Milli komandada şok hadisə - 7 futbolçu yoxa çıxdı

Milli komandada şok hadisə - 7 futbolçu yoxa çıxdı
DÜNYA FUTBOLU 6 Aprel 2026 / 11:10 828
-  A +

Eritreya milli komandasında növbəti qalmaqal yaşanıb. 

QOL.az xarici KİV-lərə istinadən yaydığı xəbərə görə, komandanın uzun fasilədən sonra keçirdiyi ilk səfər oyunundan sonra 7 futbolçu ölkəyə qayıtmayıb.

Hadisə Cənubi Afrika Respublikası ərazisində baş verib. Bildirilir ki, futbolçular ölkələrinə dönməmək üçün qaçaraq siyasi sığınacaq almağa çalışırlar.

Məlumata görə, Eritreyada mövcud olan sərt rejim, məhdud azadlıqlar və müddətsiz hərbi xidmət səbəbindən 2009-cu ildən bəri təxminən 70 futbolçu oxşar şəkildə ölkəyə qayıtmaqdan imtina edib.

Qeyd edək ki, Eritreya millisi 2019-cu ilin dekabrından sonra uzun müddət heç bir oyun keçirməyib və hətta FIFA reytinqindən çıxarılıb.

2023-cü ildə komandanın 2026-cı il dünya çempionatının seçmə mərhələsində iştirak etməsi planlaşdırılsa da, yerli hakimiyyət futbolçuların yenidən qaçacağından ehtiyat edərək yığmanı turnirdən geri çəkib.

Buna baxmayaraq, Eritreya millisi 2025-ci ildə iki yoldaşlıq oyunu keçirərək futbola qayıdıb. 2026-cı ildə isə komanda Esvatini üzərində iki qələbə qazanaraq Afrika Millətlər Kubokunun seçmə mərhələsində qrup mərhələsinə vəsiqə əldə edib. Bu, son 19 ildə ilk belə uğur olub.

Cavab görüşü səfərdə keçirilib və bu, millinin uzun illərdən sonra ilk xarici oyunu kimi tarixə düşüb. Lakin komanda bu səfərdən də tam heyətlə qayıtmayıb. 7 futbolçunun yoxa çıxması yenidən ciddi suallar yaradıb.

Son hadisədən sonra Eritreya millisinin yenidən uzunmüddətli izolyasiyaya qayıdacağı istisna edilmir.


Son xəbərlər
topaz banner