"Bəzən stadion tapa bilməyib məşqi ləğv edirdik” – “Araz-Naxçıvan”ın məşqçisi

“Əvvəl mənə təklif gələndə oynamaq istəmirdim. Çünki dizimin çarpaz bağlarından əməliyyat olunmuşam. Dizimi bağladım, birtəhər, qorxa-qorxa oynadım. Amma şükürlər olsun ki, yaxşı oldu”. 

Bu sözləri QOL.az-a açıqlamasında Azərbaycan millisinin sabiq üzvü Əfran İsmayılov ölkə futbolunun əfsanələri arasında keçirilən matç haqda danışarkən deyib.

“Legends Cup”da “Neftçi 2000-lər” və “Premyer Liqa məşqçiləri”i qarşılaşıb və ikincilər penaltilər seriyasına qalib gəlib – 3:2.  “Premyer Liqa məşqçiləri”nin heyətində çıxış edən İsmayılov belə oyunların tez-tez keçirilməli olduğunu bildirib: “Həqiqətən də möhtəşəm atmosfer var idi. Belə oyun həm bizim üçün maraqlı olur, həm futbol ictimaiəti və azarkeşləri üçün. Baxmyaraq ki, kuboku qazanmaq önəmli deyildi, qardaşlıq oyunu idi. Amma yenə də sevindiricidir ki, qalib gəldik. Heç kim uduzmaq istəmirdi. 

Ehtiyat oyunçular skamyasında oturanda bir mənzərəni də müşahidə etdim. Gördüm ki, 1-2 nəfəri çıxmaqla hamısı hocanın (Qurban Qurbanovu nəzərə tutur – red.) tələbəsidir: Samir Abasov, Rəşad Sadiqov, Rəşad Sadıqov, Əfran İsmayılov, Vaqif Cavadov, Elvin Məmmədov, Ayxan Abbasov. Digər komandada da var idi. Həqiqətən bu insanlarla futbol oynamaq sevindirici və maraqlı idi. Düşünürəm ki, maraqlı bir oyun oldu. Təşkilatçılığa görə Minifutbol Federasiyasına təşəkkür edirəm”.

“Araz-Naxçıvan” klubunun məşqçisi mövcud çətinliklərlə bu mövsümü 3-cü pillədə başa vurmaqlarını və Konfrans Liqasına vəsiqə əldə etməklərini böyük uğur adlandırıb: “Sizin təsəvvür etmədiyiniz qədər çətinliklərimiz var. Elə günümüz olurdu ki, stadion tapa bilmirdik və məşqi ləğv edirdik. Düşünün ki, belə vəziyyətlərimiz olub. Amma şükürlər olsun ki, futbolçular əziyyətimizi yerə vurmadılar. Onlar özləri çox əziyyət çəkdilər. Məşqçi heyətimiz də geniş deyil. Cəmi 3-4 məşqçimiz var. Başqalarının 7-8 məşqçisi var. Hamımız çalışdıq, vuruşduq, futbolçularla, rəhbərliklə bir yerdə bura qədər gəlib çıxdıq. Mənim üçün çox sevindiricidir ki, məşqçi kimi ilk illərimdə avrokuboklarda iştirak edəcəyik. Məşqçi işi çox məsuliyyətlidir. Neçə vaxtdır ki, stress keçirirdik. Bir gün süni örtükdə, bir gün təbii örtükdə məşq edirdik. Bəzən də heç stadion tapmırdıq. Bir gün trenajor zalına gedirdik. Yəni aləmi vurmuşduq bir-birinə, hər əziyyətə qatlaşırdıq. Düşünürdük necə edək ki, istəyimizə çataq. Şükürlər olsun ki, çox əziyyətlərə baxmyaraq, bunu bacardıq. Bizim üçün böyük uğurdur. Böyük uğur ona görə deyirəm ki, qıraqdan görünməyən çox şeylər var. Başda Zaur Axundov olmaqla klubumuzun bütün kollektivini və Naxçıvan camaatını təbrik edirəm”.

Ə.İsmayılov qeyd edib ki, avrokubok təcrübələri olmasa da, Konfrans Liqasında da yaxşı nəticə üçün mübarizə aparacaqlar: “Mövsüm bitdikdən sonra danışacağıq. Komandamıza güclənmək lazımdır. Bacardığımız qədər irəli getməliyik. Düzdür, çətin olacaq. Çünk ilk ilimizdir, təcrübəmiz az olacaq. Püşkdən də çox şey asılıdır. Amma hər bir çətinlikdən sonra işlər asanlaşır. Əziyyətlə bu yerə gəlmişiksə, bundan sonra da zəhmətimizin sayəsində uğur qazana bilərik. Avrokuboklarda da yaxşı nəticə qazanmağın yollarını axtarırıq, bunun üzərində işləyirik”.

Ramiq Ağaməmmədov