"Qarabağ"ın bir addımlığında olduğu ÇL-in Liqa mərhələsi - Orada hansı nəhənglər var?

Azərbaycan çempionu "Qarabağ" tarixində ikinci dəfə UEFA Çempionlar Liqasının Liqa mərhələsində (keçmiş adı və formatı qrup mərhələsi) oynamağa yaxındır. 

QOL.az xəbər verir ki, Ağdam təmsilçisi artıq ÇL-in pley-off mərhələsinə vəsiqə qazanıb. Orada "Kəhər atlar" Macarıstanın ən köklü komandalarından "yaşıl qartallar" deyə də çağırılan Budapeşt "Ferensvaroş"u ilə qarşılaşacaq. 126 yaşlı bu klub 36 dəfə ölkəsinin çempionu olub. Komandalar arasında ilk görüş avqustun 19-da Budapeştdə, cavab oyunu avqustun 27-si Bakıda keçiriləcək.

Xatırladaq ki, "Qarabağ" “Ferensvaroş”la artıq bir dəfə Çempionlar Liqasının 3-cü təsnifat mərhələsində üz-üzə gəlib. 2022-ci ildə Qurban Qurbanovun komandası evdə 1:1 hesabı ilə heç-heçə etdiyi "Ferensvaroş"a Macarıstanda 3:1 hesabı ilə qalib gələrək pley-off-a yüksəlib.

"Qarabağ" ÇL-in qrup mərhələsində ilk və hələlik sonuncu dəfə 2017-18 mövsümündə çıxış edib. Daha sonra komanda 2 dəfə (2022 və 2024-cü illərdə) ÇL-də əsas mərhələyə düşməyə yaxın olsa da, müvafiq olaraq "Viktoriya" (Çexiya) və "Dinamo"ya (Zaqreb, Xorvatiya) uduzaraq pley-off-da mübarizəni dayandırıb.

"Atletiko" - "Qarabağ" matçından (1:1) bir an... Miçel Madriddə hesabı açır

ÇL-in Liqa mərhələsində kimlər var: PSJ, "Barselona", "Liverpul"...

2025/26 mövsümü Çempionlar Liqasının Liqa mərhələsi 36 komandanın iştirakı ilə keçiriləcək. Maraqlıdır ki, yarışın finalı "Ferensvaroş"un ev oyunlarını keçirdiyi "Ferens Puşkaş" adına stadionda olacaq (30 may, 2026-cı il).

Hər komanda Liqa mərhələsində 8 fərqli rəqiblə bir matç keçirəcək (4-ü evdə, 4-ü səfərdə). Yekunda 1-8-ci yeri tutanlar 1/8 finala, 9-24-cü yeri tutanlar isə pley-off mərhələsinə (şərti olaraq 1/16 final) vəsiqə qazanacaq. Bu cütün qalibləri 1/8-i təmin etmiş 8 komandaya rəqib olacaqlar.

Qeyd edək ki, 2024/25 mövsümü yekunlaşandan sonra artıq 29 komanda ÇL-in əsas mərhələsində iştirak etmək hüququ qazanıb. Daha yeddi iştirakçı isə avqustda başa çatacaq pley-off raundundan sonra Liqa mərhələsinə vəsiqə əldə edəcək. Yarışda ən çox iştirakçı (6 komanda) ilə İngiltərə Premyer Liqası təmsil olunacaq.

Bəs, "Ferensvaroş" - "Qarabağ" cütünün qalibini ÇL-in liqa mərhələsində hansı nəhəng komandalar gözləyir?

Gəlin, bu adlara nəzər salaq:

İngiltərə

"Liverpul"
"Arsenal"
"Mançester Siti"
"Nyukasl"
"Tottenhem"
"Çelsi"

İtaliya

"Napoli"
"İnter"
"Atalanta" 
"Yuventus"

İspaniya

"Barselona"
"Real" (Madrid)
"Atletik"
"Atletiko" 
"Vilyareal"

Almaniya

"Bavariya"
"Bayer"
"Borussiya" (Dortmund)
"Ayntraxt" 

Fransa

PSJ
"Olimpik"
"Monako"

Niderland

"Ayaks" 
PSV

Portuqaliya

"Sportinq"

Belçika

"Yunion"

Türkiyə

"Qalatasaray"

Çexiya

"Slaviya" (Praqa)

Yunanıstan

"Olimpiakos"

Həmçinin pley-off mərhələsində aşağıda qeyd edilən 7 cütün qalibi olacaq komandalar:

"Ferensvaroş" (Macarıstan) - "Qarabağ" (Azərbaycan)

"Srvena Zvezda" (Serbiya) - "Pafos" (Kipr)

"Reyncers" (Şotlandiya) - "Brügge" (Belçika)

"Budo/Qlimt" (Norveç) - "Şturm" (Avstriya)

"Seltik" (Şotlandiya) - "Kayrat" (Qazaxıstan)

"Bazel" (İsveçrə) - "Kopenhagen" (Danimarka)

"Fənərbaxça" (Türkiyə) - "Benfika" (Portuqaliya)

Qeyd edək ki, ÇL-də Liqa mərhələsinin püşkü avqustun 28-də atılacaq. İlk turun oyunları 16-18 sentyabrda keçiriləcək.