"Bakı"nın tutduğu mövqe bizi kədərləndirir"

"Bakı"nın tutduğu mövqe bizi kədərləndirir"
ÖLKƏ FUTBOLU 7 Yanvar 2014 / 18:23 2911
-  A +

"Bakı" klubunun yarımmüdafiəçisi Cavid Hüseynovun Qol.Az saytına müsahibəsi


- Başa çatan 2013-cü ili "Bakı" üçün necə dəyərləndirmək olar?

- Düzü, sabit oynamadıq. Turnir cədvəlində tutduğumuz yerə baxanda ürəyimiz sıxılır, kədərlənirik. Heç bir kluba yuxarıdan aşağı baxmaq istəmirəm. Ancaq narahat oluruq. Çünki daha irəlidə olmalıydıq.

- Ötən ili özün üçün uğurlu hesab edə bilərsən?

- Öz çıxışlarımı normal qiymətləndirərdim. Birinci dövrədə bütün oyunlarda start heyətdə meydana çıxdım. Ancaq narahat olduğum məqam odur ki, son oyunlarda ehtiyatda otururdum. Bunu da baş məşqçiyə demişəm. O isə hər şeyin yaxşı olacağına ümid verdi. İnşallah, qış fasiləsindən sonra həmin hallar təkrarlanmaz.

- Türnir cədvəlində liderlər qrupunda olmamağınız nədən irəli gəlir?

- Hər bir komanda öz oyununa görə yerini tutub. Mən demirəm ki, 5-ci pillədə olmamalıydıq. Stabil oynamadığımız üçün bu gün 5-ci pillədə qərarlaşmışıq. Sadəcə istəməzdim ki, bu yerdə olaq. Daha yaxşı pillələrdə olmaq üçün daha çox çalışmalıydıq.

- Bir neçə gündən sonra təlim-məşq toplanışı üçün İspaniyaya yollanacaqsınız. Bu toplanışdan nə gözləyirsiniz?

- Orada "Ateltiko" (Madrid) ilə yoxlama oyunu keçirəcəyimizi bilirəm. Digər rəqiblər mənə məlum deyil. Klub rəhbərliyi komandanın inkişafı üçün belə işlər görür. Bu toplanışdan çox şey gözləyirik. İnanıram ki, təlim-məşq toplanışından sonra komandamız xeyli güclənəcək.

- Vaxtilə "Rəvan"ın yeni baş məşqçisi Güvənc Kurtarın rəhbərlik etdiyi "Adana Dəmirspor"da çıxış etmisən. Türkiyəli mütəxəssis haqda hansı təəssüratların var?

- Onun rəhbərliyi altında 15-20 gün təlim-məşq toplanışında olmuşam. Çempionatın başlamasına bir qalmış isə Güvənc Kurtar istefa verdi. Ona görə də onun rəhbərliyi altında oyuna çıxmadım. Ancaq deyə bilərəm ki, çox intizamlı, işinə tələbkar məşqçidir. Komandanın fiziki hazırlığına çox diqqət yetirir, futbolçulara gərgin məşq keçir. Savadlı mütəxəssisdir. İnanıram ki, "Rəvan"a xeyri dəyəcək.

Ramiq AĞAMƏMMƏDOV

Daha çox


Son xəbərlər
topaz banner