"Belə komandalara qarşı oynamaq millimiz üçün həmişə çətin olur"

“Qarabağ”ı Çempionlar Liqasında Liqa mərhələsinə yüksəlməsinə görə təbrik edirəm. Azərbaycanı ikinci dəfə bu mötəbər turnirdə təmsil edəcəklər. Çempionlar Liqasında zəif rəqib olmur. Məncə, “Çelsi” istisna olmaqla evdə qarşılaşacaqları rəqiblər nisbətən münasibdir”.

Bu sözləri QOL.az-a açıqlamasında futbol mütəxəssisi Yunis Hüseynov deyib.

“Qarabağ”ın Çempionlar Liqasının Liqa mərhələsindəki rəqibləri haqda danışan Hüseynov qeyd edib ki, “Ayaks” (Niderland), “Kopenhagen” (Danimarka) və “Ayntraxt”la (Almaniya) görüşlərdə nəticə əldə etmək olar:

“Qarabağ” “Ayaks”la bir dəfə oynayıb. Çox yaxşı çıxış etmişdilər. Qırmızı vərəqə almasaydılar, qalib də gələ bilərdilər. “Ayntraxt”ı da tanıyırıq, “Kopenhagen”i də. Məncə, evdə bu komandalara qarşı oynamaq mümkündür. Həm də “Qarabağ” onları tanıyır. O ki qaldı səfər matçlarına, bu oyunlar daha çətin olacaq. Həm səfərdə olduğuna görə, həm də digərlərindən güclüdürlər. Söhbət “Liverpul”, “Napoli”, “Atletik” və “Benfika” kimi klublardan gedir. Amma inanıram ki, “Qarabağ” hər bir oyuna yaxşı motivasiya ilə çıxacaq və azarkeşləri sevindirəcək. Azərkeşlərdən söz düşmüşkən, “Qarabağ”ın bu sarıdan problemi yoxdur. Bakıdakı hər görüşdə stadion dolur. Bütün Azərbaycan “Qarabağ”ı dəstəkləyir. Komanda həmişə bu azarkeşlər qarşısında yaxşı oyun göstərir. Düşünürəm ki, Bakıdakı oyunlarda “Qarabağ” yaxşı nəticələr əldə edə bilər”. 

Yunis Hüseynov

Y.Hüseynov “Qarabağ”ın turnirdə xallar yığa biləcəyinə inanır: “Məncə, 5-6 və daha çox xal yığa bilərlər. Çünki Çempionlar Liqasında oynamaq hər bir futbolçunun arzusudur. “Qarabağ”ın futbolçuları da o hissi yaşayırlar və özlərini ən yaxşı tərəfdən göstərəcəklər. Məncə, o istəklə qələbələr qazanmaq olar”. 

Y.Hüseynov “Qarabağ”ın yeni hücumçu transferini həyata keçirə bilməməsinə də toxunub: “Qurban müəllim özü də düşünür ki, bir hücumçu ala bilsələr, daha yaxşı olardı. Hər halda klub da buna çalışırdı. Amma mənə elə gəlir ki, Nəriman Axundzadə son oyunlarda özünü yaxşı tərəfdən göstərir. Bu heyətlə Liqa mərhələsinə düşüblərsə, deməli bundan sonra da nəsə əldə etmək olar”. 

Azərbaycan millisinin keçmiş hücumçusu yığmamızın DÇ-2026-nın seçmə mərhələsində sentybarın 5-də səfərdə İslandiya və sentyabrın 9-da Bakıda Ukrayna ilə keçiriləcək oyunları haqda da danışıb: “Hər iki görüş çətin olacaq. Əsas da Ukrayna ilə oyun. İslandiya həmişə güc futboluna üstünlük verir, biz isə topla oyuna. Həmişə bu cür ikinci mərtəbədən oynayan komandalara qarşı çıxış etmək bizim üçün çətin olur. Yəni indiyə qədər belə komandalara qarşı oyunlarda yaxşı nəticələr əldə etməmişik. İkinci mərtəbədə oynamaqla bağlı axsamalarımız var. İslandiya da güc futbolu oynayacaq. Buna baxmayaraq, seçmə mərhələnin ilk oyunudur və məncə, futbolçularımız millidə oynadıqları üçün qürur hissi keçirirlər. Yeni futbolçular da var. Onlar da var güclərini ortaya qoyacaqlar. Bu halda nəticə əldə etmək olar. Amma qeyd edim ki, çox çətin oyunlardır”.

Ramiq Ağaməmmədov