"Sabah"la qarşılaşmaq "Makkabi" üçün asan olmayacaq" - Elvin Camalov

"Rəqibimiz həqiqətən də güclüdür. Bəlkə də püşkün ən güclüsü bizə düşdü. Amma biz də özümüzə, komandamıza inanırıq. Əlimizdən gələni edəcəyik ki, hamını sevindirək".

Bu sözləri QOL.az saytına açıqlamasında "Sabah"ın kapitanı Elvin Camalov deyib. O, Konfrans Liqasının 2-ci təsnifat mərhələsinin püşkünü dəyərləndirib. Püşkü nəticələrinə əsasən, Bakı təmsilçisi bu mərhələdə İsrail "Makkabi"si (Hayfa) ilə üz-üzə gələcək. 

29 yaşlı yarımmüdafiəçi "Makkabi"ni məğlub etmək və turnirdə maksimum irəliləmək üçün əllərindən gələni edəcəklərini deyib: "Şükürlər olsun, çempionatı yaxşı pillədə başa vurduq. Əziyyətimizin bəhrəsini gördük. Əlbəttə ki, indi Konfrans Liqasındakı ilk oyunumuzu düşünürük. Çətin rəqiblə qarşılaşacağımız püşkatmadan öncə də bəlli idi. Avrokuboklara vəsiqə qazanan komandaların hamısı öz ölkələrinin ən güclüləridir. Yəni, istənilən halda heç bir rəqibi asan adlandırmaq düzgün olmaz. Amma fikrimcə, mümkün rəqiblər arasından ən çətin variantla üzləşdik. İstənilən halda narazılıq etməyə dəyməz. Meydana çıxıb ən yaxşı şəkildə mübarizə aparmalıyıq. Bacardığımız qədər irəliləmək, əlimizdən gələni etmək istəyirik ki, həm "Sabah" adına, həm də öz adımıza uğur qazanaq. Ötən mövsüm "Partizan"ı keçə bilməmişdik. Onda da şanslarımız çox idi, sadəcə yararlana bilməmişdik. Bu il isə çalışacağıq ki, əlimizdən gələnin ən yaxşısını edək, yarıda dayanmayaq. Ötən mövsümə nisbətən bu il daha da irəliləmək istəyirik. İnanıram ki, "Makkabi" ilə oyunlarda yaxşı nəticə qazanaraq azarkeşlərimizi, bizə inananları sevindirəcəyik".

İsraildəki müharibə şəraiti səbəbindən "Sabah" "Makkabi" ilə ilk görüşünü - səfər oyununu Macarıstanda keçirməli olacaq. E.Camalov bu məsələyə də toxunub: "Bu, azarkeş baxımından istər-istəməz bizim üçün üstünlük yaradır. Amma futbol meydanda oynanılır. Biz də meydanda sözümüzü demək istəyirik. Oyunu başqa ölkədə keçirməyimiz azarkeş baxımından matça təsir göstərəcək. Evdə oynamaq bizə necə müsbət təsir edirsə, onlara da o cür təsir edir. Rəqibin ev oyununu öz meydanında keçirməməyi bizim üçün avantaj sayıla bilər. Yenə də "Makkabi" güclü rəqibdir. Real yanaşaq. Lakin əlimizi yanımıza salaq ki, rəqib güclüdür və ya uduzaq, deyək ki, güclü rəqibə qarşı oynamışıq, bunlar düzgün fikirlər deyil. Bizim komandamızın da özünə uyğun oyun əmsalı var. Özünüz də şahid olmusunuz. "Sabah" yaxşı oyun oynaya bilən və istədiyi nəticəni qazanmağa qadir olan komandadır. Məncə, "Neftçi" ilə son matçdakı kimi və ya bundan da yaxşı oynasaq, rəqib üçün də bizimlə qarşılaşmaq asan olmayacaq. Düşünürəm ki, səfərdə sərfəli nəticə əldə etsək, evdə hər şey daha yaxşı olacaq".

O, "Sabah"ın "Makkabi"dən çəkinməyəcəyini deyib: "Əlbəttə ki, heç bir komandadan çəkinməməliyik. Mən komandanın içindəyəm və kapitanıyam. Bilirəm ki, bizim futbolçularımız nəyə qadirdir. "Neftçi" ilə matçdakı kimi ürəkdən, can qoyaraq oynayanda, meydanın hər bir qarışı üçün mübarizə aparanda hesabın heç bir önəmi olmur".

Qeyd edək ki, Konfransa Liqasında 2-ci turun matçları iyulun 25-də və avqustun 1-də oynanılacaq. "Sabah" ilk oyunu səfərdə, cavab görüşünü isə Bakıda keçirəcək.