"Bakı" mötəbər FUTUR 2013 sərgisində (FOTOLAR)

Bu gün İspaniyanın paytaxtı Madrid şəhərində ənənəvi FİTUR turizm sərgisinin rəsmi açılış mərasimi keçirilib. Qo.Az-ın məlumatına görə, Azərbaycan Respublikası Mədəniyyət və Turizm Nazirliyi tərəfindən təşkil olunan Azərbaycan bölümündə turizm və biznes sahələri ilə yanaşı idman sektoru da təmsil olunur. İdman sahəsində ölkəmizi "Bakı" futbol klubu təmsil edir. İlk dəfədir ki, Mədəniyyət və Turizm Nazirliyinin turizm sərgisində Azərbaycanın idman sektoru təqdim olunur. Bu missiya "Bakı" futbol klubunun üzərinə düşüb.

Sərginin açılış mərasiminə qatılan mədəniyyət və turizm naziri Əbülfəs Qarayev və Azərbaycanın İspaniyadakı səfiri Altay Əfəndiyev Azərbaycan bölümündə yer alan materiallarla tanış olaraq, sərgi iştirakşılarına uğurlar arzulayıblar.

"Bakı" futbol klubunun icraçı direktoru Yaşar Seyidov fəxri qonaqlara "Bakı" futbol klubunun sərgidə iştirakı barədə ətraflı məlumat verib. Klubun media və marketinq departamentinin rəhbəri Nəriman Mehdiyev ziyarətçiləri "Bakı" futbol klubunun beynəlxalq əlaqələri, o cümlədən İspaniyanın "Atletiko" Madrid klubu ilə əməkdaşlıq, bu müqavilənin Azərbaycan futboluna verəcəyi böyük fayda və perspektivlər haqda məlumatlandırıb.

Sərginin ilk günü Azərbaycan bölümü böyük marağa səbəb olub. "Bakı" futbol klubunun stendi önündə çoxsaylı ziyarətçi axını izləmək artıq adi hal kimi qəbul olunur. Diqqtədən yayınmır ki, İspaniya əhalisi və müxtəlif ölkələridən gələn qonaqlar klub haqda daha çox məlumat əldə etmək niyyəti ilə stendiin qarşısında daha çox ayaq saxlayıblar. Ümumiyyətlə, sərginin ilk günü Azərbaycan bölümünü onminlərlə adam ziyarət edib.

Madridin İFEMA sərgi mərkəzində 5 gün ərzində davam edəcək beynəlxalq sərgidə "Bakı" futbol klubunun infrastruktir çalışmaları, uşaq futbolu, futbol akademiyasının fəaliyyəti, beynəlxalq əlaqələr, o cümlədən, "Atletiko" ilə əməkdaşlıq barədə ətraflı məlumat veriləcək.

Məlumat üçün əlavə edək ki, FUTUR sərgidi dünyanın ən böyük sərgi-nümayiş mərkəzlərindən biri kimi qəbul olunur. 33-cü dəfə keçiriləcək ənənəvi sərgi daim tək İspaniyanın deyil, eyni zamanda iş dünyasının diqqtə mərkəzində olur. Ötən il sərgini 154 ölkəni təmsil edən 6313 jurnalist işıqlandırıb. Bu il sərgiyə 167 ölkədən 9142 şirkət və dövlər strukturu qatılıb.

"Bakı" futbol klubu və İspaniyanın "Atletiko" klubları arasında əməkdaşlıq çərçivəsində nəzərdə tutulan əməkdaşlıq şərtlərdən yararlanan Azərbaycan klubu bu mötəbər sərgidə "Atletiko" saatları təşkil edəcək. "Atletiko" futbolçuları və klub rəhbərliyinin nümayəndələri fevralın 1-də sərgini ziyarət edəcək, futbol geyimləri imzalayaraq, ziyarətçilərə hədiyyələr paylayacaqlar.

Sərginin əhəmiyyəti barədə yalnız o faktı vurğulamaq kifayət edər ki, ötən il FUTUR sərgisini 100 mindən artıq Madrid sakini və şəhərin qonaqları ziyarət edib.

33-cü FUTUR Beynəlxalq Turizm sərgisi 3 fevral 2013-cü il tarixlərinə qədər davam edəcək.