"Milliyə Qurban Qurbanovdan başqa namizəd yox idi"

Milli komandamızın yeni təyin olunmuş məşqçisi Aslan Kərimovun Qol.A saytına müsahibəsi

- Əvvəlcə gec də olsa yeni təyinatınıza görə sizi təbrik edirik. 

- Mənim üçün yenilik deyildi. Ancaq yenə də təşəkkür edirəm. Artıq bu ilin mart ayından etibarən milli komandaya kömək edirdim. Çünki millimizin sabiq məşqçisi Nazim Süleymanov tez-tez rəqiblərimizin oyunlarını izləməyə gedirdi. Belə olan hallarda məni köməkçi məşqçi kimi dəvət edirdilər. Nazim Süleymanov "Neftçi"yə baş məşqçi təyin olunanda isə mən millidəki işimi davam etdirməli oldum.

- Berti Foqtsun vəzifəsində qalmasına münasibətinizi bilmək istərdik.

- Sözsüz ki, hamı kimi mən də götür-qoy edirdim. Fikirləşirdim ki, tutaq ki, Foqts getdi, əvəzinə kim gələ bilər? Yeni gələn məşqçinin necə nəticə verəcəyi, nə qədər vaxt istəyəcəyi də sual doğururdu. Yerli məşqçilərə gəldikdə isə subyektiv fikrim budur ki, Qurban Qurbanovdan başqa namizəd yox idi. Ancaq bunun da mənfi və müsbət tərəfləri var idi. Sözsüz ki, Qurban Qurbanov da millimizi çalışdırsaydı, pis olmazdı. Ancaq Qurban müəllim neçə illərdir ki, "Qarabağ"da əziyyət çəkir, komanda qurur. Bu gün həmin işlərini davam etdirir. "Qarabağ"ın çempion olmaq üçün ən real şansı bu mövsümdür. Ona görə də komandanı yarıyolda qoyub getmək düzgün olmazdı. Qurban müəllim özü də qırağa çəkilirdi. Bu səbəbdən ən optimal variant elə Foqtsun qalması idi.

- Məşqçi təyin olunduqdan sonra Foqtsla söhbətiniz olub? Əsas işinizin nədən ibarət olacağı bəllidir?

- İşimin nədən ibarət olacağını təxminən bilirdim. Çünki dediyim kimi, mart ayından indiyədək bir yerdə çalışırq. Hələ ki, təyinatdan sonra söhbətimiz olmayıb. İşimiz sözsüz ki, milli çempionatı diqqətdə saxlamaq, hansısa rəqiblərimizi analiz etmək və komandamızın məşqlərində köməklik göstərməkdən ibarət olacaq.

- Yerli çempionatı münətəzəm izləyirsiz. Milli komandamızın ilk toplanışı üçün Foqtsa hər hansı futbolçuların adını verməyə hazırlaşırsınız?

- Hazırda milli Berti Foqtsa siyahı vermək düz olmazdı. Çünki uzun müddət futbolçular komandalarından ayrı olacaq. Çempionatda fasilədir, hamı dincəlir. Təlim-məşq toplanışından sonra hər bir futbolçu öz formasının itirə və ya yaxşı forma yığa bilər. Ona görə də çempionatın oyunları zamanı futbolçuları nəzərdən keçirəcəyik. Foqtsun özü isə Antalyada olacaq və klublarımızın yoldaşlıq görüşlərini izləyəcək. Ona görə də hələ ki, dediyiniz siyahıya ehtiyac duymuruq.

- Milli komandamızın Dubay toplanışı nə vaxta nəzərdə tutulub?

- Hələ ki,  toplanışın tarixi barədə bizə bir söz deməyiblər.

- Foqts Azərbaycana gələn gündən bildirib ki, komandamızı "Avro-2016"nın final mərhələsinə hazırlayır. Millimizin bu çempionatın final mərhələsinə çıxmaq şansını necə görürsünüz?

- Sözsüz ki, Foqtsun qarşısına müəyyən vəzifələr qoyulub. Onların yerinə yetirilməsi üçün Foqts məsuliyyət daşıyır. Ancaq bunu nə dərəcədə bacaracağını dolğun şəkildə demək üçün püşkatmanı gözləməliyik. Təsəvvür edin ki, millimiz İtaliya, İngiltərə, İspaniya ilə bir qrupa düşüb. Belə olan halda böyük iddia ilə çıxış etmək gülünc olardı. Çünki biz futbol ölkəsi olaraq adlarını çəkdiyim ölkələrə çata bilmərik. Uyğun rəqiblər olarsa, niyə də "Avro-2016"-nın final mərhələsinə vəsiqə qazanmayaq? Son seçmə mərhələdəki oyunlarımızla göstərdik ki, İsrail və Şimali İrlandiya kimi ortabab  komandalarla oynaya bilərik. Lüksemburq kimi komandanı iki oyunda məğlub edə bilməsək də, buna gücümüz var idi. Buna görə də düşünürəm ki, qrupda ikinci və ya üçüncü yer üçün oynaya bilərik. Əvvəlki illərdə heç ümidimiz yox idi. Fikirləşirdik ki, qrupda sonuncu pillədə olmayaq. Ancaq indi gələcəyə ümidlə baxa bilirik. Keçdiyimiz yol bizə ümid verir. İndi potensialımız daha yaxşıdır.

Ramiq AĞAMƏMMƏDOV