Rəşad Sadıqovla bağlı ən son xəbər (YENİLƏNİB-3)

Azərbaycan milli komandasının kapitanı Rəşad Sadıqov Türkiyənin “Konyaspor” klubu ilə ilyarımlıq müqavilə bağlayacaq.
“Hazırda “Konyaspor”un düşərgəsindəyəm. Mən “Kocaelispor”un heyətində çıxış edərkən, “Konyaspor”un nümayəndələri oyunumu izləyiblər və xoşlarına gəlib. Yəqin ki, bu klubla ilyarımlıq müqavilə bağlayacağam” - deyə «Trend News»a Türkiyədən Sadıqov bildirib.
Türkiyə Super Liqasında çıxış edən “Konyaspor” 17 xalla 12-ci yerdədir. Sadıqov “Konyaspor”dan əvvəl İspaniyanın “Valyadolid”, Türkiyənin “Kocaelispor” klubu ilə müqavilə bağlamağa yaxın olub.
Futbolçu “Kocaelispor”da qalmamasının maliyyə problemi ilə bağlı olduğunu bildirib. “İki gün əvvəl “Kocaelispor”un prezidenti bizimlə görüşərək, maliyyə probleminin həll olunduğunu, komandaya yeni baş məşqçinin dəvət olunduğunu bildirdi. Amma bir gün sonra məlum oldu ki, baş məşqçi məsələsi və maliyyə problemi həll olunmayıb. Ona görə də dünən axşam “Konyaspor”un dəvətini qəbul edərək, bu komandanın düşərgəsinə gəldim”, - deyə Sadıqov əlavə edib.
Sadıqov deyib ki, “Kocaelispor” rəhbərliyi onun komandada qalmasını istəsə də, o, bununla razılaşmayıb.
Yığma komandanın kapitanı qeyd edib ki, “Konyaspor”a transferi qarşıdakı günlərdə rəsmiləşəcək.

***

Qol.Az-ın məlumatına görə, «Konyaspor» klubunun başkan yardımçısı Bünyamin Sarıtaş deyib ki, artıq 3-4 futbolçu ilə razılıq əldə ediblər və həftə sonu onlarla müqavilə imzalayacaqlar: «Hələlik həmin futbolçuların adlarını açıqlamaq istəmirəm.Yalnız onu deyə bilərəm ki, müqavilə bağlayacağımız yeni futbolçular orta sahə və hücum xəttində oynayırlar”.
Maraqlıdır ki, «Konyaspor» rəsmisi müqavilə bağlayacaqları futbolçular arasında müdafiəçinin olmadığını söyləyib. Azərbaycan milli komandasının müdafiəçisi Rəşad Sadıqov isə bu komandayla ilyarımlıq müqavilə bağlayacağını bildirib. 

***

Azərbaycan milli komandasının kapitanı Rəşad Sadıqov bu gün Türkiyənin “Konyaspor” klubu ilə komandanın təlim-məşq toplanışı keçdiyi “Kocaeli Kartepe Greenpark” otelindən Konyaya gedib. Bu barədə Türkiyədən «Trend» futbolçu özü məlumat verib. Sadıqov “Konyaspor”a Türkiyənin digər Superliqa təmsilçisi olan “Kocaelispor” klubundan keçib. “Kocaelispor”un maliyyə problemləri olduğundan, Sadıqov bu klubla müqavilə bağlamayıb. Futbolçu bildirib ki, o, “Konyaspor”la il yarımlıq müqavilə bağlamağa hazırlaşır. “Bəziləri “Konyaspor”un düşərgəsində olduğuma şübhə ilə yanaşırlar. Hazırda komandanın yanındayam və “Konyaspor”un baş məşqçisi Giray Bulakla da söhbət etmişik. “Konyaspor”a gələcəyimlə bağlı baş məşqçiyə əvvəlcədən məlumat verilmişdi”. 

***

Az əvvəl hazırda Türkiyənin Antalya şəhərində olan Ağdamın «Qarabağ» klubunun rəsmi saytı milli komandamızın kapitanı Rəşad Sadıqovla bağlı açıqlama yayıb. Açıqlamada deyilir: «Rəşad Sadıqov Türkiyə superliqasında futbol həyatını davam etdirəcək. Bir neçə kluba keçəcəyi haqqında söyləntilər olan istedadlı müdafiəçi artıq "Konyaspor"un futbolçusudur. Azərbaycan idman məkanında sadəcə biz tərəfindən bu xəbəri verməkdən məmnuniyyət duyduğumuzu bildirik. Türkiyədə hazırlıq keçən komandamızın etibarlı mənbədən aldığı xəbər dəqiqdir. Nəzərinizə çatdıraq ki, Sadıqovun qaldığı otel məskinlaşdığımız oteldən cəmi 25 kilometr aralıdadır. Millimizin kapitanıyla birlikdə sabiq «Trabzonspor»lu Ayman da «ağ-yaşıl»larla müqavilə bağlayıb».