“Bu, bizim üçün tarixi hadisədir” – Qriqorçuk

"Qəbələ"nin baş məşqçisi Roman Qriqorçukun müsahibəsi

- Avropa Liqasının II təsnifat mərhələsində  MTK ilə cavab oyununa hazırlıq necə gedir?

- Hazırlığımız plan üzrə davam edir. Xüsusi bir yenilik yoxdu. Hər zaman olduğu kimi ciddiyətimizi qoruyuruq. Çünki bizi çətin oyun gözləyir.

- Komanda tarixində ilk dəfə olaraq səfərdə keçirilən Avroliqa matçında qalib gəldi. Maraqlıdı, səfərə sərfəli nəticə üçün getmişdiniz, yoxsa yalnız qələbə haqda düşünürdüz?

- Biz hər dəfə səfərə qələbə üçün gedirik. Başqa fikri ağlımıza da gətirmirik. Macarıstana gedəndə də fikrimiz dəyişməmişdi. Qələbə qazandıq və buna görə də çox şadıq.

- Təbii ki, oyundan əvvəl MTK-nı analiz etmişdiniz. Maraqlıdı, meydanda analiz etdiyiniz rəqibi gördünüz, yoxsa tamam fərqli komandaya qarşı oynadınız?

- Çox fərq oldu. Onlar çoxgedişli kombinasiyalar etməyi yaxşı bacarır. Bundan başqa meydanda fiziki cəhətdən üstün olan komanda gördüm.

- Matçın əvvəlində "Qəbələ"nin qapısına təyin edilən penalti qola çevrilsəydi, bu, komandanın tez ruhdan düşməsi ilə nəticələnə bilərdimi?

- Ümumi götürəndə oyun təsəvvür etdiyim formada davam etdi. Mən də bilirəm ki, orada penalti yox idi. Qol olsaydı... Bilirsiz, bunlar hamısı söz-söhbətlərdi. Bir şeyi dəqiq bilirəm ki, komandam kişi kimi oyuna davam edəcəkdi. Ruhdan düşməyəcəklərinə əminəm.

- Macarıstan təmsilçisinin çalışdırıcısı 1:2 hesabı ilə məğlub olduqları qarşılaşmadan sonra "Bakıya mərhələ adlamağa gedəcəyik" deyib. Bu, nə dərəcədə real görünür?

- Bu barədə nəsə demək istəmirəm. Ümumiyyətlə, müzakirə etməyimizin mənası da yoxdu. Onun fikirlərinə də hörmətlə yanaşıram. Cavab matçından sonra hər şeyə aydınlıq gələcək.

- Yəqin ki, püşkatma mərasimini izləmisiniz.

- Təbii ki. Püşk mərasimi diqqətimizdə idi.

- Hansı rəqibi arzulayırdınız ki?

- Düzü, bu barədə düşünmürdüm. Çünki bizi qarşıda çətin oyun gözləyir. Buna görə də növbəti mərhələ barədə düşünmək indidən çox tez və çətindi. MTK səddini adlaya bilsək, "Lill"i də müzakirə edərik.

- Potensial rəqiblər arasında ötən mövsüm devirdiyiniz "Panatinaikos" da var idi. Yunan təmsilçisinin bu dəfə də qarşınıza çıxması, xoş xatirələri canlandırardımı?

- Fikirləşirəm ki, "Lill" daha maraqlı rəqibdi. Bu, bizim üçün həm əla şans, həm də tarixi hadisədi. MTK səddini adlayıb, Fransa klubu ilə qarşılaşmağın özü də bizim xeyrimizədi.

- Andrey Şevçenkonun Ukrayna millisinə baş məşqçi təyin olunmasına münasibətinizə necədi?

- Şevçenkoya millidə uğurlar və yaxşı nəticələr arzulayıram. Ukrayna futbol ölkəsidi. Buna görə də ən yüksək nəticələri qazanacağına inanıram.

- Olan olub, keçən keçib. Millinin baş məşqçisi də, sizin "Qəbələ"də qaldığınız da bəllidi. Həqiqətən də Şevçenkodan qabaq Ukrayna millisində baş məşqçi olmağınız üçün sizə təklif gəlmişdi?

- Belə suallara cavab verməkdən qaçıram. Çünki mövcud olan məsələlərdən danışmağı sevirəm. Hər zaman real məsələlərdən danışmaq lazımdı. Buna görə də yenə bu sualdan yayınacam (gülür).

Mənbə: Sport7.az