"Ufuq Budaq karyerasını erkən başa vura bilər"

“Qəbələ” futbol klubunun Türkiyənin məşhur tibb mərkəzlərindən olan “Acıbadem Hospitals Group” ilə əməkdaşlığı davam edir.

Qol.Az-ın İstanbula ezam olunmuş müxbirinin məlumatına görə, “Qəbələ” klubunun zədəli futbolçularının müalicə, müayinə və bərpasını təmin edən “Acıbadem” tibbi mərkəzi 1991-ci ildə yaradılıb.

1991-ci ildə yaradılan “Acıbadem” Türkiyə ilə yanaşı, beynəlxalq arenada da yüksək standartlara uyğun tibbi xidmətlər verməkdədir. Bu müddət ərzində xəstəxana və tibb mərkəzlərindən ibarət səhiyyə şəbəkəsini böyüdən “Acıbadem” bu gün 16 tam təchizatlı xəstəxana və 8 polikilinika ilə xidmət göstərir.

Mərkəzin ilk əməkdaşlığı Azərbaycanın “Bakı” klubu ilə baş tutub. 2009-cu ildə “Bakı” klubunun rəsmisi Tunc Avşarın vasitəçiliyi ilə əməkdaşlığa start verən “Acıbadem” bu əlaqəni bir qədər də genişləndirib.    

2011-ci ildən “Qəbələ” ilə tərəfdaşlıq müqaviləsi imzalayan “Acıbadem Hospitals Group” tibb mərkəzi 6 ay öncə FİFA lisenziyası alıb. Dünyada FİFA lisenziyalı 26 mərkəzdən biri olan “Acıbadem”də dünyanın bir sıra məşhur idmançıları müalicə olub.

Bu barədə danışan “Acıbadem” İdman şöbəsinin rəhbəri Çağrı İlk yaxın gələcəkdə Azərbaycanda da belə bir tibb mərkəzi açmağı planlaşdırdıqlarını bildirib: "Azərbaycanın “Bakı” və “Qəbələ” klublarının futbolçuları ilə yanaşı, ölkəmizin bir sıra idmançıları da “Acıbadem”də əməliyyat olunub və müalicə alıblar. Belə ki, “Bakı”dan Elvin Əliyev, Aqil Məmmədov, Uinston Parks, Maris Verpakovskis, Fabio Luis Ramim, “Qəbələ”dən isə Dodo, Yannik Kamanan, Lourival Assist, Deyan Kelhar, Vurğun Hüseynov və Rövşən Əmiraslanov da “Acıbadem” tibb mərkəzində olublar. Azərbaycanın digər idmançılarına gəldikdə voleybolçu Polina Rəhimova (“Azərreyl”), güləşçilərimizdən dünya və Avropa birincisi Həsən Əliyev və olimpiya çempionu Rövşən Bayramov da “Acıbadem” xəstəxanasında müalicə alıblar. Bunları nəzərə alaraq yaxın gələcəkdə Azərbaycanda da “Acıbadem” tibb mərkəzini yaratmağı planlaşdırırıq".

Daha sonra danışan Türkiyə Futbol Federasiyasının (TFF) tibbi personalının rəhbəri Ömər Taşer "Acıbadem"də azərbaycanlı idmançılara yüksək səviyyədə xidmıt göstərildiyini bildirib: "Azərbaycanlı idmançılar əsasən diz zədələri ilə əlaqədar “Acıbadem” tibb mərkəzinə müraciət edirlər. Üstəlik azərbaycanlı futbolçuların tibb mərkəzinə gec müraciət etmələri də onların bərpa prosesini uzadır. Əgər həmin futbolçular vaxtında “Acıbadem”ə müraciət etsələr, onların yaşıl meydanlara qayıtması tezləşə bilər. Bununla belə, burada azərbaycanlı idmançılara yüksək xidmət göstərilir. 

Azərbaycan millisinin üzvü Ufuq Budaq ötən ilin iyul ayında bizə müraciət etdi. Diz bağlarından əməliyyat olunacaq futbolçuya minskı tikməyi məsləhət gördük. Lakin futbolçu bundan imtina edərək Almaniyaya üz tutdu. Çünki belədə futbolçunun yaşıl meydanlara qayıtması uzun çəkəcəkdi. Biz futbolçunun diz bağlarındakı minskı kəsə də bilərik. Ancaq belədə futbolçunun karyerası erkən baça çatacaqdı. Ona görə də biz minskı tikməyi təklif etdik. Bununla razılaşmayan Ufuq isə Almaniyaya yollandı. Onun sonrakı taleyindən xəbərim olmadı. Əgər diz bağlarındakı minskı kəsdirərək yaşıl meydanlara qayıdıbsa, o, karyerasını erkən bitirə bilər”.