibə verib. Sloveniyadakı təlim-məşq toplanışını dəyərləndirən futbolçu hazırda davam edən dünya çempionatı və digər məsələlər barədə də fikirlərini bildirib.

- Artıq 2 həftəyə yaxındır Sloveniyada hazırlıq keçirsiniz. Təlim-məşq toplanışı barədə nə deyə bilərsiniz?

- Normal qaydada hazırlaşırıq. Hər şey yaxşı gedir. Artıq toplanışın sonudur. Bu gün “Krakoviya” ilə sonuncu yoxlama oyunumuzu keçirib Bakıya qayıdacağıq.

- Bu oyuna qədər 2 yoxlama matçı keçirmisiniz. İlk oyunda “Kukesi” ilə heç-heçə edib, ikinci görüşdə Zaqreb “Dinamo”suna uduzmusunuz. Nəticələr Avroliqanın birinci təsnifat mərhələsinin “Proqres”lə oyunu öncəsi narahatçılıq yaratmır?

- Yoxlama oyunlarında nəticə elə də önəmli deyil. Əsas oyun keyfiyyəti, məşqçinin verdiyi tapşırıqları yerinə yetirməkdir. Adı üstündə - hazırlıq oyunudur. Nəticə Avroliqada olmalıdır.

- Sloveniyada ilk oyununuzu sabiq klubunuz “Kukesi”yə qarşı keçirdiniz. Bilirik ki, bu komandadan problemli ayrılmısınız. Maraqlıdır, həmin oyunda nələr yaşandı?

- Qeyri-adi heç nə baş vermədi. Bir-birimizlə normal qaydada görüşdük. Hər şey yaxşı oldu. “Kukesi”dən elə ciddi problemlə ayrılmamışdım.

- “Kukesi”dən ayrıldıqdan sonra bir müddət futbolsuz qaldınız. Sloveniyadakı hər iki yoxlama oyununda meydana çıxdınız. Özünüzü tam hazır hiss edirsiniz?

- Hər şey yoluna düşür. Məşqlərdə bütün gücümlə çalışıram. Əsas fiziki cəhətdən yaxşı olmaqdır. Şükürlər olsun, o da yavaş-yavaş düzəlir.

- “Qəbələ” heyətini nigeriyalı hücumçu Ceyms Adeniyi ilə gücləndirdi. Yaxın günlərdə daha bir forvardın alınacağı gözlənilir. Bu isə o deməkdir ki, sənin də çıxış etdiyin hücum mövqeyində rəqabət artacaq…

- Rəqabət hər yerdə, hər mövqedə olur. Heç nədən çəkinmirəm. Bəlkə də bu, mənim üçün daha xeyirli olacaq.

- Qarşıda Avropa Liqasının 1-ci təsnifat mərhələsinin “Proqres” lə oyunları var. İlk matç Bakıda olacaq. Nə düşünürsən?

- “Proqres”i analiz etmişik. Ötən ilki nəticələrindən xəbərimiz var. Yaxşın günlərdə oyunlarını izləyəcəyik. Hər iki görüşdə yaxşı nəticə qazanıb, turu keçmək istəyirik.

- Rusiyada keçirilən dünya çempionatını izləmək imkanınız olur?

- Bəli, imkan olduqca oyunlara baxıram.

- Mundial necə keçir?

- Deyərdim ki, oyunlar çox maraqlı keçir. Sürprizlər, bol qollu matçlar olur.

- Maraqlıdır, hansı yığmaya azarkeşlik edirsiniz?

- Messiyə görə Argentinaya azarkeşlik edirdim. Amma onlar da artıq mübarizəni dayandırıblar.

- Messinin bu dünya çempionatındakı çıxışı çox müzakirə olundu. Bundan başqa, o, baş məşqçinin işinə müdaxiləsi, heyəti qurması ilə də gündəmə gəldi…

- Yox, mən bu söz-söhbətlərə inanmıram. Böyük futbolçuların ətrafında həmişə belə şayiələr olur.

- Almaniya, Argentina, İspaniya, Portuqaliya kimi yığmalar dünya çempionatı ilə  erkən vidalaşdı. Bu cür dünya nəhənglərinin olmaması mundialın səviyyəsini aşağı salmayacaq?

- Məncə, ciddi təsir etməz. Çünki artıq 1/4 final qarşılaşmaları gəlir. Mübarizəni davam etdirən ölkələr də zəif deyillər.

- Sizcə, çempionluğa ən iddialı namizəd hansı ölkədir?

- Braziliya və Fransa mundialın əsas favoritləridir.

Elnur SALAHOV