Fransa mediası “Land of fire Azerbaijan”dan danışır

“Bakı” klubunun prezidenti, iş adamı Hafiz Məmmədovun “Lans” klubunu almaq istəməsi Fransa mətbuatında geniş müzakirə olunur. Qol.Az-ın məlumatına görə, demək olar ki, hər gün ölkənin aparıcı KİV-ləri bu məsələyə yer ayırır, Azərbaycanla əməkdaşlığın baş tutacağı halda ikinci liqada yarışan “Lans”ın yüksək liqaya vəsiqə qazana biləcəyini yazır.

Fransanın nüfuzlu “TV 5” telekanalının rəsmi saytı bildirir ki, artıq bu əməkdaşlıq baş tutmaq üzrədir. Qeyd olunur ki, yeni mövsümdən “Lans” da Madrid “Atletiko”su kimi oyunlara üzərində “Land of fire Azerbaijan” (Odlar yurdu Azərbaycan) sözləri yazılan forma ilə çıxa bilər. Yazıda bildirilir ki, “Lans”ın sabiq prezidenti Jerve Martel və “Bakı”nın prezidenti, “Baghlan group”un sahibi Hafiz Məmmədov arasındakı danışıqlar müsbət nəticələnmək üzrədir.

Sport.fr saytı da təxminən eyni məzmunlu yazı dərc edib, Azərbaycanla yanaşı bir Lüksemburq şirkətinin də “Lans”a sponsorluq etmək istəməsini yazıb.

lensois.com saytında isə Azərbaycan iqtisadiyyatının inkişafına toxunulub, “Land of fire Azerbaijan” bir brend kimi təqdim edilib. “Biz artıq bu sözləri  Madrid “Atletiko”sunun formasında və “Visente Kalderon” stadionunda da görmüşük” - deyə yazıda vurğulanır.

“Lavoix des Sports” nəşrinin yazısında isə bildirilir ki, bu əməkdaşlıq baş tutsa, “Lans” bundan yalnız uda biləcək. Jurnalist Pyer Dievalın köşə yazısında qeyd edilir ki, danışıqlar müsbət nəticə verəcəyi halda, “Lans” bu gün səs-küylü transferləri ilə Avropada ad çıxaran Fransanın ikinci “Monako”su ola bilər.

Müəllif yazır ki, Azərbaycanın iqtisadiyyatı bu gün sürətlə inkişaf edir, ölkə öz nefti və qazı ilə də dünyada tanınmağa başlayıb.

“Azərbaycanın hazırkı gücünü nəzərə almalıyıq. Bu mənada, “Lans”a sahib olmaq istəyən Lüksemburqun “Mangrove Capital” investisiya şirkətindənsə, Azərbaycanla əməkdaşlıq klub üçün daha münasibdir” – deyə yazıda vurğulanıb.

Qeyd edək ki, Azərbaycanla “Lans”ın mümkün əməkdaşlığı ilə bağlı Fransanın və Avropanın ən nüfuzlu qəzetlərindən olan “L'equipe” də daxil olmaqla bir çox KİV-də xəbərlər, analitik yazılar dərc olunub, ekspert fikirlərinə yer verilib.

Yeri gəlmişkən, erməni lobbisi isə özlərinə yaxın olan media orqanlarında bu əməkdaşlığın qarşısını almaq üçün antiazərbaycan təbliğatlarını davam etdirirlər. Lakin "Lans"ın rəhbərliyi səviyyəsində bir neçə dəfə bəyan olunub ki, idmanla siyasəti bir-birinə qatmaq doğru deyil və əgər Azərbaycanın sponsorluğu olsa, klub bundan qətiyyən uduzmayacaq.