«Bakı» klubu daha bir ilkə imza atmağa hazırlaşır

“Son illər dünya futbolunun inkişafı və azarkeşlərin bu idman növünə marağı göz qabağındadır. Artıq ölkəmizdə də futbolun inkişafı üçün yaxşı şərait yaradılıb və tərəfdarların klublara marağı artıb. “Bakı” Futbol Klubu olaraq, biz də bu marağı nəzərə alıb, klubun hazırkı və vəziyyəti və imkanları daxilində bu proyekti hazırladıq”.

Bu sözləri Qol.Az-ın müxbiri ilə söhbətində “Bakı”nın Marketinq və Media Departamentinin rəhbəri Nəriman Mehdiyev “Bakı” Web TV-nin yaranması zərurəti haqda danışarkən Qol.Az-a bildirib. Onun sözlərinə görə, layihə hazır olduqdan sonra, bu barədə klubun prezidenti Hafiz Məmmədova fikirlərini bildiriblər: «Hafiz müəllim də heç tərəddüd etmədən bu layihəmizi dəstəklədi. «Azərbaycanda futbolun inkişafına dair dövlət proqramında” bununla bağlı bir bənd var. Əgər bu proqramla tanışsınızsa, onun 4-cü bəndində futbolun təbliğat və təşviqatı xüsusi vurğulanır. Bütün bunları nəzərə alıb, belə bir layihə hazırladıq və mən deyərdim ki, uğurlu alındı».
N.Mehdiyevin sözlərinə görə, “Bakı” WEB TV vasitəsilə komandanın bütün yaş qruplarının oyunları canlı yayımlanacaq: «Təsəvvür edin, valideynlər, uşaqlar evlərində oturub, oyunlara canlı baxa biləcəklər. Bu Azərbaycanda bir ilkdir. Bundan başqa, gələcəkdə “Bakı”nın Premyer Liqada keçirdiyi ev oyunları da canlı yayımlanacaq. Bildiyiniz kimi, səfər oyunlarında yayım hüququ ev sahibi olan komandalara məxsus olur. Əgər həmin klubların razılığını ala bilsək, komandamızın səfər görüşləri də  Web TV vasitəsilə yayımlanacaq”.

Mehdiyev Web TV-nin özəllikləri barədə də məlumat verib: “Ümumiyyətlə WEB TV-nin ən önəmli özəlliyi odur ki, canlı yayımlanan oyun qurtardıqdan sonra onun  arxivində saxlanılır. Yəni matçı canlı izləmək imkanı olmayan şəxslər WEB TV-nin arxivinə daxil olaraq, oyuna baxa bilərlər. Bundan başqa, səfərdə olanlar, televiziya vasitəsilə oyunlara baxa bilməyənlər “Bakı” WEB TV vasitəsilə komandanın oyunlarını izləyə bilərlər”.

Klub rəsmisi Web TV-nin açılmasına baxmayaraq, hazırda “Bakı”nın Premyer Liqada keçirdiyi oyunların yayım hüququna malik olan “İdman Azərbaycan” telekanalı ilə əməkdaşlığı davam etdirəcəkləri bildirib: “İdman Azərbaycan” peyk vasitəsilə yayımlanır. Nəticədə, “Bakı”nın oyunlarını Azərbaycandan uzaqda olan azarkeşlər də izləyirlər. Evlərində kompyuter, internet olmayanlar matçlara məhz telekanal vasitəsilə baxırlar. “İdman Azərbaycan” telekanalı ilə əməkdaşlığımızı gələcəkdə davam etdirmək istəyirik. Ümumiyyətlə, “Bakı” Futbol Klubu media ilə münasibətləri həmişə yaxşı saxlamağa çalışır”.

N.Mehdiyev gələcəkdə “Bakı” TV-nin də fəaliyyətə başlamasının mümkünlüyünü də vurğulayıb: “Bu, hər bir klubun arzusudur ki, onun özəl telekanalı olsun. Bizim də bununla bağlı proyektlərimiz var. Amma hələ ki, əlimizdəki imkalara görə, Web TV-ni yaratdıq. Gələcəkdə televiziya kanalımız da fəaliyyətə başlaya bilər”.

Departamentin rəhbəri “Bakı”nın ölkə xaricindən gətirdiyi reklam lövhələrinin aqibəti barədə isə bunları deyib: “Reklam lövhələri hazırda bizim bazamızdadır. Bir ara belə bir söhbət çıxdı ki, guya elektron lövhələr futbolçulara mane olur. Ancaq bu lövhələrdən 7-8 ildir ki, istifadə olunur. Bu vaxt ərzində lövhələrə görə heç bir bədbəxt hadisə baş verməyib. Elektron reklam lövhələrini ancaq ali futbol qurumu FİFA qadağan edə bilər ki, hələlik belə bir şey yoxdur. Avrokuboklarda mübarizə aparan komandalarımız öz oyunları zamanı bizə müraciət edib, lövhələrdən istifadə edə bilərlər. Biz burada heç bir kommersiya məqsədi güdmürük. Canla-başla klublarımıza lazımı imkanları yaratmağa hazırıq”.