Yersiz hücum və ya bir daha “Simurq”un məğlubiyyəti haqda

Ötən həftə “Simurq” və “İnter”in simasında yeni mövsümdə klublarımızın Avrokubok macərasına start verildi. Nəticələr ürəkaçan olmasa da, bu gözlənilən idi.
“İnter” ilk matçda səfərdə “Spartak”a uduzsa da, Qutinin vurduğu qol “bankirlər”i növbəti mərhələyə bir xeyli yaxınlaşdırdı. İndiki halda, Bakıda vurulacaq bir qol təmsilçimizi növbəti mərhələyə daşıyacaq. Təbii ki, “İnter” qol vurmaqla yanaşı, həm də qapısının toxunulmazlığını qorumalıdı. Amma istənilən halda, “Simurq”la müqayisədə “bankirlər”in mərhələ adlamaq şansı daha çoxdur.
Düzdür, “Simurq”dan da cavab matçında sürpriz gözləməyə dəyər. Ümid sonda ölür deyirlər. Komandanın baş məşqçisi Roman Pokoranın da dediyi kimi, təmsilçimiz rəqibinə 3 və ya 5:0 hesabıyla deyil, cəmi 1 cavabsız qolla uduzub...
Bu gün çoxları “Simurq”u tənqid atəşinə tutsa da, hadisələrə real baxmaq lazımdır. “Simurq”un məğlubiyyətinin səbəbləri çoxdur. Birincisi, komanda avrokuboklarda debütantdır. Bu cür yarışlarda isə təcrübə böyük önəm daşıyır. İkincisi, komandanın heyəti yenidən qurulub. “Bney İequda” ilə matçın start heyətində 5 yeni futbolçu var idi ki, onların da komandaya dərhal uyğunlaşması qeyri-mümkündür. Bunun üçün bir qədər zamana ehtiyac var. Digər tərəfdən də “Simurq”un rəqibi güclüdür. Kimsə Guy Luzonun ilk oyunöncəsi keçirilən mətbuat konfransında dediklərinə aldana bilər. Amma bir anlıq İsrail və Azərbaycan futbollarını müqayisə edin. Təbii ki, hər iki ölkənin futbollarını tərəzinin bir gözünə qoymaq olmaz. “Bney İequda”nın heyətində oynayan gənc və perspektivli futbolçular belə, bizim əksər milli üzvlərindən daha yaxşı təsir bağışladılar. İyulun 2-də “Bney İequda”nın kapitanı Assi Baqrut və komandanın lideri Eliran Atar respublika stadionunda xariqələr yaradırdılar. Məgər, bizdə o cür futbolçular var? Təbii ki, yoxdur. Olsaydı, millimiz bu gün FİFA reytinqində 139-cu yox, israillilər kimi 25-ci pillədə qərarlaşardı. Əlbəttə, könül istərdi ki, “Simurq” “Bney İequda”nı məğlub etsin. Amma reallıq başqa şey deyir.
“Simurq” son illər çox iş görüb. 4 yaşlı komandanın Azərbaycan çempionatında üçüncü yerə çıxıb, ölkəmizi Avrokuboklarda təmsil etməsi özü böyük uğurdur. Axı, 15 ilə yaxın Zaqatala futbol olmayıb. Bu gün isə Zaqatalada ölkənin ən iddialı klublarından biri var. Eyni zamanda şəhərdə gözəl stadion tikilib. 4 yaş qrupu üzrə komandalar formalaşdırılıb. Bütün bunları yaratmaq asan görünməsin. Həmin komandaların hər birində 20-dən artıq futbolçu çıxış edir. Bu isə o deməkdir ki, zaqatalalı azarkeşlərin sevimli komandalarının heyətində yerli uşaqların forma geyməsini görəcəyi gün uzaqda deyil.
Bütün bunlara baxmayaraq, istənilən halda, cavab qarşılaşmarı öncəsi həm “Simurq”a, həm də “İnter”ə dəstək olmaq lazımdır. Bu gün “Simurq” tənqid olunur. Amma maraqlısı odur ki, “Simurq” hələ mübarizəni başa vurmayıb. Məgər, komandamız səfərdən qələbə ilə dönə bilməz? Təbii ki, bu, münkündür. Maraqlıdır, görəsən, “Simurq” mərhələni səfərdə keçəcəyi halda, bu gün komandanı tənqid edənlər nə deyəcəklər? Unutmayın ki, İsrail klubu buna qədər bir dəfə qarşılaşmışıq ki, səfərdə əldə olunan 2:1-lik qalibiyyət sayəsində mərhələni adlayan tərəf məhz “Qarabağ” olmuşdu. Niyə eyni uğuru “Simurq” təkrarlamasın? Ona görə də gəlin, tələsməyək. Cavab matçı öncəsi “Simurq”a dəstək olaq!
VÜSAL