Messi: “Bu, qol yox, sənət əsəri idi”

Argentina millisinin futbolçusu Lionel Messi DÇ-2014 haqda xarici mətbuata müsahibə verib. Qol.Az saytı müsahibəni təqdim edir

- DÇ-2014-ün finalında Argentina və Braziliya yığmaları qarşılaşa bilər. Əgər gerçəkləşsə, bu, hər kəsin gözlədiyi final olacaqmı?

- Təbii ki, Cənubi Amerika ölkələrinin oynayacağı final özəl olacaq. Cənubi amerikalı azarkeşlər komandalarını sona kimi dəstəkləyirlər. Dünya çempionatının finalında oynamaq hər futbolçunun arzusudur. Amma bunun üçün əvvəlcə Hollandiyanı məğlub etməliyik.

- Dünya çempionatında vurduğun qollarla sənin yaxşı çıxışına şübhə ilə yanaşanları haqsız çıxardığın  düşünürsənmi?

- İnsanların haqqımda nə düşündüyünə çox önəm verməməyə və komandamı fikirləşməyə çalışıram. Çünki oynadığımız futbol bizim necə bir komanda olduğumuzu göstərir. Mən qol vurmağa davam etdikcə Argentina da turnirdə daha yaxşı yerlərə yüksələcək. Mənim üçün önəmli olan da budur.

- İndiyə kimi dünya çempionatındakı çıxışdan məmnunsanmı?

- Komanda yaxşı oynayır. Yarımfinala yüksəlmək üçün çox çalışdıq. İsveçrə ilə matç bizim üçün bir sınaq oldu. Güclü müdafiəçilərimiz var. Bu da hücum edərkən belə bizə güvən verir. Bir komanda olaraq birləşmişik.

- Mundialda bəyəndiyin futbolçular kimdir?

- Kolumbiya millisinin futbolçusu Xames Rodriqesin çıxışını çox bəyəndim. Onun Uruqvaya vurduğu qol sanki sənət əsəri idi.

- İspaniyanın DÇ-2014-lə erkən vidalaşması haqda nə düşünürsən?

- İspaniya çox çətin qrupda mübarizə apardı. Bu dünya çempionatı sürprizlərə dolu oldu. Bir çox məşhur komanda daha az tanınmış futbol ölkələrinə uduzdu. İspaniya yığmasının çox yaxşı futbolçuları var. Əminəm ki, onlar bundan sonrakı turnirlərdə daha uğurlu çıxış edəcəklər.

- Dünya çempionatında vurulan qol sayı haqda nə düşünürsən? Brazuka ilə oynamaq necədir?

- Möhtəşəm! İnsanlar bu dünya çempionatı haqda uzun illər danışacaqlar. Çünki burada hər matç həyəcanlıdır. Mən də bu turnirdə iştirak etdiyim üçün sevinirəm. Brazuka ilə oynamaq isə mənə xüsusi zövq verir. Hər bir dünya çempionatının ikonik bir topa ehtiyacı var. Brazuka da bu DÇ-in simvollarından biridir.

-"Qızıl buts", yoxsa dünya kuboku?

- Təbii ki, dünya kuboku. Dünya çempionu olmaq hər futbolçu üçün ən böyük uğurdur. Uşaqlığımdan ən birinci arzum dünya kubokunu qazanmaq olub. Bunun üçün əlimdən gələnin ən yaxşısını etməyə çalışıram.

- Kapitan olaraq üzərində daha çox təzyiq hiss edirsənmi?

-Bu, normal bir təzyiqdir. Argentina millisinin kapitanı olmaq mənim üçün şərəfdir.  Matçlarda yaxşı oynamağa  çalışıram.  Azarkeşlərin mənə olan etimadını dünya kubokunu qazanmaqla doğrultmaq istəyirəm.