“Guya müdafiə futbolu ilə uduzmuruq?”

Azərbaycanın əməkdar məşqçisi Ağasəlim Mircavadov DÇ-2014-ün seçmə mərhələsində milli komandamızın sentyabrın 7-də İsrail yığmasına qarşı keçirəcəyi oyun haqda Qol.Az saytının suallarını cavablandırıb.

- İsraillə görüş haqda nə deyə bilərsiniz?

- Hazırda ümidimiz xal ehtiyatını artırmağa qalıb. Rusiya millisinin Şimali İrlandiyaya uduzmağı İsrailin şasnlarını artırdı. Ona görə də İsrail millisi həm bizə, həm də ruslara qalib gəlməklə dünya çempionatına vəsiqə qazanmağa çalışırlar. Bu baxımdan çox çətin oyun olacaq. Rəqibin güclü azarkeş dəstəyi olacaq. Çünki komandalarına ümidləri var. Ancaq millimiz öz imicini qorumaq üçün yaxşı nəticə qazanmalıdır.

- Milli komandamızın Malta ilə oyunu nəyi deməyə əsas verir, İsraillə bacara bilərik?

- Həmin oyunda biz eksperimental heyətlə oynadıq. Müdafiədə və orta xəttə fərqli futbolçular oynayırdı. Yəqin ki, Foqts İsraillə oyuna tam fərqli heyət çıxaracaq. Futbolçular həmişə finişə yaxınlaşanada həvəslə oynayır. Seçmə mərhələni yaxşı tamamlamaq istəyirlər. İstərdim ki, bu həvəs oyunçularımızda qalsın.

- İsrail klublarına çox vaxt acınacaqlı şəkildə uduzuruq. Sizcə, milli komandalarla da bu baş verə bilər?

- Mən buna inanmıram. Çünki hazırda futbolçularımızda oyun təcrübəsi var. Avqust ayını bütöv şəkildə oynayıblar. Bəzi oyunçular Avroliqada çıxış edib. Ona görə düşünürəm ki, oyunçularımız hazırdırlar.

- Bəs, səfərdən xalla qayıtmaq şanslarımız nə dərəcədədir?

- Əsas odur ki, oyunun olsun. Komanda öz oyununu göstərə biləndə xal da qazanır, qalib də gəlir. Bir məsələ də var ki, İsrail millisinin heyətində böyük itkilər var. Onsuz da onlarda da oyunçu qıtlığı var. Futbolçularımız bilməlidir ki, 2016-cı ilə qədər töhvə vermək lazımdır. Bunun üçün də stabil oyun olmalıdır. Ən əsası isə Berti Foqtsun taktiki gedişindən çox şey asılıdır. Əgər İsraildə yenə müdafiədə oturacağıqsa, işimiz ağır olacaq. Çünk iki variant var; ya sən hücum etməlisən, ya da rəqib. Məncə, İsrail oynamağa imkan verəcək. Çünki Bakıdakı oyunda da gördük ki, onlar topla oyunu sevir. Belə komandalar həmişə imkan verir ki, rəqib də topla oynasın, görək kim qalib gələcək.

- Foqts yenə də daha çox müdafiəyə meyilli heyət təşkil edib. Düşünürsüz ki, İsraillə hücumameyilli oynamaq lazımdır?

- Həmişə müdafiə futbolu oynayırıq. Guya belə oyunda məğlubiyyətdən uzaq oluruq? Sadəcə böyükhesablı uduzmuruq. Ancaq yenə də 1-2 top fərqi ilə uduzuruq. Bununla da xalsız qalırıq. Kim deyə bilərdi ki, Lüksemburqa öz meydanımızda qalib gələ bilməyəcəyik? Onlar gəldilər Bakıda öz oyunlarını oynadılar, qol vurmağa çalışdılar. Buna da nail oldular və səfərdən xalla qayıtdılar. Qol vurmaq istəyi bizə çoxdan lazımdır. Qol vurmaq o demək deyil ki, medafiəni buraxmaq lazımdır. Balansı qorumaq şərtilə hücumameyilli oynamaq olar. İsrail Portuqaliya və ya Rusiya deyil. Həm də İsrail bizə oynamağa imkan verəcək.

Ramiq AĞAMƏMMƏDOV