«İnter»in "Birlik kuboku"ndakı rəqibləri bəlli oldu (YENİLƏNİB-2)

Bu gün MDB və Baltikyanı ölkələrin çempionlarının mübarizə apardığı 17-ci «Birlik kuboku»nun püşkü atılıb. Qol.Az-ın məlumatına ğörə, Moskvadakı «Futbol evi»ndə keçirilən tədbirdə Azərbaycan çempionu «İnter»in rəqibləri məlum olub. Valentin Xodukinin komandası D qurupunda Latviyanın «Ventspils», Qırğızıstanın «Dordoy-Dinamo» və Finlandiyanın «İnter» klubları ilə mübarizə aparacaq. Qeyd edək ki, Finlandiya klubu ilk dəfədir ki, bu yarışda iştirak edir. Serbiya komandaları «Birlik kuboku»na qatılmaqdan imtina etdikdən sonra Rusiya Futbol İttifaqı (RFİ) finlərin razılığını alıb.
A qrupu: «Rubin» (Rusiya), «Ararat» (Ermənistan), «Aktobe» (Qazaxıstan), «Paxtakor» (Özbəkistan).
B qrupu: «Aşqabad» (Türkmənistan), MTZ-RİPO (Belarus), «Ekranas» (Litva), Rusiyanın gənclər yığması.
C qrupu: «Şaxtyor» (Ukrayna), «Şerif» (Moldova), «Levadiya» (Estoniya), Reqar-Tadaz» (Tacikistan).
Yarışların keçirilməsi departamentinin rəhbəri Sergey Kulikov maliyyə çətinlikləri ilə üzləşdiklərini etiraf edib: «Hətta maddi səbəblərə görə, turnirin təşkili sual altında idi. Buna baxmayaraq, vəziyyətdən çıxa bildik. İndi televiziyalarla turnirin işıqlandırılmasına dair danışıq aparırıq. Yarımfinal və final görüşü çox güman ki, televiziya ilə yayımlanacaq. Digər oyunlarla bağlı danışıqlar davam edir».

“Heç də asan qrupa düşməmişik. Qırğızıstanın “Dinamo-Dordoy” klubundan fərqli, Latviya və Finlandiya çempionları güclü rəqiblərdir”. Bunu Azərbaycanı “MDB və Baltikyanı ölkələrin çempionlarının Birlik Kuboku” turnirində təmsil edəcək Bakının “İnter” klubun baş məşqçisi Valentin Xodukin deyib (apasport.az).

Xodukin püşkün nəticəsini elə də uğurlu saymır: “Finlandiya çempionu turnirin debütantı olsa da, beynəlxalq oyun təcrübəsi var. Avrokuboklarda çıxış edən Turku təmsilçisi manejdə hazırlığa öyrəşiblər. Çünki onlar qış fasiləsində məşqlərini adətən orda keçirirlər. Üstəlik, daha çox ucaboylu futbolçuların yer aldığı komandanın fiziki hazırlığı yaxşıdır. Elə Latviya çempionu da atletik futbol baxımından seçilir. “Ventspils” də bizim kimi yayda Çempionlar Liqasında çıxış edib və mərhələ adlayıb. Komanda son “Birlik kuboku”nda da qrupdan çıxıb və yenə buna iddialı olacaq. Fikrimcə, növbəti mərhələyə iki yer uğrunda mübarizədə əsas rəqiblərimiz Latviya və Finlandiya çempionları olacaq”.

“Birlik kuboku”nda uğurla çıxış etmək iddiasında olan Xodukin rəqiblərə barmaqarası baxmağı düzgün saymır: “Qırğızlar zəif sayılsa da, turnir sintetik örtüklü meydanda keçirildiyini nəzərə almaq lazımdır. Manejdə oynayan komandadan sürpriz gözləmək olar. ¼ finala çıxacağımız halda da, bizi çətin sınaq gözləyəcək. Çünki C qrupunda əsas favoritlər olan Ukraynanın “Şaxtyor” və Moldovanın “Şerif” klubları güclü rəqiblərdir. Üstünlük qazanmaq üçün 1-ci yeri tutmaq tutmağa çalışacağıq”.