“Qarabağ” sabah başlayır – Mütəxəssislər nə düşünür?

Ölkəmizin beynəlxalq arenadakı yeganə təmsilçisi "Qarabağ" sabah Avropa Liqasının qrup mərhələsində mübarizəyə başlayacaq.

Qol.az-ın məlumatına görə, Qurban Qurbanovun komandası qitənin ikinci dərəcəli klub turnirinə Portuqaliyada start verəcək. Ağdam klubu Lissabonda yerli "Sportinq"lə qarşılaşacaq. "Qarabağ"ın tarixində ilk dəfə qarşılaşacağı rəqiblə dueli maraqla gözlənilir. Biz də vacib oyunöncəsi bəzi futbol adamları ilə əlaqə saxlayıb, onların fikirlərini öyrəndik.

“Neftçi” klubunun sabiq vitse-prezidenti Tahir Süleymanovun fikrincə, indiki məqamda "Qarabağ"dan  nəticədən, qrupdan çıxmaqdan çox, Azərbaycan futbolu adına layiqli mübarizə, oyun arzulamalıyıq: “Qrupun dəyərləndirilməsinə, məncə, daha təhlilli yanaşmaq lazımdır. 8 komandalı rəqabətsiz açıq "Bakı çempionatı"ndan qruplara vəsiqə qazanmaq özü böyük uğurdur. Nəzərə alaq ki, 4 klubumuzdan 3-ü ilk mərhələdəcə dayandı. Futbolumuzun bu durumunda "Qarabağ"dan qrupdan çıxmağı tələb etmək doğru olmaz. Peşəkar futbol elmdir, reallığa, analizlərə söykənməlidir. "Qarabağ" heyətlə bağlı çox böyük problemlərlə üzləşib. Kintana, Miçel, Slavçev olmayacaq. Təəssüf ki, meydanda düşünən beyin, Rəşad Sadıqov da zədələnib. Qarşıda isə Portuqaliya nəhənglərindən biridir. "Qarabağ"ın qrup oyunlarında kifayət qədər təcrübəsi var. Bu baxımdan meydana çıxacaq yerli futbolçular üçün gözəl, əlavə şansdır.  Portuqaliya çempionatı, klubları Avropa transfer bazarında "tranzit" rol oynayır. Gənc futbolçuların özlərini yaxşı tərəfdən göstərməsi dərhal diqqət mərkəzinə düşə bilər. Nəzərə alaq ki, Portuqaliyada Vaqif Heydərlinin timsalında bacarıqlı yerli menecerlərimiz sayəsində Azərbaycan futbolçularına hər zaman diqqət olub. Bu da əlavə stimuldur.


Tahir Süleymanov


Vaxtilə azarkeşlərimizin ekrandan həsrətlə baxdıqları Avropa nəhənglərinin oyunlarını klublarımızın sayəsində stadionlardan canlı izləyirlər. İndi də növbədə "Arsenal"dır. "Qarabağ" ölkə futbolunun çox çətin durumunda, klubların dağılması fonunda, rəqabətin zəiflədiyi illərdə çox çətinliklə stabilliyini qoruyub saxlaya bilib. Bu vəziyyətdə komandadan qrupdan çıxmaq və ya digər tələblər irəli sürmək  yanlışlıq olar. Məşqçi, futbolçular çətin dönəmdə öz məsuliyyətlərini dərk edirlər. Təzyiq yox, onlara dəstək verilməli və rəqiblərlə görüşlərdə böyük futboldan zövq alınmalıdır. Ən önəmli məqamlardan biri isə millidir. "Qarabağ"ın futbolçuları yığmanın özəyini təşkil edirlər. Qarşıda Millətlər Liqasında çox məsuliyyətli görüşlərimiz var. Qurban Qurbanovun rəhbərliyi altında qrup oyunları eyni zamanda milli üçün futbolçuların yüksək  rəqabətdə, sürətdə, keyfiyyətli futbolda formalarını qorumaq, artırmaq baxımdan vacib amildir. Təki milliyə futboçu çatışmamazlığı dönəmində zədəlilərimiz olmasın.
Qrup görüşlərinin, rəqiblərin səviyyəsi elədir ki, oyunlarda qələbə, heç-heçə, məğlubiyyət də ola bilər. Hətta uğursuz nəticə olsa belə üzülməməliyik. "Arsenal" kimi komandanın bir futbolçusunun qiymətinə Azərbaycanda 8 deyil, 80 komanda saxlamaq olar. "Sportinq" də büdcəsinə, nüfuzuna, gücünə görə sıradan bir rəqib deyil. Qeyd etdiklərim məğlub psixologiyası deyil, obyektiv reallıqdır. Bunları nəzərə alaraq "Qarabağ"dan  nəticədən, qrupdan çıxmaqdan çox, Azərbaycan futbolu adına layiqli mübarizə, oyun arzulamalıyıq. Qrup oyunlarından sonra 1-2 yerli futbolçumuzun elə Portuqaliya klublarına transferi daha böyük uğur sayıla bilər. "Qarabağ"a Azərbaycan futbolu adına uğurlar”.

