"Tuyqun Nadirov Sadıq Sadıqova deyib ki, onların reklam pulunu kəsin”

"Xəzər Lənkəran" klubunun vitse-prezidenti Tuyqun Nadirov mənim rəhbərlik etdiyim futbolpress.az saytına qarşı qeyri-adekvat bir yol tutub. Mən həmişə klubları tənqid atəşinə tutmuşam. "Xəzər Lənkəran" da həmin klublardan biridir. Yazdığım tənqidlərin də çoxu düz çıxır. Tuyqun Nadirovun pulunun çox olması o demək deyil ki, bizim sayta təsir edə bilər".

Qol.Az saytına açıqlamasında bu sözləri fəaliyyətini müvəqqəti olaraq dayandıran futbolpress.az saytının baş redaktoru Elçin Cəlilov deyib.

O qeyd edib ki, rəhbərlik etdiyi saytı hazırda fəaliyyət göstərə bilmir, vəziyyət kritikdir: “Bütün bunların səbəbkarı isə  "Xəzər Lənkəran" klubunun vitse-prezidenti Tuyqun Nadirovdur. Hamı bilir ki, hazırkı idman saytlarının əsas gəlir mənbəyi klubların reklamındandır. Tuyqun Nadirov bu yaxınlarda "Neftçi" klubunun prezidenti Sadıq Sadıqova zəng edərək deyib ki, Elçin Cəlilovun rəhbərlik etdiyi sayt Rövnəq Abdullayevi tənqid edir, siz onlara niyə reklam verirsiniz? Biz onların reklamını kəsmişik, siz də kəsin! Bu insanın çirkin niyyətinə baxın. Yaxşı ki, onun bu niyyəti mənə tez məlum oldu. Tuyqun Nadirov AFFA-nın baş katibi Elxan Məmmədova da Rövnəq Abdullayevi tənqid etdiyimizi deyib. Mən "Neftçi" klubuna bildirdim ki, Tuyqun Nadirovun çirkin niyyətini ortaya çıxarmaq üçün onunla üzləşməlisiniz. Onlar da bununla razılaşdılar. Ancaq Tuyqun Nadirov bu məsələdən qaçır. Hazırda bizim saytın fəaliyyətinin dayandırılmasının səbəbkarı da Tuyqun Nadirovdur. Ancaq mətbuata yalan açıqlama verir ki, guya bundan xəbəri yoxdur. Dəfələrlə Tuyqun Nadirova zəng edib bildirmişəm ki, gəlsin, bu məsələni aydınlaşdıraq. Ancaq o, görüşdən qaçır. Onu da qeyd edim ki, bundan öncə də Tuyqun Nadirovun sifarişi ilə bizim sayta xaker hücumu olmuşdu".

Elçin Cəlilov məsələ ilə bağlı  "Xəzər Lənkəran" klubunun rəhbərliyinə də müraciət etdiyini bildirib: "Xəzər Lənkəran" klubunun fəxri prezident Mübariz Mənsimova və prezidenti Mais Mənsimova məktubla müraciət etmişəm ki, Tuyqun Nadirovun fəaliyyəti ciddi araşdırılsın. Dörd ildir ki, ədalətli mövqeyi ilə fəaliyyət göstərən futbolpress.az saytının fəaliyyətinin dayandırılmasının səbəbkarının Tuyqun Nadirov olduğunu hesab edirəm və buna görə "Xəzər Lənkəran" klubunun rəhbərliyindən izahat tələb edirəm".

Elçin Cəlilov onu da əlavə edib ki, qeyd edilən bütün məsələlər həlllini tapmasa, futbolpress.az saytı fəaliyyətini davam etdirə bilməyəcək: "Bizim "Neftçi" və "Qarabağ"la reklam müqaviləmiz var idi. Hələ bu hadisələr baş verməmiş, yəni sentyabrın axırında "Neftçi" ilə reklam müqaviləmiz bitib. Yeni müqavilə bağlanmaq ərəfəsində isə bu söhbət açıldı. Tuyqun Nadirovun danışığından belə çıxır ki, guya bu oyunu "Neftçi" tərəfi qurub. Ancaq "Neftçi"nin əlində faktlar var. Əgər faktlar varsa, niyə Tuyqun Nadirovun yalanını isbat etmir? Mən prinsipiallığımı davam etdirəcəm. Tuyqun Nadirovun bütün ittihamlarının yalan olduğu sübuta yetirilib. Yaxın günlərdə saytın faəliyyətini bərpa etməyə çalışacam".