"Qarabağ"ın 2-ci yer uğrunda əsas rəqibi "Molde"dir"

"Qarabağ"ın 2-ci yer uğrunda əsas rəqibi "Molde"dir"
XƏBƏR 21 Sentyabr 2023 / 12:59 3905
-  A +

"Qarabağ" son matçında "Sabah"a qarşı əla çıxış etdi. "Sabah" kimi güclü komandaya demək olar ki, şans vermədilər. "Qarabağ" uzun müddətdir ki, çempionatda bu heyətlə oynamırdı. Səviyyə fərqi qabarıq şəkildə göründü".

Bu sözləri Qol.az saytına açıqlamasında futbol mütəxəssisi Bəxtiyar Musayev deyib. O, "Qarabağ"ın Avropa Liqasının qrup mərhələsinin 1-ci turunda bu gün Bakıda "Molde"yə qarşı keçirəcəyi oyun haqqında danışıb.

B.Musayev rəqibin güclü tərəflərindən söz açıb və Ağdam təmsilçisinin bu oyunda qələbə qazanmasının vacibliyini vurğulayıb: "Qarabağ"a "Molde" ilə oyunda uğurlar arzu edirəm. Rəqibin "Qalatasaray"la oyunlarına baxdım. Həm komanda şəklində güclüdürlər, həm də fərdi şəkildə güclü futbolçuları var. Ümid edirəm ki, "Qarabağ" qrupdakı ilk matçında qələbə qazanar. Çünki bu, çox vacib amildir. "Bayer" şəksiz qrupun lideri olacaq. Məncə, 2-ci yer uğrunda "Qarabağ"ın əsas rəqibi "Molde"dir. Bugünkü görüşdə qələbə qazanmaq "Qarabağ" üçün böyük təkan ola bilər".

O, komandanın heyətindəki itkilərə də toxunub: "Bəhlul Mustafazadə "Sabah"la görüşdə zədələndi. Bu, itkidir. Marko Veşoviçin oynamayacağı əvvəlcədən bəlli idi. Bədavi Hüseynov da fərdi məşqlər edir. Bu itkilər problem yarada bilər. Ümid edirəm ki, bu itkilər komandanın qələbə qazanmasına mane olmaz".

Mütəxəssis sonda "Qarabağ"ın görüşdə qalib gələcəyinə ümid etdiyini vurğulayıb: "Molde" ilə oyun asan olmayacaq. Qrupun ilk matçıdır. "Qarabağ" nə qədər təcrübəli olsa da, ilk oyun həmişə həyəcanlı keçir. Qeyd etdiyim kimi, "Molde" diri komandadır. Kampakt oynamağı da bacarırlar. "Qarabağ"ın qələbə qazanan tərəf olacağına ümid edirəm".

Xatırladaq ki, bu gün Tofiq Bəhramov adına Respublika Stadionunda keçiriləcək "Qarabağ" - "Molde" oyunu saat 20:45-də başlayacaq.

Daha çox


Son xəbərlər
topaz banner