Rubin Çempionlar Liqası ilə vidalaşdı, "Arsenal" və BATE qrup mərhələsində (YENİLƏNİB)

Bu gün UEFA Çempionlar Liqasında pley-off mərhələsinə yekun vurulub. Qol.Az-ın məlumatına görə, ikinci oyun günündə daha 5 görüş keçirilib.

Günün ən maraqlı matçı Portuqaliyada baş tutub. Burada yerli “Benfika” Hollandiyanın “Tvente” klubunu qəbul edib. İlk oyunda doğma meydanda rəqibi ilə heç-heçə (2:2) oynayan hollandlar səfərdə mütləq qələbə qazanmalı və ya bol qollu bərabərlik əldə etməlidir.

Lakin "Benfika" buna imkan verməyib. Doğma meydanda rəqibini 3:1 hesabı ilə məğlub edən "Benfika" adını ÇL-in qrup mərhələsinə yazdırıb. Bununla da, Portuqaliya ÇL-in qrup mərhələsində daha bir komanda ilə təmsil olunacaq.

Futbol azarkeşlərinin səbirsizliklə gözlədiyi oyunlardan biri isə “Udineze” – “Arsenal” görüşü idi. Aparıcı oyunçularını itirdikdən sonra əvvəlki oyunundan əsər-əlamət qalmayan “topçular” İtaliyada da qələbə qazanmağı bacarıb. Hərçənd oyun "Arsenal" üçün yaxşı başlamamışdı. İlk hissənin sonlarında qapısında qol görən "Arsenal" fasilədən sonra vurduğu iki qolla rəqibini məğlub etdi.

İlk oyunda səfərdə rəqibinə 1:3 hesabı ilə məğlub olan “Rubin” cavab görüşündə də “Lion”la bacarmayıb. Kazan təmsilçisi hesabı açsa da, bunun davamını gətirə bilməyiblər. Bundan istifadə edən fransızlar isə "Rubin2i cəzalandırıb - 1:1. Bununla da, "Rubin" mübarizəni Avroliqada davam etdirməli olacaq.

Çexiyanın ÇL-dəki yeganə təmsilçisi “Viktoriya” da qrup mərhələsinin bir addımlığında idi. Birinci oyunda Danimarkada “Kopenhagen”i məğlub edən (3:1) çexlər cavab qarşılaşması öncəsi üstünlük əldə etmişdilər. Çexiya təmsilçisi doğma meydanda da qələbə qazanmaqla qrup mərhələsində iştirak etmək hüququ qazanıb.

Günün digər bir oyununda “Şturm” Avstriyada BATE-ni qonaq edib. İlk matçda doğma meydanda heç-heçə oynayan belaruslar qrup mərhələsindən kənarda qala bilərdilər. Ancaq BATE səfərdə daha inamlı təsir bağışlayıb. Rəqibinə 2:0 hesabı ilə məğlub edən BATE yenidən ÇL-in qrup mərhələsində iştirak edəcək.

 

22 avqust

Çempionlar Liqasının "play-off" mərhələsinin cavab görüşləri

23:45. "Udineze" (İtaliya) - "Arsenal" (İngiltərə) (ilk oyun - 0:1) - 1:2
Qollar: Di natale, 39 (1:0), Van Persi, 55 (1:1), Teo Uolkot, 69 (1:2)

23:45. "Şturm" (Avstriya) - BATE (Belarus) (ilk oyun - 1:1) - 0:2
Qollar: Volodko, 36 (0:1), Simic, 69 (0:2)

23:45. "Viktoriya" (Çexiya) - "Kopenhagen" (Danimarka) (ilk
oyun - 3:1) - 2:1
Qollar: Bolanos, 32 (0:1), Bakos, 68 (1:1), Duris, 90 (2:1)


23:45. "Benfika" (Portuqaliya) - "Tvente" (Hollandiya) (ilk oyun - 2:2) - 3:1
Qollar: Vitsel, 46 (1:0), 66 (3:0), Luisao, 59 (2:0), Ruiz, 85 (3:1)

21:00. "Rubin" (Rusiya) - "Lion" (Fransa) (ilk oyun - 1:3) - 1:1
Qollar: Naço, 77 (1:0), Briand, 84 (1:1)

Qeyd edək ki, bununla da, Çempionlar Liqasının qrup mərhələsində iştirak edəcək bütün komandalar müəyyənləşib. Qrup mərhələsinin püşkatma mərasimi isə sabah Bakı vaxtı ilə saat 20:45-də İsveçrənin Nyon şəhərində keçiriləcək.