Burak Yılmaz: “Real”ı keçsək, kuboku qazana bilərik”

Çempionlar Liqasındakı yüksək səviyyəli oyunu ilı Avropa klublarının diqqətini çəkən Burak Yılmaz Türkiyə mətbuatına müsahibə verib. Qol.Az müsahibəni təqdim edir.

- Türkiyənin ən böyük dörd klubunda oynamısan. “Qalatasaray”ı digərlərindən fərqləndirən nədir?

- Bu günə qədər oynadığım hər bir klub mənim üçün çox dəyərlidir. Sadəcə, “Qalatasaray”da fərqli Burak izləyirsiniz. Çünki hazrıda ən yaxşı formadayam. Bundan komanda yoldaşlarımın və baş məşqçimin böyük rolu var.

- Keçən mövsüm “Trabzonspor”da 30 matçda 33 qol vurmuşdun. Bu nəticəni daha da yaxşılaşdıracağına inanırsan?

- Bəli, bunun üçün çox çalışıram. Əgər öz işinizi düzgün edirsinizsə, uğur olacağına inanıram. Mən hazırda işimlə və “Qalatasaray”la yaşayıram. Komandama daha yaxşı necə fayda verəcəyimi düşünürəm.Mənim üçün ən önəmli olan qol vurmağım yox, komandamın qələbə qazanmağıdır. Sözsüz, hər ikisi olarsa, daha məmnun olaram.

- Çempionlar Liqasının 1/4 finalın püşkatmasında rəqibiniz “Real” olduğunu biləndə nələr hiss etdin?

- Bu nöqtədən sonra bizə hansı klubun rəqib olması önəmli deyildi.Çünki bu mərhələyə çıxan hər komanda güclüdür.

- Bəs bu oyunda şanslarınızı necə qiymətləndirirsən?

- Komanda olaraq çox yaxşı əhval-ruhiyyədəyik. Əlimizdən gələni edəcəyik. “Real” güclü rəqibdir, ancaq onları məğlub etsək, kuboku qazanacağımıza inanıram.

- Evində xatirə olaraq saxladığın formaların var?

- Hədiyyələri, formaları saxlamaq yaxşı vərdişdir. Gələcəkdə bunlara baxıb fərqli hisslər keçirirsən. Bəlkə də gələcəkdə futbol həyatımdam kitab yazdım.

- Unuda bilmədiyin qol hansıdır?

- Bunu gələcəkdə kitabımda oxuyarsınız. Ona görə sirr qalsın.

- Droqba və Sneyderin transferindən sonra “Qalatasaray” Türkiyənin arzuladığı komanda oldumu?

-Çox yaxşı bir heyətimiz var. Ancaq ən yaxşı komanda bir-iki futbolçu ilə deyil, ümumi heyətlə olur. Biz də yaxşı oynamaq üçün əlimizdən gələni edirik. Buna görə də mütəmadi olaraq çalışırıq.

- Hücumda oyunun daha çox kimlə yaxşı alınır?

- Bir futbolçunun belə bir suala cavab verməsi həm komanda yoldaşlarına, həm baş məşqçisinə hörmətsizlik olar.

- Başla, ayaqla, cərimə zərbəsindən, bir sözlə, hər cür qol vurursan. Bəs ən çox necə qol vurmağı sevirsən?

- Mən sadəcə vurduğum topun qapı xəttini keçməsini istəyirəm. Buna görə də necə qol vurmağım önəmli deyil.

-Sneyder klubunuza transfer olunanda nə düşündün?

-“Qalatasaray” böyük klubdur. Burada hansısa transferin gərçəkləşməsi möcüzə deyil. Buna görə də heç təəccüblənmədim.

-Bir çox baş məşqçi ilə çalışmısan. Ancaq Fatih Terimlə aranızda sanki xüsüsi münasibət var.

-Fatih Terim çox yaxşı insan və baş məşqçidir. Onunla çalışmayan bunu anlaya bilməz. Onunla bir yerdə olmaqdan qürur hissi keçirirəm.

- Boş zamanlarda digər ölkələrin çempionatlarını izləyirsən?

-Əlbəttə. İngiltərə Premyer Liqası və son zamanlar səviyyəsi xeyli yüksələn Rusiya çempionatının matçlarını izləyirəm. İspaniya və İtaliya liqaları ilə də maraqlanıram.

-Droqbanın transfer xəbərini duyduğunda nələr hiss etdin?

- Droqba dünyanın tanınmış futbolçularından biridir. Onun “Qalatasaray” üçün çox şeylər edəcəyinə, bir yerdə yaxşı nailiyyətlər qazanacağımıza inanıram. Biz peşəkar futbolçuyuq. Rəqabətin yüksək olduğu klubda oynamaq bizim öz oyunumuza da təsir edir.

- Azarkeşlər səni tribunaya çağıranda əlini başının üstünə qoyursan. Bunun mənası nədir?

- Yəni başımın üstündə yeriniz var. Tərəfdarlarımız möhtəşəmdir. Yağmurda, qarlı havada belə bizi dəstəkləyirlər. Mən də ən yaxşı oyunumu nümayiş etdirməyə çalıçıb onların dəstəklərini qarşılıqsız qoymamağa çalışıram.