"Neftçi" ilə "Sabah"a nə olub?

XƏBƏR 18 Sentyabr 2023 / 15:02 4859

- A +

Misli Premyer Liqasında bu mövsüm çempionluğa namizədlərdən olan "Neftçi" və "Sabah" uğursuz çıxışları ilə diqqət çəkir.

"Neftçi" geridə qalan 6 turda 2 qələbə qazanıb, 2 dəfə heç-heçə edib və 2 məğlubiyyətlə üzləşib. Komanda hazırda turnir cədvəlində 8 xalla 6-cıdır. "Sabah" 5 matç keçirib, 1 qələbə qazanıb, 1 dəfə heç-heçə edib və dalbadal 3 dəfə uduzub. Bakı təmsilçisi bu nəticə ilə 4 xal toplayıb və 8-cidir.

Azərbaycanın Əməkdar məşqçisi Ağasəlim Mircavadov Qol.az saytına deyib ki, "Neftçi" bu mövsüm çox futbolçu transfer edib, amma hələ də ortada oyun yoxdur. O, "Neftçi"nin heyətinin tam sabitləşmədiyini qeyd edib:

"Neftçi" pis futbolçular transfer etməyib, keyfiyyətli oyunçulardır. Amma hazırda o futbolçuları birləşdirmək baş məşqçinin - Adrian Mutunun işidir. İndi bu, "Neftçi"də alınmır. "Neftçi"nin fiziki durumu da yaxşı deyil. Mənim xoşuma gəlmir. "Araz-Naxçıvan"la matçda komanda hücumdan müdafiəyə qayıda bilmirdi. "Araz-Naxçıvan" 2-3 futbolçu ilə əks-hücuma keçəndə "Neftçi"nin müdafiəçiləri onlara çata bilmirdilər. "Neftçi"də problemlər var. Çünki heyət tam sabitləşməyib. Həm də baş məşqçi gec təyin olundu, komanda yaxşı təlim-məşq toplanışı keçə bilmədi. "Neftçi" xeyli futbolçu alıb. Baş məşqçi oyun sistemini qurmalı idi. Amma indi biz bunu görmürük. "Neftçi" Kilian Lebon ola-ola, Reziuan Mirzovu aldı. Mirzov yaxşı futbolçudur. Amma axı, "Neftçi"də Lebon var. Futbolçu olan mövqelərə təzədən oyunçu almaq yaxşıdır, ikinci heyət formalaşır. Lakin "Neftçi" yalnız Azərbaycan çempionatında oynayır. Heyəti tam formalaşdırmayıblar".

A.Mircavadov "Sabah"ın hazırkı durumuna da toxunub: "Murad Musaevin müsahibəsini oxudum. Mən onunla razıyam. Oyunçular "Partizan"la görüşdə uduzandan sonra özlərinə gələ bilmirlərsə, evə gedib, televizora baxsınlar. Bu qədər uğursuzluq olmaz. Ümid edirəm ki, "Sabah" düzələcək. "Sabah" da çox futbolçu transfer edib. Amma onların əvvəlki sistemləri, oyunları yoxdur. Həmin oyunu inkişaf etdirmək lazım idi. Bu, baş məşqçinin işidir. Mənim onun işinə qarışmaq kimi bir fikrim də yoxdur. 2 mərkəz müdafiəçisi, vingerlər, hücumçu alıblar. Amma hələ ki, uğur qazana bilmirlər. "Sabah" "Qarabağ"a təmiz oyunla uduzdu. "Qarabağ" həddindən artıq güclüdür. Komanda meydana çıxanda bilməlidir ki, kimin hesabına, nəyin hesabına qələbə qazanacaq. Plan olmalıdır. Komanda öz oyununu oynamalıdır. Əgər futbolçular o oyun tərzi ilə rahatdırlarsa, sevirlərsə, niyə uzaqlaşasan? Biz komandanın daxilində deyilik, nə baş verdiyini bilmirik. "Sabah" sakitləşib. Amma belə olmamalıdır. Çünki builki Premyer Liqa əvvəlkilərdən fərqli, gərgin olacaq".

Nur Zeynalova

Daha çox