Xorvatiya mediası "Zirə" ilə oyundan yazır - "Polyud"da döyüş olacaq"

UEFA Konfrans Liqasının 2-ci təsnifat mərhələsinin iyulun 31-də keçiriləcək "Hayduk" - "Zirə" matçı Xorvatiya idman mediasının gündəmindəki mövzulardandır.

QOL.az xəbər ki, oyun öncəsi bu ölkənin bir necə saytı oyuna yazılar həsr edib.
 
net.hr saytı "Zirə"nin iki aparıcı futbolçusu Brahim Konate və Ange Mutsinzinin cavab görüşündə iştirak etməyəcəyini yazaraq “Hayduk” üçün hər şeyin yoluna düşdüyünü qeyd edir. Ümumiyyətlə, bu media qurumunun yazısında "Hayduk"un qələbəsinə arxayınlıq hiss olunur.

Yazıda bildirilir: “Hayduk” cümə axşamı saat 21:00-da (Bakı vaxtı ilə 23:00-da) “Polyud” stadionunda Konfrans Liqasının ikinci təsnifat mərhələsinin cavab oyununu keçirəcək. "Haydul" ilk oyundan 1:1 hesabı ilə dönür və Azərbaycanın “Zirə” komandası Splitə xeyli zəifləyərək gəlir.

Artıq məlum idi ki, “Hayduk” müdafiəsinə birinci oyunda ciddi problem yaradan Brahim Konate zədə səbəbindən cavab matçında iştirak edə bilməyəcək. İndi isə məlum olub ki, qonaqların əsas müdafiəçisi Ange Mutsinzi də matçı buraxacaq.

"Hayduk" - "Zirə" oyununda 35 minlik "Polyud" stadionunun dolacağı gözlənilir

Ruanda millisinin üzvü olan, “Zirə”nin start heyətində daimi yer alan Mutsinzi Splitə gələn siyahıya salınmayıb. Çünki Avropa İttifaqına giriş üçün vizasını ala bilməyib.

Əgər “Zirə”ni keçməyi bacarsa, “Hayduk” üçüncü təsnifat mərhələsində Andorranın “Atletik Eskaldes” və Tirananın “Dinamo Siti” komandaları arasındakı oyunun qalibi ilə qarşılaşacaq. İlk oyunda Albaniya təmsilçisi səfərdə geri dönüşlə 2:1 qalib gəlib və növbəti mərhələ üçün əsas favorit hesab olunur. “Hayduk”un püşkatmada bəxti gətirib".

Jutarnji.hr saytı isə cavab matçına ehtiyatla yanaşır və bu səbəbdən Splittəki görüşü "böyük döyüş" kimi qələmə verir. 

"Polyud"da böyük döyüş olacaq" başlıqlı yazısında “Zirə”nin baş məşqçisi Rəşad Sadıqovun fikirlərinə geniş yer ayırıb. Yazıda bildirilir ki, "Polyud" stadionunda hazırlıqlar tam sürətlə davam edir. “Hayduk”un yeni baş məşqçisi Qonsalo Qarsiyanın rəhbərliyi altında Konfrans Liqasının seçmə mərhələsindəki həlledici qarşılaşmaya hazırlıq gedir. Rəqib “Zirə”dir. Bakıda ilk oyun 1:1 hesabı ilə başa çatıb. Beləliklə, Splitdə hesab bərabərdir – qələbə avrokuboklarda yola davam etmək, məğlubiyyət isə yenidən erkən mərhələlərdə Avropaya əlvida deməkdir.

Bu qarşılaşma ilə bağlı açıqlama “Zirə”nin baş məşqçisi Rəşad Sadıqov tərəfindən verilib. Onun komandası keçən il "Osiyek"i mübarizədən kənarlaşdırdıqdan sonra bu dəfə də başqa bir xorvat təmsilçisini məğlub etməyə çalışacaq.

“Hər komandanın öz güclü və zəif tərəfləri var – həm bizim, həm də onların. Maraqlı məqamlardan biri budur ki, “Hayduk”un baş məşqçisi oyunun fəlsəfəsini tamamilə dəyişib. Oyunçular indi daha intizamlı və hazırlıqlı görünür, bu, artıq ilk oyunda hiss olunurdu. Hər iki komanda növbəti mərhələyə keçmək istəyir və məncə, Splitdə bizi maraqlı bir oyun gözləyir”.

"Zirə"nin hücumçusu Davit Volkovdan gözlənti qol vurmaqdır... 
 
Sadıqov komandasına tam inamla yanaşır. O hesab edir ki, “Zirə” birinci oyunda “Hayduk”a qarşı layiqli rəqib olub və Qarsiyanın komandası daha güclü tərəf kimi görünməyib.

“Uğurlu keçən mövsümümüz futbolçuların özünəinamını daha da artırdı. Bunu Bakıda ilk hissədə gördük. Demək olar ki, bütün meydan boyunca rəqibə nəfəs almağa imkan vermədik. Mən deməzdim ki, “Hayduk” daha yaxşı oynadı. Sadəcə hər iki tərəfdə təzyiq azalmışdı. Son 10-15 dəqiqədə daha çox təhlükə yaradan biz idik. İki bərabər gücdə komanda bir-biri ilə mübarizə aparır.”

Sadıqov eyni zamanda etiraf edir ki, bu, hələ mövsümün çox erkən mərhələsidir və komandaların fiziki hazırlığı tam formaya çatmayıb".