Asif Məmmədov: "Neftçi"yə qalib gəlsək..."

"İnter" klubunun yarımmüdafiəçisi Asif Məmmədovun Qol.Az saytına müsahibəsi

- Zədə səbəbindən "Simurq"la oyunda iştirak edə bilmədin. Hazırda durumun nə yerdədir?

- Hələlik zədəm tam sağalmayıb. Müalicə olunuram. Ayağımın damarında qan yığılıb. Yəni zədəm ciddidir. Həkimlər ən azı iki həftə meydana çıxmamağımı tapşırıb.

- Növbəti oyunu buraxmalı olacaqsan?

- Bəli

- Meydana nə vaxt çıxa bilərsən? Ümumiyyətlə son vaxtlar baş məşqçi sənə az şans verirdi. Zədədən sonra əsas heyətə düşmək sənin üçün çətin olmayacaq?

- Zədəm ayağımın hərəkətdə olan yerindədir. Həkimlər çalışır ki, "Bakı" ilə oyunda komandama kömək edim.  "Rəvan"la oyundan sonra baş məşqçi bildirdi ki, hazırlaş, "Simurq"la matçda meydana çıxacaqsan.  Lakin elə  ilk məşqdəcə zədələndim. Neynəmək olar? Bəxtim gətirmədi. Qismətimdə bu var imiş. Zədədən sonra əsas heyətə düşəcəyimə inanıram.

- Sabah çempionatın növbəti turunda "Neftçi" ilə qarşılaşacaqsınız. Bu görüş hada nə deyə bilərsən?

- "Neftçi" son oyunda məğlub olub. Buna görə bizimlə qarşılaşmada məğlubiyyəti unutdurmaq üçün çox çalışacaqlar. Səfərdə oynayacağımızı da nəzərə alsaq, bizi çətin matç gözlədiyini demək olar. Ancaq "Neftçi"ni asan oyun gözləmir. Çünki bu qarşılaşmanın əhəmiyyəti bizim üçün böyükdür. Belə ki, qalib gəlsək, çempionluq şansımız daha da artacaq. Futbolçularımız hamısı yaxşı formadadır. Üçüncü dövrənin hər üç oyununda qalib gəlmişik. Çalışacağıq ki, "Neftçi" ilə qarşılaşmada da uğurlu seriyamızı davam etdirək.

- Bunun üçün şasnınızı necə görürsən? Nəzərə alaq ki, rəqibin bir neçə aparıcı futbolçusu cəzalı durumdadır.

- "Neftçi" kimi komandalarda əsasə və ya ikinci heyət arasında ciddi fərq olmur. Rəqibimizin "Bakı" ilə oyununu izləmişəm. Deməzdim ki, "Neftçi" pis oynadı. Əksinə daha çox qol imkanları oldu. Bu fürsətlərin birindən istifadə etsəydilər, hesab tam fərqli ola bilərdi. Ona görə də heç kim düşünməsin ki, "Neftçi" bizimlə oyuna ciddi itki ilə çıxacaq. Arxayınlaşmamalıyıq, meydana çıxıb bütün gücümüzü sərf etməliyik. Çünki qarşımıza böyük hədəflər qoymuşuq.

- Yadındadırsa, mövsümün əvvəlində səninlə "İnter"in "qara zolaq"dan çıxa bilməməsini müzakirə edirdik.

- Yadımdadır. Həmin vaxtlarda da deyirdim ki, hələ maraqlı oyunlar qarşıdadır. Allaha şükür ki, son turlarda inamlı qələbələr qazandıq və mövqeyimizi yaxşılaşdırdıq. Demək olmaz ki, hazırda ən yaxşı formadayıq. Yenidən aşağı pillələrə düşə bilərik. Yenə də deyirəm ki, hər şey qabaqdadır.

- Altı oyun ardıcıl məğlub olan "İnter" yenidən çempionluq üçün mübarizə aparır?

- Hər il olduğu kimi qarşımıza çempionluq və kuboku qazanmaq məqsədi qoyulub. Yəni maksimum nəticə üçün alışırıq. Çempion olmaq üçün şansımız var. Niyə bu şansdan istifadə etməyək? Liderlə aramızda altı xa fərqi var. Bunu aradan qaldırmaq çətin deyil. Bu mövsüm bəzən autsayderlər sırasında da olmuşuq. Ancaq gördüyünüz kimi sabah ikinci pilləyə yüksəlmək şansımız var.

- "İnter"dən yuxarı pillələrdə "Qəbələ", "Neftçi" və "Qarabağ" kimi komandalar yerləşib. Bu rəqibləri üstələyə biləcəyinizi düşünürsən?

- Tək qeyd etdiyiniz komandalar yox, hər bir rəqiblə mübarizə çox çətinləşib. Təsəvvür edin ki, sonuncu pillələrdə qərarlaşan "Rəvan"ın azlıqda olmasına baxmayaraq, görüşün son saniyələrində qələbə qolunu vuraraq bu komandaya qalib gəldik. Bu, bir daha onu göstərdi ki, çempionatda asan komanda yoxdur.

Ramiq AĞAMƏMMƏDOV