"Klub rəhbərləri yerli mütəxəssislərimizə şərait yaratmalıdır"

"Klub rəhbərləri yerli mütəxəssislərimizə şərait yaratmalıdır"
ÖLKƏ FUTBOLU 9 Yanvar 2014 / 15:07 2606
-  A +

"Çempionatımızın geridə qalan 18 turu ərzində elə də maraqlı oyunun şahidi olmadım. Məncə, builki çempionat ötənilkilərlə müqayisədə zəif keçir".

Qol.Az saytına açıqlamasında bu sözləri "Xəzər Lənkəran" klubunun sabiq baş məşqçisi Yunis Hüseynov deyib.

Təcrübəli mütəxəssis komandalarımızın çıxışını qənaətbəxş saymadağını bildirib. Yalnız iki komandanın inkişafda olduğunu qeyd edib: "Qarabağ"  və "Qəbələ"  güclənib. Ancaq qalan bütün komandalar eyni səviyyədə qalıb və bəziləri isə daha da zəifləyib. Ona görə də çempionatımızın səviyyəsi artmayıb. Əvvəlki rəqabəti də görmürük. Yadınızdadırsa, bir neçə ilə bundan qabaq daha maraqlı çempiont keçirilirdi. Açığı, çempionatın gedişi xoşuma gəlmir. Ancaq fikrimcə, qış fasiləsindən sonra komandaların çoxu güclənəcək. Ümid edək ki, növbəti dövrədə daha maraqlı oyunların şahidi olacağıq. İnanmıram ki, "Xəzər Lənkəran" yüksək yerlər uğrunda mübarizəyə qoşulmasın. Bundan başqa "Bakı" və "İnter"i də yaddan çıxarmaq olmaz. Demək olar ki, "Rəvan"la "Sumqayıt"dan başqa bütün komandaların medalçılar sırasına düşmək şansı var. Bütün bunlar isə klubların etdiyi transferlərdən asılıdır". 

Y.Hüseynov turnir cədvəlinin ilk pillərində yerləşən "Qarabağ" və "Qəbələ"nin uğurlarının səbəbindən danışıb, bu iki komandanın liderlər sırasında qərarlaşmağının  fərqli amillərlə bağlı olduğunu vurğulayıb: "Qarabağ" 6 ildir ki, eyni heyətlə oynayır. Hər il 1-2 futbolçu dəyişməklə heyəti qoruyublar.  Yəni bu komandanın özəyi var. Əlbəttə ki, "Qarabağ" yaxşı oynamalıdır. "Qəbələ"yə gəldikdə isə bu komanda sırf güclü legionerlərin hesabına irəli gedir. Bu da ona görədir ki, digər komandalarımız zəifləyib. İnanmıram ki, digər komandalar əvvəlki oyununu oynasa, "Qəbələ" bu nəticəni qazanardı.  Hərdən görürsən ki, legionerlər can yandırır, qalib gəlmək istəyirlər. Həmin oyunda "Qəbələ" qalib gəlir. Bəzən də legionerlər laqeyd görsənir və komanda yaxşı nəticə əldə etmir.   Yəni "Qəbələ" stabil komanda deyil. Komanda yalnız legionerlərin fərdi ustalığı sayəsində bu gün ikinci pillədə qərarlaşıb".

Y.Hüseynov son vaxtlar klublarımızda tez-tez baş məşqçi dəyişikliklərinə də münasibət bildirib: "Heç vaxt istəmərik ki, klublarımızda baş məşqçi istefaları olsun. Əcnəbi məşqçilərin göndərilməsinə etirazım yoxdur. Ancaq yerli məşqçilərimizin istefasına çox pis oluram. Əgər komandaya yerli məşqçi gətirilirsə, klub rəhbərliyi ona hər cür şərait yaratmalıdır. Necə ki, əcnəbilər üçün bütün imkanlar yaradılır, eləcədə yerli mütəxəssislərimiz üçün  bunu etməlidirlər. Yəqin ki, istefa verən yerli mütəxəssislərimizə lazım olan şərait yaradılmadığı üçün onlar bu addımı atıb".

Daha çox


Son xəbərlər
topaz banner