Milli komandamızın sabiq baş məşqçisi, son olaraq, "Kəpəz"i çalışdırmış Şahin Diniyev “Sportinq”lə oyunda ilk 15 dəqiqənin önəmli olduğunu vurğulayıb: "Həmişə deyildiyi kimi, çətin oyun olacağını gözləyirəm. İnsanlar bunu anlayışla qarşılamalıdırlar. İki ölkə futbolu arasındakı səviyyəni götürəndə hər şey aydın olur. Ümumiyyətlə, "Qarabağ"ın sürətli komandalara qarşı oyunu hər zaman çətin olur. Çünki rəqiqin sürətli hücumları müdafiədə pərakəndəliyə, müəyyən problemlərə səbəb olur. Bu, tək "Qarabağ"a aid deyil. Bu səviyyədə olan istənilən komandalarda oxşar hadisələr yaşanır. "Sportinq" ilk 15 dəqiqədə qol vurmağa çalışacaq. Çünki bu cür klublar nisbətən aşağı səviyyəli rəqiblərlə matçlarda erkən qol prinsipi ilə meydana çıxırlar.


Şahin Diniyev

Dünən "Qalatasaray"ın timsalında da bunu gördük. İlk dəqiqələrdən pressinq edib. erkən qol vurdular və nəticədə böyükhesablı qələbə qazandılar. Ancaq "Qarabağ" matçın əvvəllərində qol buraxmasa, bu, artıq "Sportinq" üçün problem yaradacaq. "Qarabağ" avrokubok təcrübəsi olan komandadır. Futbolçular belə vəziyyətlərdə mandraja düşmürlər. Baş məşqçiləri nəyi necə edəcəyini yaxşı bilir. Ancaq "Qarabağ"da problemlər var. Bunu heç kim danmır. Ona görə də hər şeyi normal qarşılamaq lazımdır. "Şerif"lə ilk oyundan sonra bəziləri komandanı silmişdi. Amma ev oyunun 3 cavabsız qol vurub, qrupa düşdülər. Əgər bəxt amili də "Qarabağ"ın tərəfində olsa, qrupda yaxşı nəticələr qazanıb irəliləyə bilərlər".

"CBC Sport"un şərhçilər qrupunun rəhbəri Rüstəm Əfsərli isə “Qarabağ”ın Portuqaliyadan 1 xalla dönə biləcəyinə inanır: "Çox uzun danışmayacağam. Qısaca fikirlərimi bildirim ki, qrupda "Arsenal"ı çıxmaqla, "Qarabağ"ın digər iki komanda ilə yaxşı oynamaq və mübarizə aparmaq üçün hər cür şansı var. Əlbəttə, "Sportinq" Portuqaliya, yüksək reytinqli ölkənin təmsilçisi kimi bizə bir az qorxulu gələ bilər. Amma mövsümün əvvəlində bu klubda müəyyən problemlər var idi. Hazırda da komandada qeyri-sabitlik hökm sürür. Prezident və baş məşqçi dəyişikliyi oldu. Yəni, klubda bir çalxalanma var. Düzdür, "Sportinq"in heyəti keyfiyyət baxımından "Qarabağ"dan üstündür. Amma oynamaq, yaxşı nəticə qazanmaq olar.


Rüstəm Əfsərli

Fikirləşirəm, sabahkı oyunda təmsilçimiz yaxşı şanslara malikdir. Lissabondan bir xalla dönsələr, ümumiyyətlə, təəccüblənməyəcəyəm. 3 xal gətirsələr isə əlbəttə ki, fantastik olar. Düzdür, məsələyə bir az gerçək yanaşmaq lazımdır. "Joze Alvalade"də qələbə bir qədər çətin görünür. Ümid edirəm ki, 1 xala sevinəcəyik və bu xal ilk dəfə "Qarabağ"ın qrupdan çıxması üçün olduqca vacib addım olacaq".

Elnur SALAHOV