“Qurban Qurbanovla işləmək özü bir uğurdur” – İlqar Qurbanov

“Qəbələ”nin müdafiəçisi İlqar Qurbanov “Qəbələ” İdman Klubunun boks bölməsinin rəhbəri Fariz Məmmədovun “Böyük qayıdış” filminin təqdimat mərasimindən sonra Qol.az-ın suallarını cavablandırıb.

- Film xoşuna gəldimi?

- Çox gözəl və mənalı filmdir. Adamın damarlarına işləyir. İdman həyatında bu cür hadisələri görəndə daha da həvəslənirsən, bu işə daha bərk sarılırsan. Məncə, bu film hər kəs üçün nümunədir. Məni daha da ruhlandırdı.

- Keçək “Qəbələ”yə. Komandanız fasiləyə 2-ci pillədə yollandı. Çıxışınızı necə dəyərləndirirsən?

- Son oyunlarda yaxşı təsir bağışladıq. Qələbə ilə bitirdik. Kubokda yarımfinala çıxdıq, çempionatda isə 2-ci pillədəyik. “Qarabağ”dan 6 xal geridəyik, amma elə də böyük fərq deyil. Təlim-məşq toplanışından maksimum şəkildə yararlanmalıyıq.

- "Qəbələ"nin vite-prezidenti Fariz Nəcəfov da qeyd etdi ki, komanda qeyri-sabit çıxış edir. İkinci dövrədə də bu cür halla üzləşəcəyinizdən qorxmursan?

- Mən qeyri-sabit çıxışımızı zədə ilə bağlayıram. Çünki komandada ciddi itkilər oldu. Mən, Filip, Dion sıradan çıxdıq. Çox maraqlı, karyeramda görmədiyim zədələr idi. Meydana tam heyətlə çıxa bilmirdik. Amma son oyunlarda bu problemi aradan qaldırdıq və ardıcıl qələbələr qazandıq.

- Son illərin ən uzun qış fasiləsi olacaq. Bu müddət komandaya nə dərəcədə təsir edəcək?

- Fasilə müddətinin çox olmasını müsbət hal kimi qiymətləndirirəm. Hazırlaşmaq üçün vaxtımız nə qədər çox olsa, bir o qədər yaxşıdır. Toplanışı yaxşı dəyərləndirməliyik.

- Zədədən sonra əsasən əvəzetmədən meydana daxil olursan. Bu, səni narahat etmir?

- Yox. Çünki tam hazır deyiləm. Bir az da vaxta ehtiyacım var. 3 ay oynamadım, çox ağır zədə almışdım. Əslində fasilənin uzun olması mənim xeyirimədir. Antalyada yaxşı hazırlıq keçib, əvvəlki formamı qaytarmağa çalışacam.

- Fasilədən sonra ilk turda “Qarabağ”la qarşılaşacaqsınız. Düzdür, həmin oyundan sonra qarşıda hələ 13 tur qalacaq. Amma məğlubiyyət xal fərqini 9-a çıxaracaq. Bu baxımdan “Qarabağ”la görüşü çempionluq baxımından həlledici saymaq olarmı?

- Bəli. Çünki uduzsaq, 9 xallıq fərq yaranacaq. Hazırkı çempionat da elə güclü deyil. 8 komanda mübarizə aparır. “Qarabağ” nadir hallarda xal itirir. Ona görə də məğlub olsaq, işimizi çətinə salacağıq.

- Kubokda “Qarabağ”ın “Sumqayıt”a uduzub mübarizəni dayandırması sizi ümidləndirdimi?

- Biz “Qarabağ”ın nəticəsinə yox, öz oyunumuza baxırıq. “Sumqayıt”ı kiçiltmək onlara haqsızlıq etmək deməkdir. Çünki Samir Abasov çox yaxşı komanda yaradıb. Düzdür, ciddi, güclü bir komanda kubokdan kənarlaşdırıldı. Amma digər rəqiblər də güclüdür. Yenə də çətin olacaq.

- Fariz Nəcəfov bu yaxınlarda mətbuata müsahibəsində legioner limitinin artırılması ilə bağlı fikirlər səsləndirmişdi. Səncə, limit dəyişdirilsə, bu, onsuz da oyun təcrübəsi baxımından əziyyət çəkən yerli futbolçuların vəziyyətini bir az da ağırlaşdırmayacaq?

- Bu barədə mənim nəsə deməyim nə dərəcədə düzgündür, bilmirəm. Amma biz limitsiz vaxtlarda da oynayaraq buralara gəlib çıxmışıq. “Xəzər Lənkəran” o vaxt çempion olanda, heyətdə 10-11 legioner çıxış edirdi. Bunu limitə bağlamıram. Futbolçu öz üzərində işləyəcəksə, özünü yaxşı tərəfdən göstərəcəksə, ona limit mane olmaz.

- Qurban Qurbanovun başçılığı altında oynamısan, səni yaxşı tanıyır. Səncə, onun milliyə baş məşqçi təyin olunması yığmaya yolunu aça bilərmi?

- Hələlik bu barədə fikirləşmirəm. Yalnız “Qəbələ”ni düşünürəm. Uğurlar arzu edirəm. Azərbaycan futbolu üçün uğurlu addım hesab edirəm. Əsas da yerli gənclərimiz üçün. Bundan maksimum yararlansınlar, dəyərini bilsinlər. Çünki Qurban Qurbanovla işləmək özü bir uğurdur.

Elnur SALAHOV