"İndiki "Partizan" çox zəifdir" - Kamal Quliyev

“Neftçi” Serbiyadakı oyunda özü qələbəni əlindən verdi. “Partizan” gözləmirdi ki, “Neftçi” tez bir zamanda onların qapısına iki qol vursun. Ancaq komandamız bunu bacarsa da, sona qədər tab gətirə bilmədi”.

Qol.Az saytına açıqlamasında bu sözləri bir vaxtlar “Neftçi” klubunun məşqçisi olmuş  Kamal Quliyev sabiq komandasının Avropa Liqasının pley-off mərhələsinin “Partizan”la  ilk oyunundan (2:3) danışarkən deyib.

Hazırda birinci divizion təmsilçisi “Neftçala”nı çalışdıran veteran futbolçu “Neftçi”nin səfərdə məğlub olmasını qapıçı Saşa Stamenkoviçin kobud səhvləri ilə əlaqələndirib: “Burada ilk növbədə günahı qapıçı Saşa Stamenkoviçdə görürəm. Biz  “Partizan”la Avroliqanın qrup mərhələsində oynayanda da rəqib azarkeşlər tərəfindən Saşaya təzyiqlər olurdu. Bu dəfə də belə oldu. Saşa isə bu təzyiqlərə dözə bilmədi. Ona görə də çıxışlarda səhvlərə yol verirdi. Futbolçu hər vəziyyətə psixoloji cəhədən hazır olmalıdır. İlk hissə “Neftçi”nin 2:0 hesablı qələbəsi lə başa çatsaydı, bu gün Avroliqanın qrup mərhələsindən danışa bilərdik. “Neftçi”nin buraxdığı bir qol bütün oyunun taleyini həll etdi.

Matçda dönüş nöqtəsi həmin qoldan başladı. Yəni rəqib ruhlanmağa başladı, tədricən “Netçi” səhvlər buraxdı. Bunun da acı nəticəsidir ki, sonda 2:3 hesabı ilə məğlub olduq. Düzdür, buraxılan qolların ikisi avtoqol oldu. Bunu da şişirtmək lazım deyil. Həm Elvin Yunuszadə, həm də Denis Silva oyunun ən yaxşılarından idi. Mən də, öz qapımıza qol vurmuşam. Bu, karyeram ərzində bir dəfə baş verib. Yəni heç kim avtoqoldan sığortalanmayıb”.

Xatırladaq ki, K.Quliyevin məşqçiliyi dövründə - 2012-ci ildə “Neftçi” Avropa Liqasının qrup mərhələsində “Partizan”la qaşılaşıb. Gənc çalışdırıcı həmin oyunları xatırlayaraq “Partizan”ın indi daha zəif olduğunu qeyd edib: “2012-ci ildəki “Partizan” daha güclü idi. Kimlərsə mənimlə razılaşmaya bilər. Ancaq iki il əvvəl daha sürətli, əzmkar “Partizan” görmüşdüm. Həmin illə müqayisə edəndə indiki “Partizan” çox zəifdir. Yadınıza salın, o dövrdə “Partizan” oyuna çox böyük təzyiqlə başlayırdı. İndi isə “Partizan” böyük boşluqlar buraxır”.   

K.Quliyev “Neftçi”nin “Partizan” səddini keçəcəyinə inandığını vurğulayb: “Adətən bizim klublarımız ev oyunlarında daha yaxşı nəticə qazanır. Ancaq bu il “Neftçi” bunun əksini göstərirdi. Yəni evdə bacarmadığı işin öhdəsindən səfərdə gəlirdi. Çox təəssüf ki, səfərdə “Partizan”a məğlub olmaqla bu seriya qırıldı. Ancaq inanıram ki, “Neftçi” “Partizan” səddini keçməyə qadirdir. Komandamız yenidən Avroliqanın qrupunda oynasa, bu, Azərbaycan futbolunun uğuru olacaq. Ona görə də “Neftçi”ni hamılıqla dəstəkləməliyik . Vaxtilə qrup mərhələsinə vəsiqə qazanmaqla  “İnter” kimi Avropa nəhəngini Azərbaycana gətirmişik. Niyə də indi bu uğuru təkrarlamayaq? Azarkeşlərə səslənmək istəyirəm. Serbiyada “Partizan” azarkeşləri 90 dəqiqə ərzində “Neftçi”ni təzyiq altında saxladı. Biz də bunu bacarmalıyıq. Uğur üçün hər yola əl atmaq lazımdır. Mən də bir “Neftçi”li kimi sabah sabiq komandamın yanında olacağam”.

K.Quliyev Avroliqadakı digər təmsilçimiz “Qarabağ”ın “Tvente” ilə ilk oyunundan və komandamızın mərhələ adlamaq şanslarından da danışıb:   “Tvente” “Qarabağ”ı çox düzgün analiz etmişdi. Müdafiəni yaxşı qurmaqla, tez qapanmaqla, boşluqlar yaratmamaqla “Qarabağ”ın işini çətinə saldılar. Bilirik ki, “Qarabağ” top saxlamağı və tədricən hücum qurmağı  sevir. Sürətli hücumlara çox da üstünlük vermirlər. Rəqib də bundan düzgün istifadə edirdi. Buna baxmayaraq komandamızın qol vurmaq imkanları da oldu. Ola bilər ki, “Tvente”Bakıdakı oyundan fərqli olaraq öz  meydanında hansısa boşluqlar buraxsın. “Qarabağ” qrupa düşmək istəyirsə, sabahkı oyunda mütləq bir qol vurmalıdır. İnanıram ki, bu mərhələyə qədər inamlı mübarizə aparan “Qarabağ” “Tvente” səddini də keçmək gücündədir”.